Marnie is de Titel vun en US-amerikaanschen Thriller mit psycholoogsche Elementen vun Alfred Hitchcock ut dat Johr 1964.
Filmdaten | |
---|---|
Plattdüütsch Titel: | — |
Originaltitel: | Marnie |
Düütsch Titel: | Marnie |
Produkschoonsland: | USA |
Johr vun’t Rutkamen: | 1964 |
Läng: | 124 Minuten |
Originalspraak: | Engelsch |
Öllersfreegaav in Düütschland: | FSK 16 |
Filmkru | |
Speelbaas: | Alfred Hitchcock |
Dreihbook: | Jay Presson Allen |
Produkschoon: | Alfred Hitchcock |
Musik: | Bernard Herrmann |
Kamera: | Robert Burks |
Snitt: | George Tomasini |
Szenenbild: | Robert F. Boyle |
Kledaasch: | Edith Head |
Dorstellers | |
|
Dat Dreihbook baseert op den gliek nöömten Roman vun Winston Graham. De Hööftrullen hebbt Tippi Hedren un Sean Connery speelt.
De smucke junge Fro Marnie Edgar is Kleptomanin, de sik as Sekretärin in Ünnernehmen instellen lett, üm dor denn Geld to roven. Anners sütt dat ut, wenn se ehr Mudder besöcht: denn is se in sik kehrt un warrt vun starke Emotschonen mitreten un is sogor ieversüchtig gegenöver de lütt Jessi, de sik faken bi ehr Mudder ophollt. Nadem se in’t Ünnernehmen vun Mr. Strutt 10.000 US-Dollar klaut hett, söcht se sik en ne’e Steed in den Verlag vun Mr. Rutland. Rutland hett sülvst fakener mit Strutt to doon hatt un kennt Marnie wedder, ofschoonst se ehr Hoor un Kledaasch ännert hett. He sorgt dorför, dat se instellt warrt, un wiest ok buten de Arbeit Intresse an ehr.
Liekers roovt se een Dag ok Geld ut’n Safe vun Rutland sien Verlag. Mr. Rutland hett ehr aver al lang op’n Kieker un stellt ehr. Man, ansteed dat he de Polizei Bescheed gifft, will he rutfinnen, wat ehr to dat krankhafte Roven andrieven deit. He sett ehr ünner Druck, em to heiraden, wat se ok annehmen deit, üm nich bestraaft to warrn. Gau wiest sik aver, dat Marnie koolt un afwiesen is. Wohrhaftig versöcht se sogor sik sülvst ümtobringen, üm sik ut den Dwang vun de Eh to befre’en. De Ümgang mit Mannslüüd is ehr vun Huus ut jümmer utsnackt worrn, siet se en lütt Kind weer.
Na un na finnt Rutland rut, dat Marnie op männige Oort un Wies bang is. So is se düchtig bang vör Gewidder un jüst so vör de Klöör Root. Butendem kann se op’n Doot nich lieden, wenn se vun Mannslüüd anröhrt warrt. Eerst an’t Enn vun’n Film finnt Rutland rut, wat mit Marnie passeert is: As se noch en lütt Kind weer, hett ehr Mudder as Hoor arbeit. In een Gewiddernacht wull een vun de Free’ers vun ehr Mudder Marnie begööschen. Dat hett de Mudder aver verkehrt verstahn. Se hett dacht, de Seemann wull sik an ehr Dochter vergriepen un hett den Kerl in den Gloven an Nootwehr daalslahn. Marnie sülvst hett den Seemann dootslahn – dorher de Angst vör de Klöör Root. All dat kummt in’t Huus vun Marnie ehr Mudder rut. Dorna schient se langsom mit de Eh mit Rutland inverstahn to wesen un geiht tosamen mit em ut dat Huus vun ehr Mudder. To’n letzten mol is de Haven in’n Achtergrund to sehn – as Teken för de Prostitutschoon vun ehr Mudder, de sik dormols vör allen an de Seelüüd verköfft hett – ditmol aver bi opkloren Weder.
Anners as de Vörlöper The Birds weer Marnie keen groten Spood, steiht aver in Hitchcock sien Bestreven as Auteur ansehn to warrn. De Kritikers argern sik över de olle Psychologie vun den Film un över de dormols al unmoderne Tricktechnik (to’n Bispeel is in de Havenstraat, woneem Marnie ehr Mudder wahnt, en groot Schipp to sehn, dat ahn grote Möh as en opmahlt 2D-Bild to kennen is). De Gööd vun den Film is eerst later faststellt worrn.
Donald Spoto schrifft in sien Biografie över Hitchcock, dat Marnie Johren later en intime un snaaksche Kraft harr antotehn,wat in Hitchcock sien Wark eenzigordig is. Dat Fehlen vun Struktur un de meist halluzinatoorsche Substanz vun den Film geev den Tokieker de Mööglichkeit, sik in de pieren Emotschonen intoföhlen. In’n Ünnersched to sien annern Warken wies de Film en apen Verlangen na Leef.
De Film sülvst is nich mit Filmpriesen uttekent owrrn. Man, in’t Johr 2005 weer de DVD-Produkschoon The Masterpiece Collection för en Satellite Award vörslahn.
As in vele vun sien Filmen, hett Hitchcock ok in Marnie en Cameo-Optritt. Man sütt em teemlich to Anfang na ruchweg fief Minuuten, as he ut en Hotelkamer kummt un dör en Flur geiht.
This article uses material from the Wikipedia Plattdüütsch article Marnie (1964), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Der Inhalt ist verfügbar unter CC BY-SA 4.0, sofern nicht anders angegeben. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Plattdüütsch (DUHOCTRUNGQUOC.VN) is an independent company and has no affiliation with Wiki Foundation.