Borgdamm

Wapen/Flagg	Koort
Basisdaten
Bundsland: Bremen Gemeen: Bremen Stadtdeel: Borgleessem
Flach:	4,17 km²
Inwahners:	10.943 (2009-00-002009)
Inwahnerdicht:	2.624,2 Inwahners pro km²
Postleettall:	28717, 28719
Vörwahl:	0421
Geograafsche Laag:	53° 10′ N, 8° 43′ O
Grenzen bi OSM:	1112214

Borgdamm (hoochdüütsch Burgdamm) is en Oortsdeel in’n Stadtdeel Borgleessem in Bremen.

De Oort liggt op’n Rand von de Oosterholter Geest (Bremer Swiez) hen na de Maschen an de Leessem. Dat Water ut dat Rebeed flütt över Gravens un de Ihl na de Leessem af.

De Öörd ümto sünd Ihlpohl in’n Noorden, Hu’e in’n Noordoosten, Waterhorst in’n Süüdoosten, Borg un Grambkermoor in’n Süden un Leessem in’n Westen.

Borgdamm geiht trügg op de Brügg över de Leessem un den Damm, de de Stadt Bremen 1388 hett anleggen laten.

Verwaltungsgeschicht

In de Franzosentied von 1810 bet 1814 hett de Oort to de Mairie Leessem in’n Kanton Vesack höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Dammvaagdie Borgdamm von dat Amt Oosterholt tohöört. 1852 hett dat Amt Oosterholt de Gemeen Borgdamm an dat Amt Leessem afgeven, dat 1859 al wedder oplööst worrn is un an dat Amt Blomendal keem. Na 1885 weer dat in’n Kreis Blomendal. 1932 is dat Deel von’n Kreis Oosterholt worrn.

De Oort is to’n 1. Juni 1936 Deel von de Gemeen Leessem worrn. Leessem is denn 1939 Deel von de Stadt Bremen worrn.

Inwahnertall

Vörborgdamm:

Religion

Borgdamm is evangeelsch-luthersch präägt un höört to dat Kaspel von de Martin-Kark in Leessem.

För de Kathoolschen is de St.-Birgitta-Kark in Marßel tostännig, de siet 1. September 2012 to de Karkengemeen von de Hillige Familie in Oosterholt-Scharmbeek höört. Bevör de St.-Birgitta-Kark 1972 boot worrn is, hett Borgdamm to de Gemeen von de St.-Peter-un-Paul-Kark in Leessem höört, de dat siet 1965 geven harr. Noch fröher hett dat Rebeed to de Gemeen von de St.-Marien-Kark in Blomendal tohöört.

En Denkmaal för de Fullenen ut de twee Weltkrieg’ steiht in Leessem bi de Kark.

Verenen

De Schüttenvereen Leessem-Borgdamm is 1842 grünnt worrn.

Borgdamm hett en egene freewillige Füürwehr. De Sprüttenverband Borgdamm is an’n 30. Januar 1895 grünnt worrn. Ut den Verband is later de Füürwehr worrn.

Verkehr

De Opfohrt 16 Bremen-Noord op de Autobahn 27/270 liggt an’n Noordrand von Borgdamm an de B 74.

De Oort hett mit’n Bahnhoff Borg en egen Bahnhoff an de Bahnlienen Bremen–Bremerhoben un Vesack–Bremen. De Bahnhoff liggt ganz an’n Süüdrand von’n Oortsdeel.