Karlowy móst (čěsce Karlův most, němsce Karlsbrücke) je stary kamjentny wobłukowy móst přez Wołtawu w centrumje čěskeje stolicy Prahi, kotryž zwjazuje Stare město na prawym brjoze z Małej stronu a Hradčanami na lěwym brjoze rěki.
W 14. lětstotku natwarjeny móst je najstarša zdźeržana přez Wołtawu a słuša k najstaršim kamjentnym mostam Europy. Wón dósta swoje dźensniše mjeno hakle w lěće 1870, do toho rěkaše prosće Kamjentny móst abo Praski móst. Je jedna z najznaćišich twarjenjow města a zapisany jako narodny kulturny pomnik.
Karlowy móst je 516 metrow dołhi a dźesać metrow šěroki. Twar započa so w lěće 1357. Do toho běše tu znajmjeńša wot 10. lětstotka drjewjany móst přez rěku, kotryž bu pak přez wulku wodu přeco zaso wobškodźeny a 1157 abo 1158 doskónčnje zničeny. Mjez 1158 a 1170 nasta prěni Praski kamjentny móst w romaniskim stilu, Judićiny móst, kotryž bu přez wulku wodu lěta 1342 skóncowany.
Někotre z wulkich pěskowcowych postawow na mosće buchu wuhotowane wot serbskeho rězbarja Maćija Wjacława Jakule. Njedaloko Karloweho mosta na Małej stronje nadeńdźe so Serbski seminar.
This article uses material from the Wikipedia Hornjoserbsce article Karlowy móst, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wobsah pod CC BY-SA 4.0 k dispoziciji steji, jeli njeje so hinak podało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Hornjoserbsce (DUHOCTRUNGQUOC.VN) is an independent company and has no affiliation with Wiki Foundation.