Nur Rofiah

Rofiah satèya dhâddhi dosèn PNS Universitas Islam Negeri Syarif Hidayatullah sè èbentoaghi mènangka pangajhâr è Pascasarjana Perguruan Tinggi Ilmu Al-Qur'an (PTIQ) Jakarta. Dhibi'na èjhulughi doktor è biḍang Èlmo Tapsèr Al-Qur'an ḍâri Universitas Ankara, Turki. Bukuna sè ajuḍul "Kajian tentang Hukum dan Penghukuman dalam Islam: Konsep Ideal Hudud dan Praktiknya" èpaterbi' Komnas binè' è taon 2018. Rofiah nolès prologghâ buku "Qiraah Mubadalah: Tafsir Progresif untuk Keadilan Gender dalam Islam" (2019) sè ètoles sarèng Faqihuddin Abdul Kodir.

Rofiah èkennal mènangka sala sèttong pagiat kajian kasataraan gender ḍâlâm Islam sè sacara maras mabâḍâ kagiathân kajian, sacara onlèn otabâ terkas. Kajian Rofiah sè èlla èmolaè sajjhek partengaan 2019 èberri’ nyama ngaji kasataraan gender Islam (Ngaji KGI). Dhibi’na dhâddhi sala sèttong pamatèri otama ḍâlâm Kongres Ulama Perempuan Indonesia (KUPI) ḍâ’-aḍâ’na è taon 2017 sè èlaksanaaghi è Pondhuk Kebon Jhâmbu, Babakan, Cirèbon, Jhâbâ Bârâ’. Ḍâlâm Konferensi jârèya, dhibi’na aberri’ matèri sè ajudul “Metodologi Studi Islam Perspektif Ulama Perempuan.”

Nur Rofiah iyâ arèya potrèna Qusyaeri bân Seha. Sajjhek kènè’, Rofiah èrabât ḍâlâm kultur bâlâ Nahdlatul Ulama. Èbuna matè dhingla Rofiah kelas 2 SD. Brâmpan taon samarèna, bhâpa’na matè kèya è bâkto Rofiah kelas 6 SD. Sakola SD èpamarè è tana kalahèranna è Randudongkal, Pemalang. Samarèna lulus SD, Rofiah alanjutaghi sakola MTs bân MA è Jombang, Jhâbâ Tèmor, teppa’ è Madrasah Salafiyah Syafi’i‎yah (MASS) Yayasan Khoiriyah Hasyim.

Kalakowan

Nur Rofiah toman ajhâr èlmo aghâma è ḍuwâ’ pondhuk yakni pondhuk Yayasan Khoiriyah Hasyim Seblak Jombang Jhâbâ Tèmor (1984-1990) bân komplèk Hindun Yayasan Ali Ma’shum Krapyak Yogyakarta (1993-1996). Dhibi’na ollè jhulughân sarjana ḍâri Program S1 Jurusân Tapsèr-Hadis Fakultas Ushuluddin Institut Agama Islam Negeri (IAIN) Sunan Kalijaga Yogyakarta (satèya dhâddhi Universitas Islam Neger Sunan Kalijaga) è taon 1995. Katerroanna aḍâlemmi gender ḍâlâm Islam molaè saat maca novel “Perempuan di Titik Nol” (1975) karjâ penulis bân aktivis binè’ Mesir, Nawal El Sadawi.

Bâkto rowa, Rofiah sempat kèya dhâddhi anggota PMII (Pergerakan Mahasiswa Islam Indonesia) bân ngatoaè Kopri (Korps Putri) Fakultas Ushuluddin. Kopri pas èbubaragi polana bâḍâ pandangan jhâ’ Kopri coma fokus ka peran orèng binè’ bân anggotana pas taalang ghâbây akiprah sacara aktif bân sèhat è PMII. Slama kuliah è Yogyakarta, Rofiah asèngghungan kalabân pemèkkèran para tokoh sè noro’ abârnaè cara blârâggâ dâ’ Islam bân orèng binè’, yakni KH. Abdurrahman Wahid, Nurcholis Madjid, Ahmad Wahib, Fazlur Rahman, Hasan Hanafi, Riffat Hassan, Amina Wadud, bân tokoh-tokoh laènna.

Samarèna lulus S1, Rofiah ollè beasiswa ka Turki bân alanjutaghi sakola magister bân doktoralla è Universitas Ankara, Turki sè sèbâng èpamarè è taon 1999 bân 2001. Salaèn ngajâr è PTQI, Nur Rofi’ah padâ aktif è brâmpan organisasi, iyâ arèya Fatayat NU, LKK NU, Rahima, bân Alimat.