Jan Batista Ploner

I.
N conta, ch' i ova menà te Funes
N tel pitl mut de Gherdëina;
Davia che l ova nuef ani mé ades,
Stajova si oma cun pëina.
Si sor fova ënghe iló a servì,
Ma no tla medema cuntreda;
N pue' plu in ite mussovun mo jì,
Iló fova ëila ruveda.

II.
Śën fovi dui doi te Funes a servì;
Ma Engl vardova la vaces,
Maria mussova lauré dut l di,
Da sëir i dulova i braces.
Pernanche la fova unid' a l savëi,
Che Engl ie tlora che l verda,
Ti iela sauteda de jì a l udëi;
Ma po i à zachei metù verda.