Quél articllo est ècrit en arpetan dârfénouès / ORB lârge. |
Lo Palès idèâl ou ben lo Palès idèâl u factor Chevâl (le Palais idéal du facteur Cheval en francês) est un monument bâti a Hiôtariva (Drom’arpetana) per lo factor Fèrdinand Chevâl, depués 1879 jusqu’a 1912.
Ch·èf-d’ôvra de l’arch·itèctura nayiva et de l’ârt nayif, il est rengiê come monument historico depués 1969.
Por un voto organisâ pendent l’étéf 2020, u nivél nacionâl, per los productors de l’èmission Lo Monument prèferâ dus Francês, difusâ dessus France Tèlèvisions, lo Palès idèâl at entâ rengiê second dessus una lista de quatôrze monuments. Sa construccion at avouéc fêt la chousa d’una pèlicula biografica francêsa rèalisâ per Nils Tavèrniér et sortia en 2018.
Lo concevior et arch·itècto de quél monument est lo factor Fèrdinand Chevâl, empleyê de l’administracion de les pôstes, chargiê de Hiôtariva. Quél temps corrèspond u dèvelopament dus voyâjos de natera touristica et la cârta postâla fât son aparicion en France en 1873, sêt cinq ans davant lo comencement du Palès idèâl.
Queli chavone la construccion du Palès idèâl en 1912, a l’âjo de 76 ans. Bâtirat avouéc, d’aprés la méma mètoda de construccion, sa tomba u cementiéro de Hiôtariva, la tomba du silence et du repôs sen fin, et pués la Vilâ Alicius, que sè trôve a coutâ du palès et tôs rengiês come monuments historicos.
D’abôrd ensorcelâ per de piérres que rècôrte pendent sa veriê (parcôrt a pied 43 km per jorn !), Fèrdinand Chevâl sè vôt enspirar de les cârtes postâles que distribue tôs los jorns por bâtir, sus un tèrren qu’at achetâ, quél palès qu’est un voyâjo nayif g·eografico, historico et surtot filosofico. Travalye de nuet a la lumiére d’un quinquèt, mourgâ per un grôs mouél de les gens de la velèta.
Quél monument bâti per un homo tot solèt mesere 12 mètros de hiôt et 26 mètros de long, les difèrentes piéces (des piérres ramassâs dessus los chamins por la plepârt) ont entâ apondues avouéc de chôlx, de mortiér, de ciment et d’armatures mètaliques (quen qu’est prècursior en matiére de tècnica de « bèton armâ »).
D’abôrd dècriâ vêr mocâ per la plepârt dus spècialistos de l’ârt, l’ôvra recêt diens los ans 1930 lo soléf morâl d’un mouél d’artistos come Pablô Picassô et André Breton, qu’uvriront la vie a una recognessence encor més g·ènèrâla.
This article uses material from the Wikipedia Arpetan article Palès idèâl, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Lo contegnu est disponiblo desot licence CC BY-SA 4.0 betâ a pârt mencion contrèra. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Arpetan (DUHOCTRUNGQUOC.VN) is an independent company and has no affiliation with Wiki Foundation.