Ya'ahowu
Ya'ahowu, ya'iada'ö fehede fangowai na falukha ba nono niha, gofu ha niha, gofu ha mega, ba gofu heza (hezo, hendre, haega) manö alua.
Fanema li wangowai da'ö ba fagölö ira li fangowai, tewa'ö göi: Ya'ahowu! Na no fagema li wangowai simanö ba teboka sa'ae lala ba wamahatö tödö ma eraera ba wanguhuo'ö ma ba wamatunö ngawalö hadia ia zotuho.
Eluaha Ya'ahowu
Ya'ahowu, fangowai ba Li Nono Niha ni oguna'ö Sundermann ba wo'ali Buku Ni'amoni'ö, tehalö moroi ba ngawua wehede ''ehowu'' (Li Indonesia, subur), ''ya ehowu'' (semoga subur), tobali ''ya'ahowu'' (diberkatilah, damailah). Eluaha wangowai andrö ba fakhai ia ba zura Ni'amoni'ö sanandrösa ba wehede Yesu me'ifahaö niha sato. Ösi wamahaö andrö ba mame'e fa'aboto ba dödö ba i'anemai'ö göi mo'ösi ia fame'e howu-howu khö ndra nifahaö-Nia. Tola tefaigi da'e ba Matai'o faza 5 simane ba ayati 3, ”Ya'ahowu zi numana tödö, me khöra mbanua zorugo andrö”; ma zui ba ayati 4, “Ya'ahowu zebolo tödö, me ya'ira zokhö ulidanö dania (4)” btn. Andrö börö da'ö tola teŵa'ö na te'owai niha ba wehede Ya'ahowu no a'i fagölö ira na tefahowu'ö ma zui te'andrö ena'ö ifahowu'ö so'aya niha ni'owai andrö.
Tola muŵa'ö wa fangowai Ya'ahowu andrö ba abölö abakha geluahania moroi ba wangowai tanöbö'ö simane selamat pagi ba Li Indonesia. Lö teba'a ba lö göi iba'agö zi samösa niha khö niha bö'ö ba wamake ya'ia. Tola manö mufake ba niha gofu hadia wetaronia ba hada, ba agama, ma zui ba wamareta. Samösa iraöno, si lö sikola, ma si lö fa'atua-tua ba tola lafake wangowai da'ö na la'owai zalaŵa, camat, bupati, fandrita, satua mbanua, btn.
Mangalui Niha ba gotalua zato
Na ba danö wekoli so nono Niha ba asese te'oguna'ö wehede andrö sitobali lala wamareso hadia so nono Niha tanöbö'ö sahatö ba zi so ia. Na so samösa ba gotalua zato ba nalö i'ila hadia so nono Niha bö'ö ba da'ö ba tola manö ifazaumba wehede ya'ahowu ba dalumbanua simane na i'owai niha sito'ölö. Ba naso zanema fangowai andrö ma so zi tokea ma so zamaigi ya'ia töra-töra na itete fanofu hadia ya'ia ni'owai ba Li Niha ba tatu manö i'ila wa so nono Niha ba zi so ia.
Fangalui ono Niha ba gotalua zato tenga sa ha fehede Ya,ahowu. Tola manö göi mutötöi wehede li Niha tanöbö'ö. Sito'ölö nia na irongo li Niha ono Niha ba i'anemai'ö ifakhölö ia wangalui heza so niha sihede.
Umbu
This article uses material from the Wikipedia Li Niha article Ya'ahowu, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Konten tersedia di bawah CC BY-SA 4.0 kecuali dinyatakan lain. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Li Niha (DUHOCTRUNGQUOC.VN) is an independent company and has no affiliation with Wiki Foundation.