Joe Leydon
Joe Leydon (folút: Joseph Patrick Michael Leydon; New Orleans, 22 augustus 1952) is in Amerikaansk sjoernalist en publisist, dy't bekendheid krigen hat as filmkritikus en filmhistoarikus.
| Joe Leydon | ||
 | ||
| persoanlike bysûnderheden | ||
| echte namme | Joseph Patrick Michael Leydon | |
| nasjonaliteit |  Amerikaansk | |
| berne | 22 augustus 1952 | |
| berteplak | New Orleans (Louisiana) | |
| etnisiteit |  Iersk | |
| wurkpaad | ||
| berop/amt | sjoernalist | |
| aktyf as | filmkritikus, filmhistoarikus, publisist | |
| jierren aktyf | 1982 – no | |
| offisjele webside | ||
| Joe Leydon yn 'e IMDb | ||
Libben en karriêre
Jonkheid en oplieding
Leydon waard yn 1952 berne yn New Orleans, yn 'e Amerikaanske steat Louisiana. Syn oplieding genoat er oan 'e roomske Loyola Universiteit New Orleans, dêr't er ôfstudearre mei in bachelorgraad yn sjoernalistyk mei as byfak filmstúdzjes. Op lettere leeftyd learde er yn 2007 noch troch oan 'e Universiteit fan Houston om in mastergraad yn 'e skiene keunsten te heljen.
Karriêre
Leydon wie fan 1982 ôf filmkritikus foar de Houston Post. Hy bleau by dy krante yn 'e tsjinst oant dy yn 1995 opheft waard. Dêrnjonken wied er fan 1990 ôf filmkritikus en ferslachjouwer foar it tydskrift Variety, in funksje dy't er behold oant syn pinsjonearring. Behalven yn 'e boppeneamde beide publikaasjes ferskynden syn resinsjes ek yn û.m. The Houston Press en The San Francisco Examiner en op 'e websiden fan tillefyzjenetwurk MSNBC en de pleatslike tillefyzjestjoerder KPRC-TV yn Houston. Anno 2021 hie Rotten Tomatoes, in webside dy't filmresinsjes sammelet, 1.225 resinsjes fan Leydon gearfandele.
De artikels fan Leydon as sjoernalist en interviewer waarden fierders ek publisearre yn 'e New York Daily News, de Los Angeles Times, Newsday, The Tennessean, The Boston Globe, de Toronto Star, de Austin American-Statesman, Film Comment, MovieMaker, Houstonia en Cowboys & Indians Magazine. Hy publisearre it boek Joe Leydon's Guide to Essential Movies You Must See en droech by oan Leonard Maltin's Movie Guide. Leydon is ek in oprjochtsjend lid fan it Genoatskip fan Filmkritisy fan Houston (HFCS) en in stimberjochtige lid by de Critics' Choice Movie Awards.
Njonken syn sjoernalistike wurk wie Leydon fan 2001 oant en mei 2021 dosint film en kommunikaasje oan it Houston Community College en de Jack J. Valenti School of Communications fan 'e Universiteit fan Houston.
Priveelibben
Yn desimber 2011 makke Leydon fia syn bloch bekend dat der yn 2009 prostaatkanker by him fêststeld wie, mar dat er de behanneling trochstien hie en dat er no kankerfrij ferklearre wie.
Keppelings om utens
| Boarnen, noaten en/as referinsjes: | ||
| Foar boarnen en oare literatuer, sjoch ûnder: References, op dizze side.
|
This article uses material from the Wikipedia Frysk article Joe Leydon, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Ynhâld is beskikber ûnder CC BY-SA 4.0, at net oars neamd wurdt. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Frysk (DUHOCTRUNGQUOC.VN) is an independent company and has no affiliation with Wiki Foundation.