Riessens Härtjen

t Härtjen is skoonwal in de wiede umtrek bekeand en word met doezenden verkocht in umlignde plaatsen. Iederen bakker hef een egen recept.

De Riessense Härtjes wordt in dree gröttes verkocht: groot (ongevear 25 x 25 cm), middel (ongevear 10 x 10 cm) en klein (as petit-four of vingerhäpken, 4 x 4 cm)

In t Duutse Ulm wörd al in 1296 vuur t eerste de zogenaamde Labkuchen in de beuke neumd, nen soort kookn wat dr stoark op lik. In Duutslaand is n spekulaaskookn ook wal bekeand as Lebkuchen, Pfefferkuchen en Lebenskuchen. Doar wordt ze völle um de karstdeage getn. Per strekke zut n pepperkookn dr wier aanders oet. In Beiern doot ze dr vake nötn oawerhen, en in aandere strekn völle sukela.

In 1881 kömn de bakkersbreurs Johannes en Lodewiek Tharner noar Riessen en nömn de bakkerieje oawer van Ro-Jan Kienhuis. Öar vaa was half 19de joarhoonderd vanoet Osnabrück noar Deanekaamp ekömn. De vaa köm al met 44 joar oet de tied, woernoa't de bakkersweenkel in Deanekaamp wör op eheewn. De breurs begunn met t härtjen roond de Sunterkloastied in te voorn, woerbie't de härtvorm t "Gulle härt van Sunterkloas" mos vuursteln.

Ne aandere verkloaring vuur t härtjen kan wean at Johannes verkearing kreeg met Hendrika Siemerink oet Riessen. In Duutslaand was t gebroekelik um n pepperkookn an oew meakn te geewn, versierd met leentn, strikn of sprökn.

Umdat et zo'n populaer häpken is en altied good verkocht wördt, maakt een poar Riessender bakkers rechtevoord rond Poasken ook een Riessens Ei. Feitelik een härtjen, mär dan in ei-vörm.