ߛߣߍ߬ߖߋߟߌ
ߛߣߍ߬ ߖߋߟߌ ߦߋ߫ ߡߊ߲߬ߘߋ߲߫ ߕߏߟߏ߲ߞߍߟߊ ߘߏ߫ ߟߋ߬ ߘߌ߫ ߡߍ߲ ߓߌ߬ߟߊ߬ ߘߊ߫ ߛߋ߲߬ߠߊ߫ ߝߊ߯ߘߐߞߍ߫ ߁߃߲ ߠߊ߫ ߛߎߡߊߥߙߏ߫ ߞߊ߲ߕߍ߫ ߓߟߏ߫߸ ߣߴߊ߬ ߝߍ߬ߖߛߐ߫ ߘߊ߫ ߛߏ߰ߟߏ߲߬ߖߘߊ߫ ߓߟߏ߫.
ߊ߬ߟߎ (ߕߘߍ߬) ߕߍ߫ ߡߐ߱ ߛߎ߯ߦߊ߫ ߜߘߍ߫ ߡߊߕߐ߯ ߟߊ߫ ߛߍ߬ߣߍߛߊ߰ߡߐ ߟߎ߬ ߞߐ߫. ߞߵߊ߬ ߕߵߊ߬ ߘߊߡߌߣߊ ߏ߬ ߡߊ߬ ߞߊ߬ ߥߴߊ߬ ߛߌ߰ ߝߊ߯ߘߐߞߍ߫ ߂߀߲ ߠߊ߫߸ ߊ߬ ߞߏ ߕߎ߬ߜߍ߬ߕߎ߬ߜߍ߬ ߘߊ߫ ߞߊ߬ ߥߊ߫ ߛߴߊ߬ ߤߏߞߌ߭ ߘߐ߫ ߥߊ߯ߕߌ ߏ߬ ߡߍ߲ ߠߊ߫.
ߞߵߊ߬ ߕߊ߬ ߞߊ߬ߞߎߘߦߊ ߛߋ ߘߊߡߌ߬ߣߊ߫ ߘߴߊ߲ ߠߊ߫ ߟߊ߲߬ߘߊ ߟߎ߬ ߟߊ߫ ߝߊ߯ߘߐߞߍ߫ ߂߁߭ ߣߌ߲߬ ߠߋ ߟߊ߫ ߛߊ߫߸ ߊ߬ ߞߏ ߓߘߊ߫ ߡߊߝߊ߱ ߘߊߡߌ߬ߣߊ߫ ߕߌ߲߬ߞߎߘߎ߲ ߞߣߐ߫߸ ߞߵߏ߬ ߞߎ߲߭ ߞߍ߫ ߡߐ߱ ߟߎ߬ ߟߊ߫ ߜߊߣߊ߲ߦߊ ߣߌ߫ ߞߊߡߋߙߋ߲ ߠߎ߬ ߟߊ߫ ߝߊ߬ߘߌ߬ߘߐ߬ߝߊ߮ ߘߌ߫.
ߝߐߓߏߟߏ߲ߟߐ߲ߘߐߦߊ
ߛߣߍ߬ߖߋߟߌ ߝߐߓߏߟߏ߲ߟߐ߲ߘߐߦߊ (ߞߘߐ) ߣߐ߰ߡߊ߲߬ ߓߊ ߟߋ߬ ߦߋ߫߸ ߓߊߏ߬ ߞߎߡߊߘߋ߲߫ ߝߌ߬ߟߊ߫ ߟߋ߬ ߛߏ߯ߙߏߣߍ߲߫ ߦߋ߫ ߞߊ߬ ߞߍ߫ ߕߐ߮ ߣߌ߲߬ ߘߌ߫ (ߛߍ߬ߣߍ ߣߌ߫ ߖߋ߬ߟߌ)߸ ߡߍ߲ ߞߘߐ ߦߋ߫ ߛߣߍ߬ߞߍ߬ߟߊ ߟߎ߬ ߟߊ߫ ߖߋ߬ߟߌ ߘߌ߫ ߥߟߊ߫ ߛߍ߬ߣߍ ߘߐߘߌߦߊ߫ ߖߋߟߌ߸ ߡߍ߲ ߖߋ߬ߟߌ ߕߐ߮ ߟߊߣߍ߲߫ ߦߴߊ߬ ߞߊ߲߬.
ߘߐ߬ߝߐ
ߡߊ߲߬ߘߋ߲߫ ߞߘߐ߬ߡߊ߲ ߘߐ߫߸ ߡߊ߲߬ߘߋ߲߫ ߗߍ߭ ߓߍ߯ ߕߘߍ߬ ߦߋ߫ ߘߏ߲߬ߛߏ ߟߋ߬ ߘߌ߫߸ ߞߊ߬ ߛߙߍߥߊ ߟߎ߬ ߟߊߘߊ߲߫ ߞߵߊ߬ߟߎ߫ ߟߐ߬ ߘߏ߲߬ߛߏ ߟߎ߬ ߡߊߕߐ߯ ߟߊ߫ ߛߐ߲߬ ߞߊ߬ ߝߟߍ ߘߌߦߊߘߏ߲߬ ߊ߬ߟߎ߫ ߘߐ߫ ߞߊ߬ ߡߐ߬ߓߊ߬ߞߘߐ ߟߎ߬ ߘߡߊߢߌߣߌ߲߫. ߒ߬ߓߊ߬ ߏ߬ ߟߋ ߞߏ ߥߙߊ߬ ߘߊ߫ ߝߎߚߎ߫ ߝߏ߫ ߞߊ߬ ߡߊ߲߬ߘߋ߲߬ߞߊ ߟߎ߬ ߟߖߊߝߏ߫ ߞߵߊ߬ߟߎ߬ ߟߊߞߐ߲ߞߐ߫߸ ߛߎߡߊߥߙߏ߫ ߣߊ߬ߣߍ߲ ߡߊ߲߬ߘߋ߲߫ ߕߘߍ߬ ߟߊ߫ ߛߌ߰ߝߊ߬ߘߌ߬ ߛߎ߮ ߏ߬ ߘߐ߫߸ ߊ߬ ߞߵߊ߬ ߦߋ߫ ߜߟߍ߬ߦߊ߬ ߞߋߟߋ߲߫ ߔߋߛߊ ߡߍ߲ ߦߋ߫ ߡߊ߲߬ߘߋ߲߬ ߡߌߙߌ߲ߘߌ ߟߎ߬ ߞߊ߲߬߸ ߏ߬ ߟߋ ߦߋ߫ ߘߏ߲߬ߛߏ߬ߦߊ ߘߊ߲߬ߠߊߕߊ߬ߡߌ߲߬ߣߍ߲ ߘߌ߫ ߡߍ߲ ߓߘߊ߫ ߡߌ߬ߙߌ߲߬ߘߌ ߞߐ߲ߞߐ߫ ߞߊ߬ ߥߴߊ߬ ߛߋ߫ ߊ߬ ߘߊ߲߭ ߠߊ߫.
ߛߎߡߊߥߙߏ߫ ߞߊ߬ ߝߍ߬ߙߍ ߡߍ߲ ߦߋ߫ ߞߐ߲ߞߐ ߏ߬ ߓߊߛߌ߫ ߝߋ߲ ߘߌ߫߸ ߏ߬ ߟߋ ߞߍ߫ ߘߊ߫ ߘߏ߲߬ߛߏ ߟߎ߬ ߦߙߌߞߊ ߟߊߘߐ߯ߦߊ ߘߌ߫ ߝߎߍ߲߫߸ ߞߊ߬ ߘߏ߲߬ߛߏ߬ ߞߋߟߋ߲߫ ߞߋߟߋ߲߫ ߓߐ߫ ߟߎߓߊ ߟߎ߬ ߓߍ߯ ߞߣߐ߫߸ ߡߍ߲ ߠߎ߬ ߞߍߕߐ߫ ߦߋ߫ ߟߎ ߏ߬ ߡߊ߲߬ߝߋ߲߬ߞߏ ߢߊ߬ ߟߊ߫߸ ߞߊ߬ ߖߊ߬ߡߊ ߕߐ߬ ߕߏߣߍ߲ ߠߎ߬ ߟߐ߬ ߛߍ߬ߣߍ ߟߊ߫.
ߛߙߍߥߊ߫ ߞߏ ߡߊ߬ߘߎ߮ ߝߣߊ߫ ߘߐ߫߸ ߞߊ߬ ߞߋߟߋ߲߫ ߞߋߟߋ߲߫ ߓߐ߫ ߞߊ߬ߝߏ߬ߓߏߟߏ߲ ߠߎ߬ ߓߍ߯ ߘߐ߫߸ ߣߌ߫ ߡߍ߲ ߠߎ߬ ߝߊ߲߭ ߡߊ߲ߓߏ߲߬ ߞߵߏ߬ ߟߎ߫ ߝߌ߬ߟߊ ߘߍ߬ ߞߋߟߋ߲߫ ߠߊ߫߸ ߡߍ߲ ߠߎ߬ ߦߋ߫ ߡߊߞߟߌ߫ ߟߊ߫ ߞߊ߬ߝߏ߬ߓߏߟߏ߲ ߘߊ߲߬ߞߎ߲߬ߛߐ ߣߴߊ߬ ߛߌ߲߬ߓߏ߲߬ߛߌ ߟߎ߬ ߘߌ߫ ߞߍ߬ߣߍ߲߸ ߊ߬ ߣߌ߫ ߜߟߏ߬ߡߊ߬ߓߏ߲ ߠߎ߬ ߘߐ߫.
ߛߙߍߥߊ ߕߐ߭ ߡߍ߲ ߠߎ߬ ߓߐ߫ ߘߴߏ߬ ߞߐ߫߸ ߊ߬ ߞߵߏ߬ ߟߎ߫ ߦߟߍ߬ߡߊ߲߫ ߞߵߊ߬ߟߎ߫ ߞߍ߫ ߛߣߍ߬ ߖߋߟߌ ߟߎ߬ ߘߌ߫߸ ߡߍ߲ ߠߎ߬ ߟߐ߬ ߘߊ߫ ߛߍ߬ߣߍ߫ ߛߊ߰ߡߐ߮ (ߛߣߍ߬ߞߍ߬ߟߊ ߡߍ߲ ߦߋ߫ ߛߍ߬ߣߍ ߛߌߦߊߡߊ߲ ߞߍ߫ ߟߊ߫ ߞߊ߬ ߛߎ߬ߡߊ߲߬ߓߊ ߓߐ߫) ߟߎ߬ ߡߊߕߐ߯ ߟߊ߫ ߛߐ߲߬ ߞߵߊ߬ߟߎ߫ ߟߐ߬ ߊ߬ߟߎ߬ ߘߐߖߊ߬ ߟߊ߫ ߓߘߍߞߍ߭߸ ߒ߬ߓߊ߬ ߏ߬ ߟߋ ߞߍ߫ ߘߊ߫ ߖߋ߬ߟߌ ߛߎ߯ߦߊ߫ ߞߎߘߊ߫ ߟߊߘߊ߲ߣߍ߲ ߘߌ߫ ߡߊ߲߬ߘߋ߲߫ ߛߊ߫.
ߛߏ߲߬ߖߘߊ߫ ߛߌ߰ߣߍ߲߸ ߏ߬ ߞߍ߫ ߘߊ߫ ߡߊ߲߬ߘߋ߲߬ߞߊ ߟߎ߬ ߦߟߌߡߊߘߌߦߊ߫ ߞߏ߫ ߘߌ߫ ߞߴߊ߬ ߘߌ߫ ߣߊ߬ ߟߊ߲߬ߘߊ ߟߎ߬ ߟߊߛߊ߬ߦߌ߫ ߊ߬ ߢߊ߫ ߞߘߐ ߡߊ߬߸ ߞߏ߬ߣߵߏ߬ ߝߣߊ߫ ߞߊ߬ ߞߏ ߕߏ߫ ߊ߫ ߢߊ ߏ߬ ߟߋ ߡߊ߬߸ ߏ߬ ߟߋ ߕߘߍ߬ ߦߴߊ߬ ߞߍ߫ ߟߊ߫ ߊ߬ߟߎ߫ ߕߘߍ߬ ߦߴߊ߬ ߡߊߕߋ߰ߙߎ߬ ߟߊ߫ ߞߏ߫ «ߛߎߡߊߥߙߏߣߍ߲߫ ߘߊߘߐߘߌ»߸ ߏ߬ ߟߋ ߞߵߊ߬ ߞߍ߫ ߛߣߍ߬ߖߋߟߌ ߟߎ߬ ߕߏ߫ ߘߴߊ߬ߟߎ߫ ߟߊ߫ ߕߊ߯ ߛߌߟߊ ߞߊ߲߬.
ߛߣߍ߬ߖߋߟߌ ߟߎ߬ ߟߊ߫ ߝߐߟߌߝߋ߲
ߛߣߍ߬ߖߋߟߌ ߟߎ߬ ߟߊ߫ ߝߐߟߌߝߋ߲ ߦߋ߫ ߝߋ߲߫ ߝߌ߬ߟߊ߫ ߟߋ߬ ߘߌ߫ ߡߍ߲ ߠߎ߬ ߦߋ߫ ߓߐ߫ ߟߊ߫ ߢߐ߲߮ ߞߘߐ߫ ߊ߬ ߟߊߛߐ߲ߞߐ߫ ߕߎߡߊ ߟߎ߬ ߟߊ߫ ߞߍ߬ߣߍ߸ ߏ߬ ߟߎ߬ ߝߟߍ߫:
- ߕߊ߬ߡߊ߲: ߊ߬ߟߋ ߦߋ߫ ߦߙߌ߫ ߟߛߍߣߍ߲ ߕߍߡߊߞߙߋ߬ߞߙߋ߬ߣߍ߲ ߠߋ߬ ߘߌ߫߸ ߜߏ߬ߟߏ ߦߋ߫ ߕߎ߬ ߟߊ߫ ߡߍ߲ ߞߎ߲߭ ߝߌ߬ߟߊ ߟߊ߫ ߞߊ߬ ߜߏ߬ߟߏ߫ ߕߋ߬ߣߍ߲ ߟߏߞߌߣߍ߲ ߡߏߦߌߡߏߦߌߣߍ߲ ߥߟߊ߫ ߖߎ߬ߟߎ ߟߎ߬ ߞߍ߫ ߞߵߊ߬ ߛߊ߬ߡߊ߲߫߸ ߒ߬ߓߊ߬ ߕߊ߬ߡߊ߲߬ߝߐ߬ߟߊ ߦߴߏ߬ ߟߋ ߘߏ߲߬ ߠߴߊ߬ ߞߊ߬ߓߊ ߞߘߐ߫ ߞߊ߬ ߕߏ߫ ߊ߬ ߣߐ߲߬ߞߐ߲ ߞߍ߫ ߟߊ߫ ߞߵߊ߬ ߘߐߘߌ߯ ߛߐ߲߬ ߛߴߊ߬ ߝߐߞߊ߲ ߠߎ߬ ߘߌ߫ ߓߐ߫ ߢߐ߲߮ ߡߊ߬ ߛߐ߲߬.
- ߕߊߣߊ߲ߣߍ߲: ߊ߬ߟߋ ߦߋ߫ ߜߏ߬ߟߏ ߕߎ߰ߣߍ߲ ߠߋ߬ ߘߌ߫ ߓߟߍ (ߛߎ߬ߡߊ߲ ߕߘߍ߬ ߦߋ߫ ߓߌ߬ߟߊ߬ ߟߊ߫ ߓߊ߲߬ߞߎ߬ ߘߊ߮ ߡߍ߲ ߘߐ߫) ߘߟߊ߫. ߒ߬ߓߊ߬ ߛߣߍ߬ߖߋߟߌ ߦߴߏ߬ ߟߋ ߡߊߘߍ߲ߘߍ߲߫ ߠߴߊ߬ ߟߊ߫ ߞߎߡߊ߫ ߡߊߘߊ߲߫ ߕߎߡߊ ߟߎ߬ ߟߊ߫ ߛߐ߲߬߸ ߊ߬ߟߋ ߟߋ߬ ߞߊ߲ ߜߟߍ߬ߡߊ߲߫.
ߛߣߍ߬ߖߋߟߌ ߝߘߌߦߊߓߐ
ߛߣߍ߬ߖߋߟߌ ߦߴߊ߬ ߕߎ߬ ߟߊ߫ ߝߊ߰ߣߌ߲߬ ߜߍߡߊ߲ ߘߏ߫ ߟߋ߬ ߘߐ߫ ߞߊ߬ ߞߟߐ߬ ߜߘߍ߫ (ߥߎ߬ߟߋ߲߬ߡߊ߲ ߥߟߊ߫ ߝߌ߲߰ߡߊ߲) ߟߎ߫ ߖߟߎ߬ ߖߊ߲ ߛߊ߬ߡߊ߲߬ ߊ߬ ߢߊߝߍ߬ ߛߐ߲߬߸ ߊ߬ ߘߙߌ߬ߞߌ ߦߋ߫ ߓߏߟߏ߲ߖߊ߲ ߘߌ߫ ߞߊ߬ ߞߙߎ߬ߛߌ ߞߍ߫ ߜߊ߲ߖߊ߲ ߘߌ߫߸ ߞߊ߬ ߓߌ߲߬ߛߊ߲߬ߓߌ߲ߛߊ ߠߎ߬ ߞߍ߫ ߞߙߎ߬ߛߌ ߟߊ߫.
ߝߎ߯ߟߊ߫ ߞߏ ߡߊ߬ߘߎ߮ ߘߐ߫ ߛߊ߫߸ ߝߎ߯ߟߊ߫ ߖߊ߲ ߘߏ߫ ߟߋ߬ ߦߋ߫ ߓߌ߬ߟߊ߬ ߟߴߊ߬ߟߎ߫ ߞߎ߲߬ߠߊ߫߸ ߞߊ߬ ߛߊ߰ߖߌ߬ ߝߟߍߞߍ ߓߌ߬ߟߴߊ߬ ߟߊ߫߸ ߝߟߍߞߍ ߏ߬ ߟߋ ߦߋ߫ ߝߊ߲߭ ߝߌ߬ߟߊ ߓߍ߲߬ ߠߊ߫ ߕߏߟߏ߲߫ ߕߎߡߊ ߟߊ߫ ߛߐ߲߬.
ߛߏ߬ߓߊ߬ߞߏߛߌ (ߛߏ߬ ߞߏߛߌ) ߦߋ߫ ߞߍ߫ ߟߴߊ߬ߟߎ߫ ߓߟߏ߫ ߛߐ߲߬߸ ߦߴߏ߬ ߦߋ߫ ߡߊ߲߬ߘߋ߲߫ ߘߋ߬ߙߌ߬ߣߊ߲߬ ߞߏ߫ ߘߌ߫ ߢߊ ߡߍ߲ ߡߊ߬߸ ߓߐ߬ߟߐ߲߬ߝߐ߬ߟߊ ߟߎ߬ ߣߌ߫ ߗߍ߬ߞߎ߲ (ߛߏߡߊ) ߟߎ߬ ߓߟߏ߫ ߢߊ ߡߍ߲ ߡߊ߬߸ ߊ߬ ߣߌ߫ ߘߏ߫ ߜߘߍ߫ ߟߎ߫.
ߦߟߌߡߊߛߙߋ ߟߎ߬
This article uses material from the Wikipedia ߒߞߏ article ߛߣߍ߬ߖߋߟߌ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ߞߣߐߘߐ ߦߋ߫ CC BY-SA 4.0 ߟߊ߫ ߓߌ߬ߟߊ ߟߋ߬ ߘߐ߫߸ ߝߴߊ߬ ߛߌ߬ߣߊ߬ߦߊ߫ ߢߊߝߐߟߌ ߘߋ߬. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ߒߞߏ (DUHOCTRUNGQUOC.VN) is an independent company and has no affiliation with Wiki Foundation.