Baybay Somov

Daytoy ket mabirukanto idiay akindaya unay a parte ti subkontinente ti Antartika ti Daya nga Antartika, iti amianan ti Aplaya Oates, Daga Victoria, ken ti Aplaya George V, iti pagbaetan ti 150° ken 170° daya. Iti laud ket isunto ti Baybay D'Urville. Iti daya ti Rawis Adare, iti 170°14' Daya, ket ti Baybay Ross.

Immuna a naisingasing ti nagan babaen dagiti Ruso para iti burador ti Gunglo ti Internasional a Hidrograpiko (International Hydrographic Organization - IHO) ti 2002. Daytoy a burador ket saan idi a naaprobaran babaen ti IHO (wenno ti ania man a gunglo), ken ti dokumento ti IHO ti 1953 (a saan nga aglaon iti nagan) ket agdama nga agtultuloy a matungtungpal. Dagiti mangidadulo a turay ti heograpia ken dagiti atlas ket saanda nga agus-usar iti nagan, a mairaman ti maika-10 nga edision ti World Atlas ti 2014 ti National Geographic Society ti Estados Unidos ken ti maika-12 nga edision ti Times Atlas of the World ti 2014 ti Britaniko . Ngem maus-usar dagiti mapa ti Sobiet ken Rusia.

Ti Baybay Somov ket addaanto iti kalawa iti 1,150,000 km² ken mabalinto nga aginggana iti 3000 a metro iti kaadalem.

Ti Is-isla Balleny ke 240 km iti amianan ti aplaya ti nangruna a daga ditoy.

Ti Baybay Somov ket mainagananto akas pammadayaw kenni Mikhail Somov (1908–1973) ti Ruso nga oseanologo ken eksplorador ti polar, nga isu idi baetan ti 1955 ken 1957 ket ti nagbilbilin ti immuna nga Ekspedision ti Antartiko ti Sobiet.