Ba Danö Niha no sambua soi si so ba gaekhula hulo Sumatra, sino tehöngö wa abe'e huku hada sino larorogö ira ono mbanuania.
Huku hada andre, lamane ba gamaedola ba da'ö : "Hönö mböwö no awai, hönö mböwö no tosai" eluahania wa'oya hada nifalua ba wa'auri sero ma'ökhö dozi niha si so ba Danö Niha. Ba wongambatö ba no lafazaumba wangombakha hadia manö zilö tola lö'ö lafalua dozi sifakhai ma samalua fongambatö. Bosi lala nitörö tenga somasi dödö wamalua ya'ia no oi so goi-goi sifaoma la'ila dozi sifakhai ba wabanuasa. Hiza dozi ono niha he si so ba danö wangarato ba yamendrua sa'ae zitoröi ba Danö Niha, no labe'e ba mbörö dödöra fefu goi-goi da'ö. Simane folöwö ma halöŵöa sanandrösa fe'amöi ba zitenga bö'ö. Molöŵö ya'ia da'ö fasumangeta ba zitenga bö'ö, hewisa lala wamalua ya'ia, tola te'ila ba da'a tou :
Molöwö, no huku sisökhi nifalua ndra satua meföna ba tobali ia duma-duma ondröita ndra satua ba ndraono sibohou ebua ma'ökhö, ba wamalua halöwö sisökhi ba wongambatö, ba wamakhai sitenga bö'ö, ba fa'ahatö ba khö zifatalifusö. Ono mbene'ö, namöi ira ba nomo ndra sibayara/Uwu börö danö-tanö, ba tenga simöi manörö sito'ölö, la'ohe mbua dangara, simane löwö-löwö sino la fa'anö bakha nösi nia, ba wanga'i howu-howu moroi khö zibaya ba sitobali fasumangeta khö zokhö ya'ira, lamane: "Lö tumbu gawöni na lö tanö".
Löwö-löwö ni'ohe khö ndra sitenga bö'ö ya'ia da'ö, so wakhe, so mbawi sino asoso ba sito'ölönia so nawö simane fangaukhu ba wa'okafu, la'ohe berendri ma tanö bö'önia sifagölö, ba la faehagö, wa tani wa'atohare, ba wangandrö howu-howu zibaya. Da'a lafalua simane fongambatö sino ara lönasa manuge khöra niha. Ba hiza la tema'ö sifao fa'omuso dödö ira sibaya. Fefu ni'ohe ba wolöwö no sambua fasumangeta
Meno awai latema'ö löwö-löwö ni'ohe nono mbene'ö, ba no aefa fefu wahuhuosa, no aefa lalau manga afo sino la'ohe sifao ba löwö-löwö ni'ohera, ba ia da'a, sibayara lafaigi nono mbawi si'öna-öna ba lataba diwora, ba omuso dödöra, lalau manga ma'afefu. Aefa da'ö ba amena ofeta ba wurugö wa'owulora ya'ia ba wamalua fanefe idanö ba wame'e howu-howu khö nono mbene'ö, la be'e nidanö ba wiga sabu, ba la be'e wirö (naso) ba amena ono mbene'ö ibe'e mato ma'ifu garate sekhe-sekhe wanefe idanö, ena'ö mosöfu howu-howu moroi khö zibaya. Möi föna ndra ono mbene'ö ba ibörögö sibaya lala halöŵö, ösinia ya sanöndra fatolosa Zo'aya nono mbene'öra andre, ya okafu-kafu hulö gumbu nidanö. Meno awai fefu, halöŵö wamahowu'ö ba awai sa'ae halöŵö, ba lahalö manu, bawi labe'e khö nono mbene'öra sitobali famatunö ba zatua baomo ba nirugira dania.
Meno mangawuli ira, ba owulo ira ba nomo, lafahulö ira ösi nomo, ba wamahulö hadia nösi ni'odörara ba la'ombakha'ö khö zatua, hadia manö masi-masi moroi khö zibaya. Lasao'ö khö zatua, ba labörögö wo föfögö ba wame'e ni'odöra ba zifaola omo, sisara ewali ba wangombakha wa no mangawuli ndraono moroi molöwö ba khöra sibaya. Masi-masi zibaya simane manu, ma ono mbawi, lö sa'ae labagi da'ö ba zifaola omo, ha sasoso zitobali fegero. No tefalua hada nono niha da'a iroi meföna.
This article uses material from the Wikipedia Li Niha article Molöwö, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Konten tersedia di bawah CC BY-SA 4.0 kecuali dinyatakan lain. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Li Niha (DUHOCTRUNGQUOC.VN) is an independent company and has no affiliation with Wiki Foundation.