Ariel Sharon: Puliteco e Melitare Israeliano

Sharon facette tutta na vita 'e melitare e po', a carriera fatta, se mpizzaje int''a puliteca 'e ll'Israele. 'E giovane, facette parte 'e ll'organizzazione paramelitare Haganah. Partecipaje int''a guerra d''e sei juorne, int''o 1967.

'O màrzo 'e 2001 fuje scigliuto primmo menisto 'e ll'Israele. Sharon fuje uno d''e pulitece storice d''o Likud; 'o 21 'e nuvembre 'e 2005 lassaje stu partito e funnaje 'o Kadima.

Fuje nommenato comme corpevole d''e macielle 'e Sabra e Shatila, int'ô Libbano, e fosse stato judecato pe sta causa, aizata d''e pariente ammazzate int'a stu maciello, si nun fosse ca int'ô Belge cagnajeno 'a legge, ca tanno nun permetteva miettere npruciesso cettadine si nun erano belge.

'O 4 'e jennaro d''o 2006 sofferette na murraggia cirvellare e fuje dichiarato incapace temporalmente p'esercità 'e putere suoje, 'o vice-primmo menisto Ehud Olmert, pigliaje 'o posto suojo 'o 14 'e abbrile.

'O 18 'e dicembre d''o 2005, s'ammalette pe' nu nfarto cirvellare piccerillo. Aroppo ddoje juorne già s'arrepigliaje, e cu nu poch'e cuntrollo d''e miedece turnaje a 'e fatiche soje. 'O 4 'e jennaro d''o 2006, sulamente nu poco doppo ca s'abbuccaje 'a primma vota, Sharon sofferette na murraggia cchiù grave ancora, pe tramente ca s'arripusava int'â casa soja ncopp''o Deserto d''o Neguev. Fuje trattato d''e duttore int'a ll'Ospedale Ha-Dasah d''a cettà 'e Gierosalemme. 'A tanno, Sharon rummanette ncoma prufunno. Murette ll'unnece 'e jennaro a Ramat Gan.