Surek Kaba Banteng

Surek kaba Banteng tabik patamo kali pado tanggal 15 Januari 1933 di Jakarta nan dikelola khusus dek komisi Pers Partindo. Partindo surang lahia pado tanggal 31 April 1932 nan manjadi sajarah baru bagi gerakan nasionalis di Indonesia. Macam-macam usaho untuak mandapekan hati rakyat dikarajoan, salah satunyo jo surek kaba. Surek Kaba Banteng baalamaik di Jalan Kenari no.2 jo pimpinan redaksi Amir Sjarifuddin. Banteng diharokan mampu manyeruduk massa, tembus ka hati rakyat, jo basatu dalam ciek komando untuak mancapai Indonesia Merdeka.

Sajak dulu, Amir Sjarifuddin dikana dakek jo Soekarno, tokoh utamo Partai Nasional Indonesia (PNI). Walau indak anak didiak HOS Tjokroaminoto, Amir Sjarifuddin dakek jo Soekarno samanjak tingga di Surabaya. Beliau nan lahia pado 27 April 1907 ko aktif dalam manyuarokan ide-ide nan bapihak ka kaum buruh jo rakyat bawah. Indak surang, Amir Sjarifuddin tagak basamo Mr. Sartono, nan marupokan Putera Medan, Sumatera, nan ikuik bakacimpuang di dunia media massa lewat surek kaba Banteng.

Filosofi

Banteng dipiliah manjadi namo surek kaba ko dek alah manjadi simbol jo filosofi kaum-kaum nasionalis. Samanjak PNI tagak pado 4 Juli 1927, Banteng alah manjadi lambang gagah jo bagak. Hal sarupo itu alah ditutuakan lo di dalam salam pembuka redaksi pado tanggal 15 Januari 1933. Labiah lanjuik, Banteng indak hanyo dicaliak dari gagah jo bagak nyo, tapi ado makna lain nan manuruik Amir Sjarifuddin sasuai jo konteks zaman wakatu itu.

"Banteng punyo sifaik kabangsaan radikal, nan manyokong pergerakan bangsa nan paliang kiri untuak sampai ka 100% kemerdekaan Indonesia. Banteng ndak tantu jo tawar-menawar, ndak lo amuah karajo samo jo pihak mano pun, tamasuak pihak imperialis. Banteng 100% badasarkan kerakyatan dan ibaraik lapeh dari kandangnyo untuak mambangunan samangaik kebangsaan", sabagaimano nan tatulih di dalam awal tabiknyo surek kaba Banteng.

Banteng marupokan panyamangaik nan paliang garang jo bagak di muko. Basamo Banteng, sagalo tuduhan, kacaman, atau komentar nan dilontakan dek PNI Baru punyo Hatta jo Sjahrir dapek dipatahan. Samo halnyo jo Daulat Ra'jat punyo PNI Baru, Banteng ikuik mambuko polemik na lasuah. Sabab, sagalo hal nan dilontarkan untuak Partindo jo Banteng dapek ditangkih jo caro mambuek gugusan samangaik baru nan tatap bapihak ka kapantiangan rakyat.

Sabagai kakuatan panggarik, Banteng tabik tiok 2 pakan sakali tanpo iklan dan tanpo bantuan, Banteng tatap maju jo kakuatan dan bagak nan indak mampu ka dilawan. Salain itu, Banteng juo disokong dek tokoh-tokoh kaliber macam Mr. Mohammad Yamin, Mr. Sartono, Amir Sjarifuddin, Ir. Soekarno, Mr Abdullah Syukur, jo Mr. Ali Sastroamidjojo.

Nasib Akhir

Pado panabikan nan ka 14 tanggal 15 Juli 1933, Pimpinan Redaksi baralih dari Amir Sjarifuddin ka Dera. Alasan indak bagitu politis, tapi nan jaleh Amir Sjarifuddin diarahan untuak mambantu propaganda Partindo. Pado wakatu itu, Soekarno alah lapeh dari pinjaro Sukamiskin, sahinggo kadakean basamo Soekarno paralu diupayokan bia dapek mangaek massa. Basamo Dera, Banteng tatap mamacik jargon Masa Aksi dan Radikalisme.

Namun, usaho Banteng manjadi susuik dek Undang-Undang Pembredelan Surek Kaba ditatapkan dek pemerintah. Indak hanyo Banteng, surek kaba Daulat Ra'jat ikuik susuik dek Undang-Undang ko bajalan.