گیلک

مورخین گننه گیلکون اول داغستون دله بینه و بعد به سپیدرود غرب کوچ هاکردنه و کادوسیون (اسلاف تالش) جا همسایه بَوینه. گیلکونه قدیمه دله گیل گتنه که شرق جا دیلم و غرب جا تالش همسایه بینه و وشونه سرزمین هوسم (رودسر) تا فومن بیه. عنایت الله رضا گننه یاقوت حموی بوته که گیل و موقان قوم نینه بلکه یتا آدم طبرستونی بینه که طبرستون دله ساکن بینه. منوچهر ستوده گننه گیلک یتا طایفه طبری هسه که مازرون دله منطقه زوار نشتارود درنه. گیل و گیلک، طبری زوونه دله کشاورز ره معنی دنه. خودزکو گننه گیل، گیلکون زوونه دله گِل ره معنی دنه. رابینو گننه گیلکون طاعون دله از بین بوردنه و طبریون (مازرونیون) و قفقازیون وشونه جا ره بیتنه. کتاب طرائف المقال دله بیموئه گیلکون یتا تیره قوم طبری جا هسنه و کتاب دله بیموئه که مازرون مردم و گیلون مردم طبری هسنه.