Ramon Cervantes

(* 18. Juli 1942 in San Antonio; † wohrschienlich 2. Juli 2014 in’n Distrikt Orange Walk) weer en Politiker ut Belize (PUP).

Cervantes is 1942 in San Antonio as Söhn von Florencia Madera Cervantes un Benedicto Cervantes boren. Dor weer he ok op de Grundschool, bevör he op dat Muffles College in Orange Walk wesselt is. Dat Muffles College hett he 1962 afslaten. He weer na düsse Tied 35 Johr lang Schoolmeester un Rekter. 1976 hett he en Studium an de St. Francis Xavier University in Kanada anfungen un weer later ok an de Murray University in Schottland. Blangento weer he Farmer un hett en Farm an de Straat twüschen Orange Walk un San Roman bedreven.

Cervantes hett von 1984 bet 1989 för de PUP in’n Senaat von Belize seten un weer von 1989 bet 1991 Börgermeester von Orange Walk.Bi de Wahl to’n Stadtraad von Orange Walk 1991 hett de UDP all söven Seten wunnen un Cervantes müss sien Amt wedder afgeven. He harr ok dat Amt as Justice of the Peace.

Cervantes weer bi de Parlamentswahl in Belize 1984 Kannedaat för de People’s United Party (PUP) in’n Wahlkreis Orange Walk Oost. He hett 38,5 % von de Stimmen kregen un dormit gegen Elodio Aragon Senior von de UDP verloren. Ok bi de Wahlen 1989 un 1993 weer he in’n sülven Wahlkreis wedder Kannedaat un hett 1989 mit 44,2 % un 1993 mit 46,4 % gegen Aragon verloren.

An’n 1. Juli 2014 sünd Lüüd op Cervantes sien Farm indrungen un hebbt em entführt. Cervantes weer jüst op en Zuckerrohrfeld togang. De Familie harr na sien Verswinnen aver noch bet to’n 2. Juli Telefoonkuntakt. An’n 5. Juli is sien Liek inkuhlt op en Farmgelänn an de Straat na Honey Camp funnen worrn. De Möörder is von de Polizei as Manuel Castillo identifizeert worrn, de sietdem op de Flucht is. Castillo hett an’n 8. Oktober 2014 Cervantes sien Weetfro anropen, de Schuld von sik wiest un Personen ut Politik un Polizei verantwoortlich maakt. Manuel Castillo schall ok Sonia Maribel Abac ümbrocht hebben, de an’n 23. April 2014 in Orange Walk verswunnen weer.

Ramon Cervantes is na sien Dood op en Karkhoff in Orange Walk begraven worrn.

He weer verheiraadt mit Vilma Cervantes. He harr veer Kinner. Sien Söhn Ramon „Monchi“ Cervantes Jr. weer 2015 Kannedaat in’n Wahlkreis Orange Walk Noord.

In’n September 2014 hett Cervantes postum den Order of Distinction kregen.