Marnie
C'l artìcul chè 'l è scrit in Miranduléś
Miranduléś Marnie | ||
 Connery e la Tippi Hedren in na figùra dal film | ||
| id. 1964 | ||
|---|---|---|
| Regìa: Alfred Hitchcock | ||
| Scritōr: Winston Graham • Jay Presson Allen | ||
| Atōr: Tippi Hedren • Sean Connery • Diane Baker Louise Latham • Bob Sweeney • Alan Napier Bruce Dern • Mariette Hartley • Martin Gabel | ||
| Müsica: Bernard Herrmann | ||
| Léngua: Ingléś | ||
| Dürä dal film: 130 minüt | ||
| Nasiōṅ: Stat Unî | ||
Marnie (id.) 'l è 'n film dramàtic dal 1964 'd Alfred Hitchcock trat da 'n rumànś ad Winston Graham.
Par la part dla Marnie, Hitchcock 'l iva pinsâ a dmandàr a la Grace Kelly, dvintàda in cal mèntar la mujér ad Ranieri III ad Mònag, ad turnàr a recitàr par lò, ma 'l sò pòpul al n vliva minga che lē la faghìs la part dna ladra e alóra a n s 'n è fat gnint. Cun la Tippi Hedren, ch'l'iva péna recitâ sèg in Gli uccelli, al ròbi però i n èṅ mia stadi fàcili, a pâr che Alfred al fus inamurâ 'd lē e ch'al vlis far-ag far sèmpar qvél ch'al vliva lò, tant che i n s dascurìvan gnanc, a gh vliva sèmpar òṅ in mèś.
Dòp tant an ad sucès, cal film chè 'l è stâ a i sò tèmp dimóndi cuntestâ da i crìtic anc s'l à pò purtâ a cà sèt migliòṅ ad dòlar a frónt 'd un cóst ad tri.
In dal sò lìbar Al cìnema secónd Hitchcock, François Truffaut al 'l à batśâ cuma „òṅ ad chi gran film malâ“.
Sunt
La Marnie Edgar (Tippi Hedren) l'è na śóvna ch'la gh'à di prubléma in dla tèsta par via 'd un brut quèl ch'a gh'éra capitâ quànd l'éra pìcula e ch'a l'à traumatiśàda. Chi lē, bèla e elegànta ma anc buśiàrda e ladra, la s fà tōr a lauràr da di aśiéndi par pò rubàr-ag dèntar e sparìr via. Fra 'n cōlp e c'l àtar, la s tinś anc i cavìi e pò la tórna da sò màdar Bernice (Louise Latham), ch'la gh stà sèmp'r adòs.
Dòp avér-la bèla 'duciàda na vòlta quànd la fava la segretària da 'n sò amìg in di afâr, e la gh piaśìva dimóndi, 'l industriàl Mark Rutland (Sean Connery) al la véd incóra in di sò ufìsi parchè lē la s éra fata asùmar anc lè. Dòp avér tòlt śò i nùmar dla cumbinasiòṅ dla casafòrt, lì lē la śgranfgna i bèsi ch'i gh'éran dèntar. Mark, ch'al sà incòsa ma ch'al la vōl anc tōr par mujér, al la cata in un manéś in dua lò al tgniva al sò cavàl Florio. Prima ch'la psis scapàr via, lò al gh prumét ch'al pagarà da la sò bisàca tut i furt vèć a 'l sò pòst, sénsa far denùnsia, però lē la gh'à da spuśàr-al. La Marnie la gh diś ad sè.
La prima nòt dòp al spuśalìsi, quànd lò al próa a cavàr-la śò e a tucàr-la c'n al sò maṅ, chi lē la s para via in un cantòṅ parchè la gh'à scarésa di óm.
Culegamènt estéran
This article uses material from the Wikipedia Emiliàn e rumagnòl article Marnie, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contenuto è disponibile in base alla licenza CC BY-SA 4.0, se non diversamente specificato. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Emiliàn e rumagnòl (DUHOCTRUNGQUOC.VN) is an independent company and has no affiliation with Wiki Foundation.