Prât

Prât al è un comun inte Cjargne, che al dì di vuê al fâs part de provincie di Udin e al à 1.064 abitants.

Il comun di Prât al è logât tal Cjanâl Pedarç, unic comun di chiste biele valade. Lis sôs frazions a son:

• Crôs
• Sostâs (690 m)
• Davouse (loc. Davôsa) (652 m)
• Prât (686 m)
• Pri (747 m)
• Pradumbli (678 m)
• Pierie (loc. Pieria) (674 m)
• Dasaiis (loc. Dasàia) (717 m)
• Truie (loc. Truia) (881 m)
• Pesariis (loc. Pesaria) (750 m), cu la ministrazion separade frazionâl dai ûs civics.

Ducj i paîs ju si cjatin ae çampe dal turint Pesarine, tal versant nord de valade, là che plui bàt il soreli, mancul Pradumbli, che invezit al è logât tal versant meridionâl, in ombrene.

 

L'economie dai paîs dal Cjanâl Pedarç e si è simpri fondade su l'agricolture, in mût particolâr su la coltivazion dai fasoi, e su l'ativitât pastorâl. Dal secul XVIII la frazion di Pesariis e je innomenade atôr pal mont par vie de sô produzion di orlois: propite casù difat e jè nassude, tal 1725 la impuartantissime ditte dai fradis Solari, che ancjemò al dì di vuè (ancje se cumò la sede e jè a Udin e esporte i siei prodots in dut il mont. Par chest motîf un dai slogan de valade e jè la valade dal timp: arlois e fasois. Condiplui dai ains '60 la valade e jè interessade da un fenomin turistic avonde impuartant, in graciis ae grande bielece dal paesaç e dai paîs, e de grande pâs e trancuilitât che e regne achì; i paisuts no acolgin i turiscj in albiercs, ma tes lôr propiis cjasis, ristruturadis e mitudis in sest par proponi ancje chi il model dal albergo diffuso. Ancje la vignude dal turism parò, che ad ogni mût no'l è confrontabil cun chel che interesse il Trentin - Alt Adîs o lis plui impuartants localitâts Cjadovri, no jè bastade par frenâ il fuart dispopolament che ancjemò vuè e patîs la valade.