Wümmgrund

Wapen/Flagg	Koort
Basisdaten
Bundsland: Neddersassen Landkreis: Horborg Samtgemeen: Töst Gemeen: Otter
Inwahners:
Postleettall:	21259
Vörwahl:	04180
Geograafsche Laag:	53° 13′ N, 9° 43′ O

Wümmgrund (hoochdüütsch Wümmegrund) is en lütten Oort in de Gemeen Otter (Samtgemeen Töst) in’n Landkreis Horborg, Neddersassen.

Wümmgrund liggt an dat linke Över von de Wümm.

De Naveröörd sünd Schillingsbossel, Otter, Kamp un Haßel in’n Noordoosten, Lütt un Groot Todtshorn in’n Oosten, Wessloh un Schiel in’n Süüdoosten, Host in’n Süden, Stell in’n Westen un Königsmoor, Dreehusen un Riepshoff in’n Noordwesten.

De Hööv in’n Wümmgrund sünd eerst in dat 20. Johrhunnert anleggt worrn. 1958 hett de Familie Bliwernitz en Hoff mit 24 Hektar Land von de Neddersassische Landsellschop övernahmen. 1990 Hett Günter Bliwernitz senior den Hoff an sien Söhn övergeven. 1996 is en Boxenloopstall mit 100 Boxen boot worrn. 2008 hett de Hoff en Photovoltaikanlaag kregen un 2009 en Biogasanlaag, de 2011 op 570 KW utboot worrn is. In dat Johr is ok de Stall op 220 Plätz vergröttert worrn. 2012 hett Arne Bliwernitz den Hoff övernahmen.

Verwaltungsgeschicht

De Oort is an’n 1. Juli 1972 as Deel von de Gemeen Otter mit de Gemeenreform in Neddersassen an de nu gröttere Gemeen Otter kamen.

Religion

Wümmgrund is evangeelsch-luthersch präägt un höört to dat Kaspel von de Johannes-de-Döper-Kark in Töst.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Verkehr

Dör Wümmgrund löppt de Kreisstraat 23, de in’n Noordwesten na Königsmoor un in Wümm an de Bundsstraat 75 ran geiht un in’n Süüdoosten na’n Landkreis Heidkreis. Dor geiht se as K 31 wieder un geiht över Host, Wessloh un Issell na Snevern. Von de K 23 geiht na Noordoosten de K 41 af, de na Otter löppt un dor an de Landsstraat 141 ran geiht. Över de L 141 kummt een na Töst.

De nächste Autobahn is de Autobahn 1. De Opfohrt 46 Heidenau liggt so 18 Kilometer in’n Noordwesten von Wümmgrund an de K 15 un de Opfohrt 45 Hullnst liggt so 18 Kilometer in’n Noorden an de L 141.

De nächste Bahnhoff is so bi söven Kilometer wied weg in’n Noorden de Bahnhoff Töst an de Bahnlien Hamborg–Bremen.

Scholen

De Kinner ut Wümmgrund gaht na de Grundschool Otter op School. Na de Grundschool gaht de Kinner normalerwies in Töst na School, op de Hauptschool Töst, de Realschool Töst oder dat Gymnasium Töst.