I Fæti de Zena do 30 zùgno 1960 son i avvegnimenti che se sun svolti a Zena in seguito ao tentativo de organizzä in ta çittæ, Medaggia d'Ou da Rexistensa, o congresso do partio neofascista MSI.
ZE | Questa pàgina a l'é scrîta in léngoa zenéize |
O 19 marso 1960, cheito o governo de Amintore Fanfani, che o l'aveiva çercou de preparâ l'ingresso di socialisti in ta coscidita stansia di pumelli, o prescidente da Repübblica Giovanni Gronchi o l'incaregava o democristian Fernando Tambroni de formä unna noeuva compagine governativa. Tambroni o l'ea un esponente da scinistra DC, e o sò incarego o l'ea de formä un governo de tranxision in atteisa che e cose se definissen megio. Probabilmente sponciou dall'ambision de düä a lungo ao governo, Tambroni o çercava però de orientä decisamente a destra o sò governo. A solo 15 anni da a Liberaçion, o governo o vegniva coscì a rëzise in sce i voti do MSI, o partio neofascista. No solo, vegniva deciso che o congresso do MSI do 2, 3 e 4 Lüggio o se saieiva tegnüo a Zena; e che a presiedilo ghe saieiva stæto Emanuele Basile, o prefetto che ai tempi da Repübblica de Salò o l'aveiva organizzou a deportaçion di operai de Sestri Punènte o 16 Zügno 1944. Basile o l'ea sempre stæto scandalosamente assolto in te tütti i processi che in to doppoguæra s'ea tegnüo pe i delitti che o l'aveiva commisso.
O 25 de zùgno, contra o congresso fascista, ä mattin scioperava i portuali; in to pomeriggio i studenti universcitai se dirizzen da Ciassa Banchi verso o Ponte Monumentale pe pösä de scioì a-o sacraio di Cheiti Partigen. Tütt'assemme partiva 'na càrega da poliçia, i zoveni reagivan e comensava di scontri che düâvan fin ä seia a 20 oe e 30. Questi primmi avvegnimenti innescavan a raggia contra a poliçia che a saieiva sccioppä in ti giorni succescivi.
O 28 de zùgno in mattinä o Comitato de donne antifasciste o votava un ordine do giorno che o domandava o scioglimento do MSI, in base ä norma transitoria e finale XII da Costituçion italiann-a, (norma tüttoua in vigore). Ao pomeriggio parteçipava paçificamente circa 30.000 personne ao comiçio de Sandro Pertini in ciassa da Vittoia (Zena).
O 30 do meise o l'ea o giorno do sciopero generale proclamou dä Camera do Travaggio; ae 15,30 partiva un grande corteo da ciassa da Nunçiä attraverso o centro da çittæ con destinaçion ciassa da Vittoia. Ao momento de sfollä, in ciassa De Ferrari partiva unna càrega, assolutamente gratuita, da poliscia che a dava o via a unn'atra serie de scontri restæ famoxi.
In ta nötte fra o 1° e o 2 Lüggio o prefetto Pianese o l'avvisava che o congresso fascista o l'ea stæto annullou. In ti giorni successivi a protesta contra Tambroni a dilaggava da Zena a tütta Italia, con scontri che costaven anche di morti fra i manifestanti: a Reggio Emilia, a Rumma, in Sicilia. O 19 de Lüggio o governo Tambroni o se dimetteiva. Zena a l'aveiva dæto a spinta pe risolve unna situaçion de pericolo naçionale.
This article uses material from the Wikipedia Lìgure article Fæti de Zena do 30 zùgno 1960, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). O contegnûo o l'é disponìbile in sciâ bâze da licénsa CC BY-SA 4.0, se o no l'é diversaménte specificòu. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Lìgure (DUHOCTRUNGQUOC.VN) is an independent company and has no affiliation with Wiki Foundation.