Concetta Barra

Nata a Proceta, addò nce ha campato pe' paricchie anne e addò è cunziderata 'a cantante ufficiale 'e l'isola.

Concetta Barra, mamma 'e n'atu cantante napulitano, Peppe Barra, pure isso assaje famose, è 'a cantante napulitana ca ha avuto l'abbilità, 'a capacità e l'esperienza pe' sape' ghì a scavà e fa resuscità tutto 'o repertorio musecale popolare antico.

'A carriera e 'a storia soja 'e cantante, accuminciaie ambresso, quanno teneva quase vinte anne, durante 'o periodo d’’a siconna guèrra munniale. Fuje proprio dinte a chilli anne ca essa, nzieme cu 'e sore Nella e Maria, funnaje 'a cumpagnia Vittoria, facennese subbeto canoscere p’’a bravura soja. Proprio 'a llà pigliaje 'o vuolo e fuje scritturata da 'e meglio cumpagnie 'e varietà ca esistevano a l'epuca, 'e cumpagnie 'e Totò, Aldo Fabrizi, Alberto Sordi e tante ate. 'A fine d’’a sicunna guerra munniale, se spusaie cu Giulio Barra, pure isso nu bravo artiste 'e triatro e varietà. Avette 'o primmo figlio e 'o mettette nomme Giuseppe (Peppe), e doppo poco tiempo d’’a nasceta d’’ o criaturo, decidette 'e lassà 'o spettaculo e se ritiraie da 'e scene. Nce turnaie però n'ata vota, 'o 1970, cu nu repertorio nuovo e criaie nu spettaculo addò se faceva accumpagnà da 'o figlio Gabriele cu 'a chitarra, accuminciaie a fa scuprì e canoscere a 'o pubbleco, 'e canzone popolare antiche. Doppo poco tiempo avette 'a fortuna 'e canoscere e piacè, comme artista, a nu perzunaggio 'mpurtante d’’a museca napulitana: Roberto De Simone, ca 'a pigliaie a benvolè e nce dette l'occasione, 'e cunziglie e 'a pussibilità e se fa canoscere meglio e fuje accussì ca avette 'a cunsacrazzione ufficiale e addeventaje 'a cchiù famosa cantante popolare napulitana.

Concetta Barra reggistraje paricchie dische 'e canzone e partecipaie a paricchie spettacule musecale, pure p’’a radio e p’’a televisione. Se ricordano assaje 'e partecipazzione soje ca facette cu 'a Nuova Compagnia di Canto Popolare, addò nce faceva parte pure 'o figlio Peppe. Proprio cu isso funnaje 'a cumpagnia Peppe & Concetta Barra, avenno nu granne successo sia essa ca 'o figlio e facennese canoscere sia pe' tutta l'Italia ca a l'estero. 'E titule de' spettacule cchiù famose ca se ricordano so':

• Peppe & Barra
• Senza mani e senza piedi
• Sempre sì
• La festa del principe