नूतन साखरदांडे

पूर्वाश्रमीच्यो नूतन सुखठणकार. भुरगेपणासावन वाचपाची आनी बरोवपाची आवड. दो. मनोहरबाबांचो ‘जायात जागे’ आनी कवि माधव बोरकारांचो ‘चंवर’ ह्या कवितासंग्रहान तांका कोंकणी कवितेविशीं गोडी लायली. मनांतले विचार डायरेर बरोवन दवरपाची संवंय पूण उण्या आत्मविस्वासाक लागून छापपाचें धाडस जाले ना तेन्ना अश्या वेळार कथाकार सर्गेस्त लक्ष्मणराव सरदेसाय हांणी कवियत्रीचो आत्मविश्र्वास वाडयलो. तशेच श्री.पुंडलीक नायक आनी हेमा नायकाच्या मार्गदर्शनान तांची कविता फुलली. कोंकणी भाशा आनी साहित्याच्या मळार फाटलीं तीन दसकां एक आघाडेची कवयित्री, संपादक, कुशल संघटक तशेंच संस्थाचालक म्हण वावुरता. अर्थशास्त्र आनी मानसशास्त्र विशयांत बी.ए. केल्या. गोंयांत पंजाब नॅशनल बँकेत फाटली 25 वर्सां नोकरी करता.

‘जीण जाली कस्तुरी'(1994)

ह्या कविता संग्रहांत वेगवेगळे विशय हाताळीत कवियत्री संवसारांतल्यान अणभव घेत वयता. आपल्या मनांत आयल्ल्यो गजाली सहजतायेन मांडटा. चडश्यो प्रेमकविता आसात.पूण तांच्या एक कवितेंत आवय आसा ती एक जबरदस्त जाणीव आसलेली बायल. तिच्यांत सत्य फुलून येता आनी कांय पावटीं सांस्कृतीक बडवाचारांत जो फटींचो आस्पाव आसता ताका भेद दीत ही आवय एक जळजळीत सत्य सांगता. आपल्या भुरग्यांक आपूण माया दिवंक शकलें ना. आपूण तांकां वेळ दिवंक शकलें ना हाची तिका लज दिसता. ही लजूय आमकां एका ठरावीक पध्दतिच्या सामाजिक चिंतनशिलतेच्या आधारानूच पळोवंक मेळटा. नव्या युगांतली बायल बदलत चल्ल्या. तिची चिंतनां, तिचे आचार-विचार फाटल्या काळांतले बायलेक फावोसो छेद दिवन फुडें वचपाक लागल्या. आपल्याकूय जिवीत आसता आनी आपल्याक जाय ते तरेन तें जगपाक मेळपाक जाय हें सत्य होलमून ती उलोवपाक लागल्या. आपुणूच पेटटना आपल्या भुरग्याक सांवळी दिवप कशें अशक्य जाता ताचें विदारक सत्य तिच्या कवितेंत बेस बरें उकतें जाता. तांचो हो कविता संग्रह वाचून कोंकणी कविता आनी एका पावलान फुडें गेल्ल्याची सुलूस मेळटा.

‘पासवर्ड’(2010)

कविता संग्रह. काळ बदल्लो, मनशां बदल्लीं. हे नवे बदल आपणायतना मनशां मनशां मदले मेळप उणें जावंक लागलां. कम्प्युटरान क्रांती केल्या मोबायलाचे टावर्स वाडत आसात. इंटरनेटान नेट धल्ला. इमेल्सान पत्रांचेर हांवळ हाडल्या. घरांघरानी दर एकल्याचो आपलो असो पासवर्ड भावनीक नातें शेणिल्ल्यानूच जमा. अशे खुबशे प्रस्नांचो सोद आपल्या कवितेतल्यान घेतला.

गोंयांत तशेंच गोंया भायर वेगवेगळ्या कोंकणी कवीसंमेलनानी भाग घेतला.

‘त्रिवेणी’ चे (तीन कवयित्रींच्या कवितांची कार्यावळ) सुमार पन्नाशेक प्रयोग सादर केल्यात.

अखिल भारतीय थराचेर कोल्हापूर, हैद्राबाद, बिजापूर, दिल्ली, पुणे, बडोदा हांगासर जाल्ल्या भौभाशीक कविसंमेलनांनी भाग.

प्रजासत्ताक दिनानिमतीं जावपी आकाशवाणीच्या भौभाशीक राष्ट्रीय कवीसंमेलनांत (लखनौ – 1999) निवड.

संमेलनांत वाचिल्ले कवितेचो सगळ्या भारतीय भासांनी अणकार जावन आकाशवाणी वयल्यान वितरीत.

बार्देश दिवाळी अंकाचें (2007 सावन) संपादन.

‘विवेक किर्णां’ नेमाळ्याचें संपादन.

‘अप्रूप’ (1983) तशेंच कोंकणी पाठ्य पुस्तकांनी कवितांचो आस्पाव.

प्रतिभा सत्पथी हांगेल्या ‘तन्मयधुली’ ह्या उडिया काव्यसंग्रहाचो कोंकणी अणकार. कांय भारतीय भाशांनी कवितांचे अणकार.

कोंकणी राजभास आंदोलनांत (1985) सक्रिय वांटो.

बायलांच्या साहित्य मेळांचे आयोजन.

कोंकणी भाशा मंडळ गोंय, गोवा कोंकणी अकादेमी संस्थाचेर उपाध्यक्ष, वांगडी म्हण वावर.

बार्देश कोंकणी अस्मिताय केंद्राची संस्थापक वांगडी आनी उपरांत सहसचिव , अध्यक्ष म्हण वावर केला.

जीण जाली कस्तुरी पुस्तकाक अखिल भारतीय कवयित्री संमेलनाचो कविता पुरस्कार 2003.

कोंकणी भाशा मंडळ पुरस्कार

जनगंगा पुरस्कार

बिंब पुरस्कार

गोवा कोंकणी अकादेमीचो उत्कृश्ट संस्था सेवा पुरस्कार 2010.