Rakik Maco

Rakik maco adolah makanan nan biasonyo dimakan sabagai lauk katiko mamakan nasi dan juo dapek dimakan langsuang. Bahan utamo dari rakik maco ko iolah maco. Maco tasabuik marupoan namo dari sajinih ikan aia lauik nan alah dikariangkan. Rakik maco dibuek dari tapuang nan diagiah bumbu tertentu dan ditangahnyo dilatak an ikan maco. Rakik maco ko sangaik mura dicari tarutamo di kadai-kadai nasi, tampek oleh-oleh, atau juo di tampek-tampek wisata.

Untuak tahap patamo mambuek rakik maco, labiah dahulu ikan maco nan alah disiap an dibersiah an jo ayia, siap tu tiriskan. Alah tu, tapuang bareh, tapuang tarigu nan alah diagiah ayia sacukuiknyo, daun kunyit, bawang putiah, lado giliang, garam, dan pelamak raso diaduak sampai rato.

Sasudah sadonyo menyatu, masuak an ikan maco, dan ulang lo diaduak. Saat proses iko, pastian ikan maco batua-batua alah manyatu jo adonan nan lain. Alah tu, angek an minyak goreng, lalu ambiak adonan manggunokan cetakan atau sendok, alah tu goreng sampai masak.

Api nan digunoan untuak mamasak jan gadang bana supayo rakik maco indak anguih. Kalau adonan alah mangapuang di ateh minyak, angkek rakik maco, alah tu tiriskan, dan siap disajikan.