Mila Imišowa, rodź.
Pfulec (* 26. měrca 1827 w Budyšinje; † 21. februara 1895 w Hodźiju) bě serbska basnjerka a mandźelska Jaroměra Hendricha Imiša.
Mila Imišowa narodźi so 26. měrca 1827 jako starša dźowka z Luchowa pochadźaceho wobsedźerja Budyskeho měšćanskeho kubła Jana Michała Pfula (1796–1869) a jeho mandźelskeje Hany rodź. Němcec (1810–1860) z Małeje Nydeje a sotra Křesćana Bohuwěra Pfula. Wona wopyta serbsku šulu swj. Michała a pozdźišo seminarsku šulu w Budyšinje, dósta pak tež priwatne duchowne rozwučowanje. Dnja 28. awgusta 1851 so wona z fararjom Jaroměrom Hendrichom Imišom we Wóslinku woženi, z kotrymž so wona w lěće 1859 na Hodźijsku faru přesydli. Tam wona na sćěhi chorosće 21. februara 1895 zemrě.
W jeje wótčinskich basnjach mjez 1849 do 1853 hori so Mila Imišowa wosebje za serbske narodne wozrodźenje. Wona pisa pak tež nabožinske a dźěćace basnje, pozdźišo wosebje za swojeho syna Měrćina Imiša (1869–1921).
Mila Imišowa běše wot załoženskeho lěta 1847 čłonka Maćicy Serbskeje.
This article uses material from the Wikipedia Hornjoserbsce article Mila Imišowa, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wobsah pod CC BY-SA 4.0 k dispoziciji steji, jeli njeje so hinak podało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Hornjoserbsce (DUHOCTRUNGQUOC.VN) is an independent company and has no affiliation with Wiki Foundation.