Max Švabinský

septembra">17. septembra 1873 w Kroměřížu (Čěska); † 10. februara 1962 w Praze) běše čěski moler a grafikar.

Max Švabinský narodźi so 17. septembra 1873 w Kroměřížu. Zhromadnje z Janom Preislerjom, Antonínom Slavíčekom a Milošom Jiránekom bě wón jedyn z załožerjow moderneho čěskeho wuměłstwa. Švabinský a jeho žona Ela přebywaštaj spočatk 20. lětstotka často ze swójbu Vejrych w Kozlovje blisko města Česká Třebová w Pardubickim kraju. Tam bu wón k mnohim krajinowym wobrazam inspirěrowany. W tutym času molowaše wón někotre z jeho najsławnišich twórbow, kaž na přikład „Chudy kraj“. Wysokeje kwality grafiskeho tworjenja dla, bu 1910 na profesora na Prasku akademiju wuměłstwa powołany. Mjez druhimi běše Měrćin Nowak-Njechorński, kotryž 1923 do 1927 při Praskej akademiji studowaše, tu jeho šuler.

Švabinský naćisnje mnoho čěskosłowakskich listowych znamkow, mjez kotrymiž běše tež trajna marka z portretom statneho prezidenta Masaryka. 1945 spožči so jemu čestny titl narodneho wuměłca a z tym prawo, swój atelier w Praskej akademiji na čas žiwjenja wužiwać. Wón zemrě 10. februara 1962 w Praze.

K najznaćišim mólbam Švabinskeho liča:

• Splynutí Duší (Zjednoćenje dušow), 1896, wolij na płatnje, 65,5cm × 45,5cm
• Kulatý portrét (Kulojty portret), 1897, wolij na płatnje, Ø 105,5cm
• Růžový portrét (Róžojty portret), 1898, wolij na płatnje, 152cm × 135cm
• Chudý kraj (Chudy kraj), 1900, wolij na płatnje, 179cm × 246cm
• Kamélie (Kamelija), 1903, pjero, seršćowc, tuša; akwarel, 122cm × 60,7cm