ཁྲིད་ཀྱི་སྔོན་འགྲོའི་ངག་འདོན་རྡོ་རྗེའི་གྲོང་དུ་འདྲེན་པའི་ཤིང་རྟ།

༄༅། །བླ་མ་དམ་པའི་ཞབས་ལ་ཕྱག་འཚལ་ལོ། _{།འདིར་སྔོན་འགྲོའི་ཆོག་ཁྲིགས་ཁྱེར་བདེ་བ་ཞིག་འགོད་པར་བྱ་སྟེ། དེ་ཡང་ཐུན་མོང་དང་ཐུན་མོང་མ་ཡིན་པ་གཉིས་ལས་དང་པོ་ནི། ནམ་གྱི་ཐུན་ཐ་མ་སྐྱ་རེངས་དང་པོ་བཏང་ཙམ་གྱི་ཚོད་ན་བདེ་བའི་སྟན་ལ་ལུས་དྲང་པོར་བསྲངས་རླུང་རོ་ལན་གསུམ་བསལ་ནས་དབྱངས་གསལ་ལན་གསུམ་བཟླས་པས་ངག་དག་པར་བྱས་ཏེ། རིག་པ་དྭངས་སིང་ངེར་བྱས་ནས་ཐུན་མོང་གི་སྔོན་འགྲོ་ལ་བཞི་ཡོད་པའི་དང་པོ་དལ་འབྱོར་རྙེད་དཀའ་གསལ་བཏབ་པ་ནི།}དལ་འབྱོར་འདི་ནི་རྙེད་པ་ཤིན་ཏུ་དཀའ། །སྐྱེས་བུའི་དོན་གྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་སྒྲུབ་ན། །ཕྱིས་འདི་ཡང་དག་འབྱོར་པར་ག་ལ་འགྱུར། །གཉིས་པ་འཆི་བ་མི་རྟག་པ་ནི། སྲིད་གསུམ་མི་རྟག་སྟོན་ཀའི་སྤྲིན་དང་འདྲ།། འགྲོ་བའི་སྐྱེ་འཆི་གར་ལ་བལྟ་དང་མཚུངས། །འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་ལྟ་བུར་མྱུར་མགྱོགས་འགྲོ། _{།གསུམ་པ་ལས་རྒྱུ་འབྲས་ནི།} དུས་ཀྱིས་བསྙེན་ནས་རྒྱལ་པོ་འགྲོ་བའི་ཚེ། །ལོངས་སྤྱོད་མཛའ་དང་གཉེན་བཤེས་རྗེས་མི་འབྲང་། །སྐྱེས་བུ་དེ་ནི་གར་གནས་གར་འགྲོ་ཡང། །ལས་ནི་གྲིབ་མ་བཞིན་དུ་རྗེས་སུ་འབྲང་། _{།བཞི་པ་འཁོར་བའི་ཉེས་དམིགས་ནི།} སྲིད་གསུམ་རྒ་དང་ནད་ཀྱི་སྡུག་བསྔལ་འབར། །འདི་ན་འཆི་མེ་རབ་འབར་མགོན་མེད་དེ། །སྲིད་ལས་བྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་འཁོར་བ་བཞིན། _{།ཞེས་ངག་ཏུ་བརྗོད་ཅིང་དོན་ཡིད་དང་འདྲེ་ངེས་བསྒོམ་པར་བྱའོ། །གཉིས་པ་ཐུན་མོང་མ་ཡིན་པའི་སྔོན་འགྲོ་ལ་བཞི་ཡོད་པའི་དང་པོ་རྒྱུད་སྣོད་དུ་རུང་བར་བྱེད་པ་སྐྱབས་འགྲོ་སེམས་བསྐྱེད་ཀྱི་ཁྲིད་ནི།} མདུན་གྱི་ནམ་མཁར་ལཾ་ལས་རིན་ཆེན་གཞི། །དག་པའི་ཞིང་ཁམས་རྒྱ་ཁྱོན་ཆེན་པོའི་དཀྱིལ། །བཾ་ལས་བདུད་རྩིའི་རྒྱ་མཚོ་དཀར་ཞིང་དྭངས། །དེ་དབུས་དཔག་བསམ་ཤིང་ཆེན་རབ་རྒྱས་པ། །རྩ་བ་གསེར་ལ་སྡོང་པོ་བེེ་ཌཱུརྱ། །ལོ་འདབ་རིན་ཆེན་སྣ་ཚོགས་འཁྲིགས་པའི་སྟེང་། །རྡོ་རྗེ་རིན་ཆེན་ལས་གྲུབ་སེང་གེའི་ཁྲི། །ལྷབ་ལྷུབ་དར་གྱིས་ཀླུབས་པའི་གདན་སྟེངས་སུ། །པདྨའི་སྙིང་པོ་ཉི་ཟླ་བརྩེགས་པའི་ཁར། །རྩ་བའི་བླ་མ་རིགས་རྣམས་ཀུན་གྱི་བདག །རྡོ་རྗེ་འཆང་དབང་ལོངས་སྤྱོད་རྫོགས་པའི་སྐུ། །མཚན་དཔེའི་རྒྱན་རྫོགས་གཟི་བྱིན་རབ་འབར་བ། །ལྷམ་མེར་གསལ་བ་རང་ལ་དགྱེས་འཛུམ་བཅས། །ཡེ་ཤེས་འོད་ལྔའི་ཀློང་ན་བཞུགས་པ་ཡི། །མཐའ་བསྐོར་བརྒྱུད་པའི་བླ་མ་ཁྲོམ་ཚོགས་ཚུལ། །མདུན་དུ་ཡི་དམ་འཁོར་ལོ་སྡོམ་པ་ལ། །རབ་འབྱམས་རྒྱུད་སྡེའི་ལྷ་ཚོགས་མང་པོས་བསྐོར། །གཡས་སུ་བཅོམ་ལྡན་ཐུབ་པའི་དབང་པོ་ལ། །བདེ་བར་གཤེགས་པ་རྒྱ་མཚོའི་ཚོགས་ཀྱིས་བསྐོར། །རྒྱབ་ཏུ་ཡུམ་ཆེན་ཤེས་རབ་ཕར་ཕྱིན་ལ། །དམ་པའི་ཆོས་ཀྱི་གླེགས་བམ་མང་པོས་བསྐོར།། གཡོན་དུ་འཕགས་མཆོག་སྤྱན་རས་གཟིགས་དབང་ལ། །བྱང་སེམས་དགྲ་བཅོམ་ཆེན་པོའི་ཚོགས་ཀྱིས་བསྐོར། །མཐའ་སྐོར་ཕྱོགས་མཚམས་སྟེང་འོག་ཐམས་ཅད་དུ། །རིག་འཛིན་མཁའ་འགྲོ་ཆོས་སྲུང་རྒྱ་མཚོའི་ཚོགས། །མཁའ་ལ་སྤྲིན་ཕུང་འཐིབས་བཞིན་བཞུགས་པར་གྱུར། _{།ཅེས་སྐྱབས་ཡུལ་གསལ་བཏབ་ནས།} མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་ཆོས་ཀྱི་སྐུ་ལ་སྐྱབས་སུ་མཆིའོ། །བླ་མ་ལོངས་སྤྱོད་རྫོགས་པའི་སྐུ་ལ་སྐྱབས་སུ་མཆིའོ། །བླ་མ་ཐུགས་རྗེ་སྤྲུལ་པའི་སྐུ་ལ་སྐྱབས་སུ་མཆིའོ། །བླ་མ་སངས་རྒྱས་རིན་པོ་ཆེ་ལ་སྐྱབས་སུ་འཆིའོ། །སེམས་ཅན་ཐམས་ཅད་ཀྱི་བློ་ཆོས་སུ་འགྲོ་བར་བྱིན་གྱིས་བརླབ་ཏུ་གསོལ། །ཆོས་ལམ་དུ་ལོངས་པར་བྱིན་གྱིས་བརླབ་ཏུ་གསོལ། །ལམ་འཁྲུལ་པ་སེལ་བར་བྱིན་གྱིས་བརླབ་ཏུ་གསོལ། །འཁྲུལ་པ་ཡེ་ཤེས་སུ་འཆར་བར་བྱིན་གྱིས་བརླབ་ཏུ་གསོལ། །རྩ་བའི་བླ་མ་བརྒྱུད་པ་དང་བཅས་པ་རྣམས་ལ་སྐྱབས་སུ་མཆིའོ། །མཆེད་གྲོགས་ཆོས་མཛད་དང་བཅས་པ་རྣམས་ལ་སྐྱབས་སུ་མཆིའོ། །སྣོད་ཀྱི་འཇིག་རྟེན་དཔལ་ལྡན་བླ་མའི་ཚོགས་ལ་སྐྱབས་སུ་མཆིའོ། །བཅུད་ཀྱི་སེམས་ཅན་ལྷ་དང་ལྷ་མོའི་ཚོགས་ལ་སྐྱབས་སུ་མཆིའོ། །སྣང་སྲིད་དཔལ་ལྡན་བླ་མའི་ཚོགས་ལ་སྐྱབས་སུ་མཆིའོ། །རྟོགས་པས་བདག་གྲོལ་བར་བྱིན་གྱིས་བརླབ་ཏུ་གསོལ། །ཐུགས་རྗེས་གཞན་གྲོལ་བར་བྱིན་གྱིས་བརླབ་ཏུ་གསོལ། །རྟེན་འབྲེལ་ཐབས་ལ་མཁས་པར་བྱིན་གྱིས་བརླབ་ཏུ་གསོལ། །འབྲེལ་ཚད་དོན་དང་ལྡན་པར་བྱིན་གྱིས་བརླབ་ཏུ་གསོལ། །ཕྱག་རྒྱ་ཆེན་པོ་མཆོག་གི་དངོས་གྲུབ་ཚེ་འདི་ཉིད་ལ་ཐོབ་པར་བྱིན་གྱིས་བརླབ་ཏུ་གསོལ། །ཕྱོགས་བཅུར་བཞུགས་པའི་བླ་མ་དང་། །སངས་རྒྱས་བྱང་ཆུབ་སེམས་དཔའ་ཆེ། །དཔའ་བོ་དཔའ་མོ་རྣལ་འབྱོར་ཚོགས། །ཐམས་ཅད་བདག་ལ་དགོངས་སུ་གསོལ། །དེང་ནས་བརྩམས་ཏེ་མགོན་མེད་བདག །བྱང་ཆུབ་སྙིང་པོ་མ་ཐོབ་བར། །འཁོར་བའི་འཇིགས་པ་ཆེན་པོ་ལས། །བདག་དང་འགྲོ་རྣམས་སྐྱབས་པའི་ཕྱིར། །རྐང་གཉིས་གཙོ་བོ་སྐུ་གསུམ་བདག །བཅོམ་ལྡན་འདས་ལ་སྐྱབས་སུ་མཆི། །འདོད་ཆགས་བྲལ་ཞིང་མྱང་ངན་འདས། །ཞི་བའི་ཆོས་ལ་སྐྱབས་སུ་མཆི། །ཚོགས་ཀྱི་མཆོག་གྱུར་ས་ལ་བཞུགས། །ཕྱིར་མི་ལྡོག་ལ་སྐྱབས་སུ་མཆི། །སངས་རྒྱས་ཀུན་གྱི་རང་བཞིན་སྐུ། །བླ་མ་མཆོག་ལ་སྐྱབས་སུ་མཆི། །དངོས་གྲུབ་སྟེར་བའི་ཡི་དམ་ལྷ། །དཀྱིལ་འཁོར་ལྷ་ལ་སྐྱབས་སུ་མཆི། །དཔའ་བོ་དཔའ་མོ་རྣལ་འབྱོར་ཚོགས། །མཁའ་འགྲོའི་ཚོགས་ལ་སྐྱབས་སུ་མཆི། །སྟོང་ཉིད་སྙིང་རྗེ་དབྱེར་མེད་པའི། །གཉུག་མའི་སེམས་ལ་སྐྱབས་སུ་མཆི། །བདག་གི་ལུས་ངག་ཡིད་གསུམ་གྱིས། །སྔོན་ཆད་སྡིག་པ་ཅི་བགྱིས་པ། །མགོན་པོ་ཁྱེད་ཀྱི་སྤྱན་སྔར་བཤགས། །ཕྱིན་ཆད་སྡིག་ལས་ལྡོག་པར་བགྱི། །དེང་ནས་ཁྱེད་ཀྱི་འབངས་སུ་མཆི། །ཁྱེད་ཀྱི་བསླབ་བྱ་རྗེས་སུ་སློབ། །ཁྱེད་ཀྱི་བཀའ་ལས་མི་འདའ་བས། །ཀུན་ནས་ཡོངས་སུ་བསྐྱབ་ཏུ་གསོལ། _{།ལན་གསུམ།} ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་ལྟར། །དེ་བཞིན་བླ་མེད་བྱང་ཆུབ་སེམས། །དམ་པར་བདག་གིས་བསྐྱེད་པར་བགྱི། །སྡོམ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་རྣམས་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་གཟུང་བར་བགྱི། །བླ་ན་མེད་པའི་བྱང་ཆུབ་སེམས།།དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ།་དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱང་ངན་འདས་ལ་འགོད། _{།ཅེས་ལན་གསུམ། དེ་ནས།} རྒྱལ་བ་ཀུན་དངོས་བླ་མ་ལ། །ལུས་ངག་ཡིད་གསུམ་གུས་པའི་བློས། །སྤྲོ་བའི་སྙིམ་པ་དང་བཅས་པས། །རབ་ཏུ་བཏུད་དེ་གུས་ཕྱག་འཚལ། །དངོས་སུ་བཤམས་དང་ཡིད་ཀྱིས་སྤྲུལ། །ཕྱི་ནང་གསང་བ་བླ་མེད་པ། །མཆོད་སྤྲིན་རྒྱ་མཚོའི་ཚོགས་རྣམས་ཀུན། །རྣམ་པ་ཀུན་ཏུ་མཆོད་པ་འབུལ། །ཐོག་མེད་དུས་ནས་བསགས་པ་ཡི། །ཐུན་མོང་ཁྱད་པར་དང་འགལ་བའི། །མི་དགེ་བཅུ་སོགས་ཉེས་པའི་ཚོགས། །མ་ལུས་འགྱོད་པའི་སྒོ་ནས་བཤགས། །ནམ་མཁའི་མཐར་ཐུག་ཕྱོགས་ཀུན་ཏུ།། འགྲོ་ལ་ཕན་པར་མཛད་པ་ཡི། །དུས་གསུམ་རྒྱལ་བ་སྲས་བཅས་ལ། །དགའ་བའི་སེམས་ཀྱིས་རྗེས་ཡི་རང་། །སྣ་ཚོགས་ཚུལ་གྱིས་གདུལ་བྱ་ལ། །རང་རང་བསམ་པ་ཇི་ལྟར་བར། །ཟབ་པ་དང་ནི་རྒྱ་ཆེ་བའི། །ཐེག་ཆེན་ཆོས་འཁོར་བསྐོར་དུ་གསོལ། །སྐུ་གསུང་ཐུགས་ཀྱི་འཕྲིན་ལས་ཀྱི། །གསང་བ་བསམ་གྱིས་མི་ཁྱབ་པས། །ཇི་སྲིད་འཁོར་བ་དེ་སྲིད་དུ། །མྱ་ངན་མི་འདའ་བཞུགས་སུ་གསོལ། །བདག་གཞན་ཀུན་གྱིས་བསགས་པ་ཡི། །དུས་གསུམ་དགེ་བ་གཅིག་བསྡུས་ནས། །མར་གྱུར་འགྲོ་བ་མ་ལུས་པ། །བྱང་ཆུབ་སྙིང་པོ་ཐོབ་ཕྱིར་བསྔོ། །ནམ་མཁའི་དབྱིངས་རྣམས་ཀུན་ནས་གང་བའི་སྤོས་ཀྱི་ཆུ་གཏེར་འདོད་དགུའི་དཔལ་འབྱུང་རིན་ཆེན་པདྨོ་རིན་ཆེན་འོད་འབྱིན་རྒྱས་པས་ཁྱབ་པའི་སྙིང་པོ་ནོར་བུའི་ཁོར་ཡུག་གི། །ནང་ན་ཞིང་ཁམས་རྒྱ་མཚོའི་ས་གཞི་རིན་ཆེན་ལས་གྲུབ་རིམ་གྱིས་གཞོལ་བ་བཀོད་ལེགས་མ་ལུས་བཀོད་པའི་ཕུལ་གྱིས་འཇིག་རྟེན་ཁམས་རེ་རེའང་འདོད་ཡོན་རྨད་བྱུང་འཕྱུར་བ་གང་། །མཐའ་ཡས་སངས་རྒྱས་ཞིང་གིས་བསྐོར་ཞིང་ཀུན་བཟང་མཆོད་སྤྲིན་མ་ཚང་མེད་པའི་རྒྱན་གྱིས་རྣམ་པར་བརྒྱན་པའི་རྡུལ་རེར་རྒྱལ་བ་སྲས་བཅས་མཛད་པ་ཐམས་ཅད་སྣང་བ་ཅན། །གཅིག་ཏུ་འདུ་ཞིང་སོ་སོར་མ་འདྲེས་བྱིན་གྱིས་བརླབས་པའི་རྣམ་འཕྲུལ་ཇི་བཞིན་དེ་དག་བདག་གིས་དགེ་བའི་སེམས་ཀྱིས་སྤྲུལ་ཏེ་དཔལ་ལྡན་བླ་མར་དད་པས་འབུལ་བར་བགྱི། །ཞིང་ཁམས་རྒྱ་མཚོར་རྡུལ་རེར་རྡུལ་སྙེད་ཀྱི། །སངས་རྒྱས་ཞིང་དང་ཀུན་བཟང་མཆོད་པའི་སྤྲིན། །ཀུན་གྱིས་བརྒྱན་ལྡན་ཇི་སྙེད་འོད་འཕྲོའི་རྩེར། །རྒྱལ་བ་སྲས་བཅས་རྣམ་ཐར་ཀུན་སྣང་ཞིང་། །འཁོར་ཞིའི་འདོད་དགུ་མ་ཚང་མེད་འདུས་པ། །ཆོས་དབྱིངས་ཐམས་ཅད་རྒྱས་པར་འགེངས་པའི་འཕྲུལ། །ནམ་མཁའི་ཁམས་ཁྱབ་སྲིད་པའི་མཐར་གནས་ནས། །ཆོས་ཀྱི་རྒྱལ་པོ་མཆོད་པས་མཉེས་གྱུར་ཅིག །གུ་རུ་ཨི་དཾ་མཎྜལ་ཀཾ་ནིརྱ་ཏ་ཡཱ་མི། །མཉེས་བྱེད་མཎྜལ་བཟང་པོ་འདི་ཕུལ་བས། །བྱང་ཆུབ་ལམ་ལ་བར་ཆད་མི་འབྱུང་ཞིང་། །དུས་གསུམ་རྒྱལ་བའི་དགོངས་པ་རྫོགས་པ་དང་། །སྲིད་པར་མི་འཁྲུལ་ཞི་བར་མི་གནས་ཤིང་། །ནམ་མཁའ་དང་མཉམ་པའི་འགྲོ་རྣམས་སྒྲོལ་བར་ཤོག _{།ཅེས་མཎྜལ་ཕུལ། དེ་ནས་ཚོགས་ཞིང་བསྡུས་ནས་དགེ་རྩ་བསྔོ་བར་བྱའོ།། གཉིས་པ་འགལ་རྐྱེན་སྡིག་སྒྲིབ་སྦྱོང་བར་བྱེད་པ་རྡོ་རྗེ་སེམས་དཔའི་སྒོམ་བཟླས་ཀྱི་ཁྲིད་ནི།} རང་གི་སྤྱི་བོར་པཾ་ལས་པདྨ་འདབ་མ་བརྒྱད་པའི་ལྟེ་བར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་ལས་རྡོ་རྗེ་དཀར་པོ་རྩེ་ལྔ་པ་ལྟེ་བ་ལ་ཧཱུཾ་གིས་མཚན་པ་ལས་འོད་འཕྲོས། འཕགས་པ་མཆོད། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ཚུར་འདུས་ཧཱུྃ་ལ་ཐིམ། དེ་ཡོངས་སུ་གྱུར་པ་ལས་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཡུམ་རྡོ་རྗེ་སྙེམས་མ་དཀར་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། གཉིས་ཀའང་རུས་པ་དང་རིན་པོ་ཆེའི་རྒྱན་གྱིས་བརྒྱན་པ། ཞབས་རྡོ་རྗེ་སྐྱིལ་མོ་ཀྲུང་དུ་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོདའཕྲོས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྡོ་རྗེ་སེམས་དཔའ་ཡབ་ཡུམ་གྱི་རྣམ་པར་སྤྱན་དྲངས། ཛཿཧཱུྃ་བཾ་ཧོ༔ བཅོམ་ལྡན་འདས་བདག་དང་མཐའ་ཡས་པའི་སེམས་ཅན་ཐམས་ཅད་ཀྱི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། ཌྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོཥྱོ་མེ་བྷ་བ།ཨ་ནུ་རཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲི་བྷ་བ། མཧཱ་ས་མ་ཡ་སཏྭ་ཨཱ༔ མགོན་པོ་བདག་ནི་མི་ཤེས་རྨོངས་པ་ཡིས། དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག། གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ། །སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། ཅེས་གསོལ་བ་བཏབ་པས། རྡོ་རྗེ་སེམས་དཔའ་ཡབ་ཡུམ་འོད་དུ་ཞུ་ནས་རང་ལ་ཐིམ་པར་གྱུར། _{།ཅེས་བརྗོད་ཅིང་བསམ་མོ། གསུམ་པ་ཚོགས་རྫོགས་པར་བྱེད་པ་མཎྜལ་གྱི་ཁྲིད་ནི།} མདུན་གྱི་ནམ་མཁར་དག་པའི་ཞིང་ཁམས་རྒྱན་དང་བཀོད་པ་རྒྱ་མཚོའི་སྤྲིན་གྱིས་མཛེས་པར། རི་རབ་རིན་པོ་ཆེ་སྣ་བཞི་ལས་གྲུབ་པ་གྲུ་བཞི་བང་རིམ་བཞི་པའི་སྟེང་། སྣ་ཚོགས་པདྨ་འདབ་མ་བཞི་པའི་ལྟེ་བར། བདུད་དང་ལོག་པར་འདྲེན་པ་ཐམས་ཅད་ཟིལ་གྱིས་གནོན་ཞིང་འཇིགས་པ་དང་བྲལ་བའི་བརྡར་སེངྒེ་ཆེན་པོ་བརྒྱད་ཀྱིས་བཏེག་པའི་ཁྲིའི་སྟེང་དུ། ཉེས་པའི་སྐྱོན་གྱིས་མ་གོས་པའི་བརྡར་པདྨ་དང་། མ་རིག་པའི་མུན་པ་སེལ་བའི་བརྡར་ཟླ་བ་དང་། ཡེ་ཤེས་ཀྱི་སྣང་བ་རྒྱས་པའི་བརྡར་ཉི་མ་བརྩེགས་པའི་གདན་ལ། ཆོས་ཐམས་ཅད་ཀྱི་རྩ་བ་གཅིག་ཏུ་འདྲེས་པའི་བརྡར་རྩ་བའི་བླ་མ་རིགས་དྲུག་པ་རྡོ་རྗེ་འཆང་གི་ངོ་བོ། ཆོས་ཉིད་མི་འགྱུར་བའི་བརྡར་སྐུ་མདོག་སྔོན་པོ། སྟོང་པ་ཉིད་དང་སྙིང་རྗེ་གཉིས་སུ་མེད་པའི་བརྡར་རྡོ་རྗེ་དང་དྲིལ་བུ་བསྣོལ་ཐབས་སུ་འཛིན་པ། སྟོང་པ་ཉིད་ཀྱི་གདངས་བདེ་བར་ཤར་བའི་བརྡར་རྡོ་རྗེ་རྣལ་འབྱོར་དབང་མོ་སྐུ་མདོག་དམར་མོ་ལ། དགའ་བའི་ཆ་ཤས་ཡོངས་སུ་རྫོགས་པའི་བརྡར་དགའ་བའི་རྣམ་པར་འགྱུར་བས་དགྱེས་ཤིང་། རྣམ་པར་རྟོག་པ་གཅོད་པ་དང་བདེ་བ་སྐྱོང་བའི་བརྡར་གྲི་གུག་དང་ཐོད་པ་འཛིན་པ་དང་སྦྱོར་བ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པའི་བརྡར་ཕྱག་རྒྱ་དྲུག་གིས་བརྒྱན་ཅིང་། ཡོན་ཏན་མ་ལུས་པ་ཡོངས་སུ་རྫོགས་པའི་བརྡར་མཚན་དང་དཔེ་བྱད་རབ་ཏུ་གསལ་བར་རྫོགས་པ། ཟབ་པ་དང་རྒྱ་ཆེ་བའི་ཆོས་ཀྱི་མཛོད་འཛིན་པའི་བརྡར་གསུང་དབྱངས་ཡན་ལག་དྲུག་ཅུ་དང་ལྡན་ཞིང་། ཐུགས་ཇི་ལྟ་བ་རྟོགས་ཤིང་ཇི་སྙེད་པ་མཁྱེན་པའི་ཡེ་ཤེས་ལྔ་དང་ལྡན་པའི་བརྡར་དྲི་མ་མེད་པའི་འོད་ཟེར་ལྔ་མཁའ་ཁྱབ་ཏུ་འཕྲོ་བ། ཕྱོགས་ལས་རྣམ་པར་རྒྱལ་བའི་སྤྱོད་པ་ཅན་དུ་བཞུགས་པར་གྱུར། དེའི་མཐའ་སྐོར་དུ་དུས་གསུམ་གྱི་བླ་མའི་ཚོགས་ཀྱིས་བསྐོར་བ། མདུན་དུ་གླང་པོ་ཆེས་བཏེག་པའི་ཁྲི་པད་ཉིའི་གདན་ལ། བཅོམ་ལྡན་འདས་འཁོར་ལོ་སྡོམ་པ་ལ་ཡི་དམ་ལྷ་ཚོགས་ཀྱིས་བསྐོར་བ། ལྷོར་རྟས་བཏེག་པའི་ཁྲི་པད་ཟླའི་གདན་ལ། རྒྱལ་བ་ཤཱཀྱ་ཐུབ་པ་ལ་དུས་གསུམ་སངས་རྒྱས་རྣམས་ཀྱིས་བསྐོར་བ། །ནུབ་ཏུ་རྨ་བྱས་བཏེག་པའི་ཁྲི་པད་ཟླའི་གདན་ལ། ཡུམ་ཆེན་མོ་ལ་ལུང་རྟོགས་ཆོས་ཀྱིས་བསྐོར་བ། །བྱང་དུ་ཤང་ཤང་གིས་བཏེག་པའི་ཁྲི་པད་ཟླའི་གདན་ལ། །སྤྱན་རས་གཟིགས་ལ་ཐེག་པ་ཆེ་འབྲིང་ཆུང་གསུམ་གྱི་དགེ་འདུན་གྱིས་བསྐོར་བ། །མཐའ་སྐོར་དུ་ཆོས་སྐྱོང་སྲུང་མའི་ཚོགས་བཞུགས་པར་གྱུར། _{དེ་ནས་ཡན་ལག་བདུན་ལས། དང་པོ་ཕྱག་འཚལ་བའི་ཡན་ལག་ནི།} ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེངྒེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱི་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག། དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་བཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། བདེ་བར་གཤེགས་པ་ཐམས་ཅད་བདག་གིས་བསྟོད། _{།གཉིས་པ་མཆོད་པ་འབུལ་བ་ནི།} ཨོཾ་བཛྲ་བྷུ་མེ་ཨཱཿཧཱུཾ། དབང་ཆེན་གསེར་གྱི་ས་གཞི། ཨོཾ་བཛྲ་རེ་ཁེ་ཨཱཿཧཱུྃ། ཕྱི་ལྕགས་རི་ཁོར་ཡུག་གིས་བསྐོར་བའི་དབུས་སུ་རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་འཛམ་བུའི་གླིང་། ནུབ་བ་ལང་སྤྱོད། བྱང་སྒྲ་མི་སྙན། ཤར་དུ་ལུས་དང་ལུས་འཕགས། ལྷོར་རྔ་ཡབ་དང་རྔ་ཡབ་གཞན། ནུབ་ཏུ་གཡོ་ལྡན་དང་ལམ་མཆོག་འགྲོ། བྱང་དུ་སྒྲ་མི་སྙན་དང་སྒྲ་མི་སྙན་གྱི་ཟླ། འཁོར་ལོ་རིན་པོ་ཆེ། ནོར་བུ་རིན་པོ་ཆེ། བཙུན་མོ་རིན་པོ་ཆེ། བློན་པོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ། གཏེར་ཆེན་པོའི་བུམ་པ། ཉི་མ་ཟླ་བ། དབུས་སུ་ལྷ་དང་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་ཚང་ཞིང་ཡིད་དུ་འོང་བ་དང་བཅས་པ་འདི་ཉིད་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། དཀོན་མཆོག་རིན་པོ་ཆེ་རྣམ་པ་གསུམ། ཡི་དམ་དཀྱིལ་འཁོར་གྱི་ལྷ་ཚོགས་དཔའ་བོ་མཁའ་འགྲོ་དམ་པ་ཆོས་སྐྱོང་བའི་སྲུང་མ་འཁོར་དང་བཅས་པ་རྣམས་ལ་འབུལ་བར་བགྱི། ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བྱིན་གྱིས་བརླབ་ཏུ་གསོལ། གུ་རུ་ཨི་དམ་མཎྜ་ལ་ཀཾ་ནིརྱཏ་ཡཱ་མི། _{སྤྲོ་ན་ནམ་མཁའི་དབྱིངས་རྣམས་སོགས་དང་། སྐུ་གསུམ་ཡོངས་རྫོགས་སོགས་ཀྱང་དབུལ་བར་བྱའོ།} །མཉེས་བྱེད་མཎྜལ་བཟང་པོ་འདི་ཕུལ་བས། །བྱང་ཆུབ་ལམ་ལ་བར་ཆད་མི་འབྱུང་ཞིང་། །དུས་གསུམ་རྒྱལ་བའི་དགོངས་པ་རྫོགས་པ་དང་། །སྲིད་པར་མི་འཁྲུལ་ཞི་བར་མི་གནས་ཤིང་།།ནམ་མཁའ་དང་མཉམ་པའི་འགྲོ་རྣམས་སྒྲོལ་བར་ཤོག། _{ཅེས་བརྗོད།} མེ་ཏོག་དམ་པ་འཕྲེང་བ་དམ་པ་དང་།།སིལ་སྙན་རྣམས་དང་བྱུག་པ་གདུགས་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །བཀོད་པས་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། _{།གསུམ་པ་སྡིག་པ་བཤགས་པ་ནི། རྒྱས་པར་སྤྲོ་ན་བྱང་ཆུབ་ལྟུང་བཤགས། རྩ་ལྟུང་བཤགས་པ། བླ་མ་རྡོ་རྗེ་འཛིན་པ་སོགས་ཀྱང་བྱ་ཞིང་། དེ་ནས།} འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། _{།བཞི་པ་རྗེས་སུ་ཡི་རང་བའི་ཡན་ལག་ནི།} ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། _{།ལྔ་པ་ཆོས་ཀྱི་འཁོར་ལོ་བསྐོར་བར་བསྐུལ་བ་ནི།} གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག། །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། _{།དྲུག་པ་མྱ་ངན་ལས་མི་འདའ་བར་གསོལ་བ་ནི།} མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། _{།བདུན་པ་དགེ་བའི་རྩ་བ་བྱང་ཆུབ་ཏུ་བསྔོ་བ་ནི།} །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །མ་ནམ་མཁའ་དང་མཉམ་པའི་སེམས་ཅན་ཐམས་ཅད། །བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆི། །ཆོས་རྗེ་སངས་རྒྱས་རིན་པོ་ཆེ་ལ་སྐྱབས་སུ་མཆི། །དྲིན་ཅན་རྩ་བའི་བླ་མ་དམ་པ་དང་། །དངོས་གྲུབ་སྟེར་བའི་ཡི་དམ་ལྷ་ཡི་ཚོགས། །སྐྱབས་གནས་དམ་པ་དཀོན་མཆོག་གསུམ་པོ་ལ།། གུས་པས་ཕྱག་འཚལ་དད་པས་སྐྱབས་སུ་མཆི། །བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆི། །ཆོས་རྗེ་སངས་རྒྱས་རིན་པོ་ཆེ་ལ་སྐྱབས་སུ་མཆི། །རྡོ་རྗེ་འཆང་སོགས་དཀར་བརྒྱུད་བླ་མ་དང་། །བླ་མ་ཁྱེད་ཐུགས་འོད་གསལ་མཉམ་ཉིད་དུ། །དབྱེར་མེད་ཆོས་སྐུའི་ངང་དུ་རོ་གཅིག་པའི། །དཀར་བརྒྱུད་ཀུན་འདུས་བླ་མ་རིན་པོ་ཆེ། །བླ་མ༴། ཆོས་རྗེ༴ །ཞི་ཁྲོ་ཡབ་ཡུམ་དཀྱིལ་འཁོར་འཁོར་ལོའི་ཚོགས།།མོས་པ་བཞིན་དུ་ཐ་དད་དེར་སྣང་ནས། །མཆོག་དང་ཐུན་མོང་དངོས་གྲུབ་སྟེར་མཛད་པའི། །ཡི་དམ་ཀུན་འདུས་བླ་མ་རིན་པོ་ཆེ། །བླ་མ༴ །ཆོས་རྗེ༴ །ཕྱོགས་བཅུའི་སངས་རྒྱས་ཀུན་གྱི་ངོ་བོ་ཉིད། ཟབ་ཅིང་མཐའ་ཡས་ཆོས་རྣམས་ཀུན་གྱི་མཛོད། །རྒྱལ་སྲས་འཕགས་པའི་ཚོགས་རྣམས་འདུས་པའི་དཔྱིད། །དཀོན་མཆོག་གསུམ་འདུས་བླ་མ་རིན་པོ་ཆེ། །བླ་མ༴ །ཆོས་རྗེ༴ །དཔལ་ལྡན་བླ་མ་དྲན་པ་ཙམ་གྱིས་ཀྱང་། །རྐྱེན་དང་བར་ཆད་མི་མཐུན་ཕྱོགས་རྣམས་ཀུན། །བྱིན་རླབས་སྟོབས་ཀྱིས་མ་སྤངས་རང་སར་དག །ཆོས་སྐྱོང་རྒྱལ་པོ་བླ་མ་རིན་པོ་ཆེ། །བླ་མ༴། ཆོས་རྗེ༴ །འདི་དང་ཕྱི་མ་དུས་རྣམ་ཐམས་ཅད་དུ། །སྐྱབས་མགོན་རེ་ས་གཞན་ན་མ་མཆིས་པས། །བླ་མའི་མོས་གུས་གཅིག་པུས་ཆོག་པ་ཡི། །གཅིག་ཆོག་རྒྱལ་པོ་བླ་མ་རིན་པོ་ཆེ། །བླ་མ༴།ཆོས་རྗེ༴།དྲིན་ཅན་རྩ་བའི་བླ་མ་རིན་པོ་ཆེ། །བདག་སོགས་སྙིང་ཁར་པདྨོའི་ཟེའུ་འབྲུ་ལ། །འབྲལ་བ་མེད་པར་རྟག་པར་བཞུགས་ནས་ཀྱང་། །སྐུ་གསུང་ཐུགས་ཀྱིས་བྱིན་གྱིས་བརླབ་ཏུ་གསོལ།། བླ་མ༴ །ཆོས་རྗེ༴ །ཚད་གཟུང་མེད་པའི་ཐུགས་རྗེ་ཆེན་པོ་ཡིས། །འབྲལ་བ་མེད་པར་རྟག་པར་རྗེས་གཟུང་ནས། །ཁྱེད་ཀྱི་བཀའ་དྲིན་ཆེན་པོས་ལེགས་བསྐྱངས་ཏེ། །ཕྱག་རྒྱ་ཆེན་པོའི་དངོས་གྲུབ་སྩལ་དུ་གསོལ། །བླ་མ༴། ཆོས་རྗེ༴།བདག་དང་སློབ་མ་བརྒྱུད་པར་བཅས་པ་ཡིས། །གསོལ་བ་འདེབས་པའི་བུ་བརྒྱུད་ཐམས་ཅད་ཀྱིས། །བླ་མ་ཁྱེད་ཀྱི་རྣམ་ཐར་འཁྱོངས་པ་དང་།། དོན་གཉིས་འགྲུབ་པར་བྱིན་གྱིས་བརླབ་ཏུ་གསོལ། །བླ་མ༴། ཆོས་རྗེ༴། ཚེ་རབས་ཀུན་ཏུ་དཔལ་ལྡན་བླ་མ་དང་། །སྐད་ཅིག་ཙམ་ཡང་འབྲལ་བ་མེད་པ་རུ། །གུས་པའི་སྒོ་ནས་ཞབས་གཉིས་སྤྱི་བོར་ལེན། །ཅི་གསུངས་སྒྲུབ་པས་ཐུགས་དགོངས་རྫོགས་བྱས་ནས། །ས་དང་ལམ་གྱི་ཡོན་ཏན་རབ་རྫོགས་ཏེ། རྡོ་རྗེ་འཆང་གི་གོ་འཕང་མྱུར་ཐོབ་ཤོག། །བླམ༴ །ཆོས་རྗེ༴།དཔལ་ལྡན་བླ་མའི་རྣམ་པར་ཐར་པ་ལ། །སྐད་ཅིག་ཙམ་ཡང་ལོག་ལྟ་མི་སྐྱེ་ཞིང་། །ཅི་མཛད་ལེགས་པར་མཐོང་བའི་མོས་གུས་ཀྱིས། །བླ་མའི་བྱིན་རླབས་སྙིང་ལ་འཇུག་པར་ཤོག། །བླ་མ༴ །ཆོས་རྗེ༴། བླ་མ་སྐུ་ཁམས་བཟང་བར་གསོལ་བ་འདེབས། །མཆོག་ཏུ་སྐུ་ཚེ་རིང་བར་གསོལ་བ་འདེབས། །འཕྲིན་ལས་དར་ཞིང་རྒྱས་པར་གསོལ་བ་འདེབས། །བླ་མ་དང་འབྲལ་བ་མེད་པར་བྱིན་གྱིས་རློབས། །བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆི། །ཆོས་རྗེ་སངས་རྒྱས་རིན་པོ་ཆེ་ལ་སྐྱབས་སུ་མཆི། _{།སྤྲོ་ན་མ་ལུས་ཀུན་ཁྱབ་མ་སོགས་ཀྱང་བྱའོ། །མ་ནམ་བཞི་སྐོར་ཅི་རིགས་དང་བླ་མ་ངོ་བོ་ཉིད་སྐུའི་གསོལ་འདེབས་གང་མང་བྱས་ནས་ཚོགས་ཞིང་གཡས་བསྐོར་གྱིས་བསྡུས་ཏེ་རྩ་བའི་བླ་མ་ལ་བསྟིམ། དེ་རང་ལ་བསྟིམ་ནས་གཉིས་མེདཀྱི་ངང་དུ་བཞག་གོ། བཞི་པ་བྱིན་རླབས་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད་ནི།} ཨོཾ་སྭབྷཱ་ཝ་ཤུདྡྷཿསརྦ་དྷཱརྨཱཿསྭབྷཱཝ་ཤུདྡྷོཉཱཧཾ། རང་ཉིད་ཀྱི་ཕུང་པོ་ཁམས་དང་སྐྱེ་མཆེད་རྣམས་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས། རང་ཉིད་སྐད་ཅིག་གིས་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་པདྨ་རཱ་གའི་འོད་ལྟར་དམར་བ་ཞལ་གཅིག་ཕྱག་གཉིས་སྤྱན་གསུམ་མ། ཕྱག་གཡས་གྲི་གུག་འབར་བ་ནམ་མཁའི་མཐོངས་སུ་འཕྱར་བས་རྣམ་པར་རྟོག་པའི་ཟུག་རྔུ་མ་ལུས་པ་གཅོད་ཅིང་། གཡོན་ཐོད་པ་ཁྲག་གིས་གང་བ་ཐུགས་ཀར་འཛིན་པས་ཟག་པ་མེད་པའི་བདེ་བའི་རོས་ཚིམས་པར་མཛད་པ། མི་མགོ་སྐམ་པོ་ལྔའི་དབུ་རྒྱན་དང་། རློན་པ་ཁྲག་འཛག་པ་ལྔ་བཅུའི་དོ་ཤལ་བྱས་པ། ཐལ་ཆེན་སྤངས་པའི་ཕྱག་རྒྱ་ལྔས་བརྒྱན་ཅིང་། གྲུ་མོ་ན་ཡབ་ཧེ་རུ་ཀ་མཚོན་པའི་ཁ་ཊྲཾ་ག་བསྣམས་པ། གཅེར་བུ་བརྒྱད་གཉིས་ལོན་པའི་ལང་ཚོ་ཅན། ཞབས་གཡས་བསྐུམ་གཡོན་བརྐྱང་བས་སྲོག་བྲལ་བའི་སྙིང་ག་མནན་ཏེ་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་སྤྱི་བོའི་ཐད་ཀྱི་ནམ་མཁར་གྱད་དང་སེངྒེས་བཏེག་པའི་རིན་པོ་ཆེའི་ཁྲི་དར་གྱིས་ཀླུབས་པ། པདྨ་ཟླ་ཉི་བརྩེགས་པའི་གདན་ལ། རྩ་བའི་བླ་མ་སྐུ་བཞི་ཡེ་ཤེས་ལྔའི་བདག་ཉིད་རིགས་དྲུག་པ་ཁྱབ་བདག་རྒྱལ་བ་རྡོ་རྗེ་འཆང་ཆེན་པོ་དང་ཐ་མི་དད་པར་གསལ་བའི་སྤྱི་བོ་ནས་ཡར། བརྒྱུད་པའི་བླ་མ་རྡོ་རྗེ་འཆང་ལ་ཐུག་གི་བར་ཐོ་བརྩེགས་སུ་བཞུགས་པ། དེ་ཐམས་ཅད་ངོ་བོ་ཆོས་ཉིད་དག་པའི་ཀློང་དུ་གཅིག་པ། རྣམ་པ་གང་ལ་གང་འདུལ་གྱི་གཟུགས་ཀྱི་སྐུར་ཤར་བས། རྩ་བའི་བླ་མ་ནས་རྡོ་རྗེ་འཆང་ལ་ཐུག་གི་བར་དགོངས་པ་ལ་མཐོ་དམའ་དང་ཐུགས་རྗེ་ལ་བྲི་གང་མེད་པ་སངས་རྒྱས་ཉག་གཅིག་ཏུ་བཞུགས་པར་གྱུར། _{།ཅེས་བརྗོད་ཅིང་གསལ་བཏབ། ཕྱག་ཆེན་བརྒྱུད་པའི་གསོལ་འདེབས་ནི།} ན་མོ་མཧཱ་མུ་དྲ་ཡ། སྐུ་གསུམ་གྱི་འབྲས་བུ་སྨིན་པའི་ས། །གནས་འོག་མིན་ཆོས་དབྱིངས་ཕོ་བྲང་དུ། །ཆོས་སྐུ་རྡོ་རྗེ་འཆང་ཆེན་ལ་གསོལ་བ་འདེབས། །སེམས་ཉིད་ལྷན་སྐྱེས་ཀྱི་རང་ངོ་འཕྲོད་པ་དང་། །ལམ་གང་ཤར་ལ་སྤང་བླང་མེད་པ་དང་། །སྣང་སྲིད་སྐུ་གསུམ་དུ་འཆར་བར་བྱིན་གྱིས་རློབས། །བྱིན་རླབས་ཀྱི་ཆུ་བོ་འབབ་པའི་ས། །ཤར་ཟ་ཧོར་ནོར་བུའི་དགོན་པ་རུ། །ཏིལླི་ཤེས་རབ་བཟང་པོ་ལ་གསོལ་བ་འདེབས། །སེམས་ཉིད་ལྷན་སྐྱེས༴ །ལམ་གང་ཤར་ལ༴ །སྣང་སྲིད་སྐུ་གསུམ༴། དངོས་གྲུབ་ཀྱི་བདུད་རྩི་འབྱུང་བའི་ས། །བྱང་པུལླ་ཧ་རིའི་དགོན་པ་རུ།། མཁས་པ་ནཱ་རོ་པཎ་ཆེན་ལ་གསོལ་བ་འདེབས། །སེམས་ཉིད་ལྷན་སྐྱེས༴། ལམ་གང་ཤར་ལ༴ །སྣང་སྲིད་སྐུ་གསུམ༴ །མན་ངག་གི་རྒྱ་མཚོ་འཁྱིལ་བའི་ས། །ལྷོ་གྲོ་བོ་ལུང་གི་དགོན་པ་རུ། །སྒྲ་སྒྱུར་མར་པ་ལོ་ཙཱ་ལ་གསོལ་བ་འདེབས། །སེམས་ཉིད༴ །ལམ་གང༴ །སྣང་སྲིད་སྐུ་གསུམ༴ །སྒྲུབ་བརྒྱུད་ཀྱི་གངས་རི་ཆགས་པའི་ས། །ནུབ་ལ་ཕྱི་གངས་ཀྱི་རྭ་བ་རུ། །དབང་ཕྱུག་མི་ལ་རས་པ་ལ་གསོལ་བ་འདེབས། །སེམས་ཉིད༴ །ལམ་གང༴ །སྣང་སྲིད༴། དཀར་བརྒྱུད་ཀྱི་རི་དབང་བརྟན་པའི་ས། །ཤར་དྭགས་ལྷ་སྒམ་པོའི་དགོན་པ་རུ། །ཆོས་རྒྱལ་དྭགས་པོ་ལྷ་རྗེ་ལ༴ །སེམས༴ །ལམ༴ ། སྣང་སྲིད༴། ཁམས་གསུམ་གྱི་རྒྱལ་སྲིད་སྐྱོང་བའི་ས། །དཔལ་ཕག་མོ་གྲུ་ཡི་ནགས་ཁྲོད་དུ། །བདེ་གཤེགས་ཁམས་པ་རྡོར་རྒྱལ་ལ༴ །སེམས༴ །ལམ༴ །སྣང༴། གནས་ལུགས་ཀྱི་རྟོགས་པ་སྐྱོང་བའི་ས། །སྣ་ཕུ་ཆོས་ལུང་གི་དགོན་པ་རུ། གྲུབ་ཐོབ་གླིང་ཆེན་རས་པ་ལ་གསོལ་བ་འདེབས། །སེམས་ཉིད་ལྷན་སྐྱེས༴། ལམ་གང་ཤར༴།སྣང་སྲིད་སྐུ་གསུམ༴།བཤད་སྒྲུབ་ཀྱི་སྙིང་པོ་ལེནཔའི་ས། འབྲུག་ར་ལུང་གཉིས་ཀྱི་གདན་ས་རུ། །འགྲོ་མགོན་གཙང་པ་རྒྱ་རས་ལ། །སེམས༴ །ལམ༴ །སྣང༴ །ཆོས་བརྒྱད་ལ་རོ་སྙོམས་བྱེད་པའི་ས། །སྟག་རི་གངས་ཀྱི་རྭ་བ་རུ།།སངས་རྒྱས་དབོན་ཆེན་རས་པ་ལ༴ །སེམས༴ །ལམ༴།སྣང༴ །ལྷུན་གྲུབ་ཀྱི་རང་ས་འཛིན་པའི་ས། །གདན་ས་ཡ་བཞིའི་བཞུགས་གནས་སུ། །ཆོས་རྗེ་གཞོན་ནུ་སེངྒེ་ལ༴ །སེམས༴ །ལམ༴ །སྣང༴ །བདེ་ཆེན་གྱི་འཁོར་ལོས་སྒྱུར་བའི་ས། །ཡང་དགོན་རྒྱལ་པོའི་ཕོ་བྲང་དུ། །བྱང་སེམས་ཉི་མ་སེངྒེ་ལ༴ །སེམས༴ །ལམ༴ །སྣང་༴ །སྐྱེ་མེད་ཀྱི་ནམ་འཕངས་སྤྱོད་པའི་ས། །བར་འབྲོག་རྡོར་གླིང་གི་དགོན་པ་རུ། །ཆོས་རྗེ་རྡོ་རྗེ་གླིང་པ་ལ༴ །སེམས༴ །ལམ༴། སྣང་༴།ཟབ་རྒྱས་ཀྱི་ཆོས་སྒོ་འབྱེད་པའི་ས། །སྤོས་སྐྱ་དཔལ་གྱི་གཟིམས་ཁང་དུ། །མཚན་ལྡན་སྤོས་སྐྱ་པ་ཆེན་པོ་ལ༴ །སེམས༴ །ལམ༴ །སྣང༴ །ཐེག་ཆེན་གྱི་བསྟན་པ་དར་བའི་ས། །དཀར་བརྒྱུད་ཀྱི་གདན་ཁྲི་ཡངས་པ་རུ། །དྲིན་ཅན་བཅུ་གསུམ་པ་ཆེན་པོ་ལ༴། །སེམས༴། ལམ༴། སྣང༴།སྨིན་གྲོལ་གྱིས་སྐལ་ལྡན་ཚིམས་པའི་ས། །ཟབ་ཡངས་བདེ་ཆེན་གྱི་ཕུག་པ་རུ། །འཇམ་དབྱངས་ཀུན་དགའ་སེངྒེ༴། །སེམས༴།ལམ༴ །སྣང༴།བསླབ་གསུམ་གྱི་མེ་ཏོག་འཁྲུངས་པའི་ས། །གཞན་ཕན་གྱི་སྐྱེད་ཚལ་ཡངས་པ་རུ། །དྲིན་ཅན་བཛྲ་རཏཱ་ལ༴། སེམས༴། ལམ༴ །སྣང་༴ །འཁྲུལ་མེད་ཀྱི་ཉམས་མྱོང་འཆར་བའི་ས། །ཟབ་གསལ་གྱི་ཀུན་དགའ་ར་བ་རུ། །འཇམ་དབྱངས་བློ་གྲོས་སེངྒེ་ལ༴ ། སེམས༴ །ལམ༴ །སྣང༴། གནས་ལུགས་ཀྱི་རང་འོད་གསལ་བའི་ས།། གངས་ཆེན་གྱི་ལྟེ་བ་གངས་བཟངས་སུ། །མཉམ་མེད་མཁྱེན་བརྩེའི་རྟོགས་ལྡན་ལ༴ །སེམས༴ །ལམ༴ །སྣང་༴ །འཁོར་འདས་ལ་མཉམ་པར་སྤྱོད་པའི་ས། །རང་བྱུང་ལྷན་སྐྱེས་ཀྱི་ཕོ་བྲང་དུ། །འཇམ་དབྱངས་ཡེ་ཤེས་རིན་ཆེན་ལ༴ །སེམས༴ །ལམ༴ །སྣང༴། བདག་གཞན་གྱི་དགོས་འདོད་འབྱུང་བའི་ས། །མཉམ་ཉིད་ཀྱི་ཞིང་ཁམས་ཡངས་པ་རུ། །གྲུབ་ཆེན་བློ་གྲོས་མཆོག་ལྡན ལ༴ །སེམས༴ །ལམ༴ །སྣང༴ །སྐལ་ལྡན་གྱི་སེམས་རྒྱུད་གྲོལ་བའི་ས། །རང་རིག་ཡེ་ཤེས་ཀྱི་ཕོ་བྲང་དུ། །དྲིན་ཅན་ཤེས་རབ་བཟང་པོ་ལ། སེམས༴ །ལམ༴ །སྣང༴ །མཁྱེན་གཉིས་ཀྱི་ལོ་ཏོག་རྒྱས་པའི་ས། །རང་བཞིན་རྣམ་དག་གི་ཕོ་བྲང་དུ། །འཁྲུལ་ཞིག་ནམ་མཁའི་རྣལ་འབྱོར་ལ། སེམས༴ །ལམ༴ །སྣང༴ ། སྣང་གྲགས་རྣམས་ཆོས་སྐུར་རོལ་པའི་ས།། ཕྱོགས་བྲལ་གྱི་ནམ་མཁའ་ཡངས་པ་རུ། །མཚུངས་མེད་རྒྱལ་དབང་ཆོས་རྗེ་ལ༴ །སེམས༴ །ལམ༴ །སྣང༴ །སེམས་ཉིད་ཀྱི་གཏེར་ཁ་འབྱེད་པའི་ས།། སྟོང་ཉིད་སྙིང་རྗེའི་ཕོ་བྲང་དུ། །ངག་དབང་ཆོས་ཀྱི་རྒྱལ་པོ་ལ༴ །སེམས༴། ལམ༴ །སྣང༴ །བདེ་སྟོང་ལ་རྒྱུན་ཆད་མེད་པའི་ས། །གནས་རྡོ་རྗེ་བཙུན་མོའི་བྷ་ག་རུ། །ཡོངས་འཛིན་ངག་གི་དབང་ཕྱུག་ལ༴ །སེམས༴ །ལམ༴། སྣང༴ །ཚད་མེད་ཀྱི་ཐུགས་རྗེས་ཁྱབ་པའི་ས། །འཕྲིན་ལས་མཐའ་རྒྱས་ཀྱི་ཕོ་བྲང་དུ། །ཀུན་མཁྱེན་ངག་དབང་ནོར་བུ་ལ༴ །སེམས༴ །ལམ༴། སྣང་༴། །འཁོར་འདས་ཀྱི་བདེ་སྐྱིད་འབྱུང་བའི་ས། །སྣང་སྲིད་དབང་འདུས་ཀྱི་ཕོ་བྲང་དུ། །མི་ཕམ་ཆོས་ཀྱི་རྒྱལ་པོ་ལ༴ །སེམས༴ །ལམ༴ །སྣང༴། འདིར་སྣང་རྣམས་ཆོས་སྐུར་འཆར་བའི་ས། །གཉུག་མ་ལྷན་སྐྱེས་ཀྱི་ཕོ་བྲང་དུ། །ཁྱབ་བདག་བསྟན་པའི་ཉི་མ ལ༴ །སེམས༴ །ལམ༴ །སྣང༴ །འཁོར་འདས་རྣམས་ཆོས་སྐུར་རྟོགས་པའི་ས། །མཉམ་ཉིད་ཡེ་ཤེས་ཀྱི་ཕོ་བྲང་དུ།།མཁས་གྲུབ་ལྷ་དབང་བློ་གྲོས་ལ༴ །སེམས༴ །ལམ༴ །སྣང༴ །མ་རུངས་པའི་ཀླད་པ་འགེམས་པའི་ས། །ཐིམ་ཡུལ་གྱི་བདུད་འདུལ་ཕོ་བྲང་དུ། །ངག་དབང་བདུད་འཇོམས་རྡོ་རྗེ་ལ༴ །སེམས༴ །ལམ= །སྣང༴ །ཆོས་བརྒྱད་རྣམས་མཁའ་ལྟར་དག་པའི་ས། །སྣང་སེམས་དབྱེར་མེད་ཀྱི་ཕོ་བྲང་དུ།། མཁན་ཆེན་བསོད་ནམས་འོད་ཟེར་ལ༴ །སེམས༴ །ལམ༴། སྣང༴ །བྱིན་རླབས་ཀྱི་སྤྲིན་ཕུང་འཕྲོ་བའི་ས། །སྐུ་གསུམ་རྣམ་དག་གི་ཕོ་བྲང་དུ། ། མཚུངས་མེད་ངག་དབང་རྒྱལ་མཚན་ལ༴ །སེམས༴ །ལམ༴། སྣང༴། རྣམ་མཁྱེན་གྱི་འཁོར་ལོས་སྒྱུར་བའི་ས། །གནས་བྱ་རྒོད་ཕུང་པོའི་རི་བོ་རུ། །འདྲེན་མཆོག་ཤཱཀྱ་རིན་ཆེན ལ༴ །སེམས༴ །ལམ༴ །སྣང༴།འཁོར་འདས་དབྱེར་མེད་རྟོགས་པའི་ས། །གནས་ཟབ་ཡངས་མདོ་སྡེའི་བྲག་སྐྱིབས་སུ། །ངག་དབང་ཡོན་ཏན་མཐའ་ཡས་ལ༴ །སེམས༴ །ལམ༴ ། སྣང༴། ཆོས་བརྒྱད་ཀྱི་རྫུན་ཕུག་བརྡིབས་པའི་ས། །གཉུག་མའི་དྲན་རིག་གི་ལྡིང་ཁང་དུ། །རྗེ་བཙུན་འཇམ་དབྱངས་རྒྱལ་མཚན་ལ༴ །སེམས༴། ལམ༴། སྣང༴ །བརྟན་མཁས་ཀྱི་ཡོན་ཏན་རྫོགས་པའི་ས། །བསླབ་གསུམ་རྣམ་དག་གི་ཕོ་བྲང་དུ། །འཇམ་དཔལ་ཤེས་རབ་རྒྱལ་མཚན་ལ༴། སེམས༴ །ལམ༴། སྣང༴ །ལུང་རྟོགས་ཀྱི་འདབ་བརྒྱ་གྲོལ་བའི་ས། །བཤད་སྒྲུབ་ཆོས་ཀྱི་དགའ་ཚལ་དུ། །འདྲེན་མཆོག་ཤཱཀྱ་རྒྱལ་མཚན ལ༴ །སེམས༴ །ལམ༴།སྣང༴། མཐོང་ཐོས་ལ་དགེ་ལེགས་སྟེར་བའི་ས། །ཚད་མེད་ཐུགས་རྗེ་ཡི་ཕོ་བྲང་དུ། །མཐུ་ཆེན་འཇིགས་མེད་ཆོས་རྒྱལ་ལ་གསོལ་བ་འདེབས། །སེམས་ཉིད་ལྷན་སྐྱེས་ཀྱི་རང་ངོ་འཕྲོད་པ་དང་། །ལམ་གང་ཤར་ལ་སྤང་བླང་མེད་པ་དང་། །སྣང་སྲིད་སྐུ་གསུམ་དུ་འཆར་བར་བྱིན་གྱིས་རློབས། _{།ཞེས་པའི་བར་རམ། ཡང་ན་ཀུན་མཁྱེན་པདྨ་དཀར་པོའི་རྗེས་ཐོག་ཁོ་ནར།} རིས་མེད་ཀྱི་གདུལ་བྱ་སྐྱོང་བའི་ས། གནས་གར་བཞུགས་དོན་གྱི་འོག་མིན་དུ། །གྲུབ་དབང་ཤཱཀྱ་ཤྲཱི་ལ༴། །སེམས༴། ལམ༴།སྣང༴། _{།གང་ལྟར་ཡང་དེའི་འཕྲོར།} གྲུབ་རིགས་ཀྱིས་ནགས་ཁྲོད་འགེངས་པའི་ས། །ཤར་བདེ་ཆེན་གྲུབ་པའི་བསྟི་གནས་སུ། །ཁྱབ་བདག་བསྟན་འཛིན་རྒྱ་མཚོ་ལ༴ །སེམས༴ ། ལམ༴། སྣང༴ །ཚེ་གཅིག་ལ་སངས་རྒྱས་སྟེར་བའི་ས། །གནས་སྤྱི་གཙུག་ཉི་ཟླའི་གདན་སྟེངས་སུ། །དྲིན་ཅན་རྩ་བའི་བླ་མ་ལ་གསོལ་བ་འདེབས། །སེམས་ཉིད་ལྷན་སྐྱེས་ཀྱི་རང་ངོ་འཕྲོད་པ་དང་། །ལམ་གང་ཤར་ལ་སྤང་བླང་མེད་པ་དང་། །སྣང་སྲིད་སྐུ་གསུམ་དུ་འཆར་བར་བྱིན་གྱིས་བརློབས། །བླ་མ་འོག་མ་འོག་མའི་གདུངས་ཤུགས་ཀྱིས་གོང་མ་གོང་མ་རིམ་པ་བཞིན་འོད་དུ་ཞུ་ནས་རྩ་བའི་བླ་མ་ལ་ཐིམ་པར་གྱུར། _{།དེ་ནས་སྐབས་འདིར་སྤྲོ་ན་རྒྱལ་སྲས་ཐོགས་མེད་ཀྱིས་མཛད་པའི་གསོལ་འདེབས་འདི་ཡང་བྱ་སྟེ།} རྒྱལ་བའི་སྐུ་གསུང་ཐུགས་ཀྱི་ངོ་བོ་ཉིད། །ཡོན་ཏན་རིན་ཆེན་དཔག་ཏུ་མེད་པའི་གཏེར། །རྒྱ་ཆེ་རྒྱུན་མི་ཆད་པའི་འཕྲིན་ལས་ཅན། །ཆོས་རྗེ་རིན་པོ་ཆེ་ལ་གསོལ་བ་འདེབས། །འགྲོ་ཀུན་སྲིད་པའི་རྒྱ་མཚོ་ལས་སྒྲོལ་ཞིང་། །མྱང་འདས་དམན་པའི་གཡང་ས་རབ་སྤངས་ཏེ། །བླ་མེད་བྱང་ཆུབ་མཆོག་ལ་སྦྱོར་མཛད་བའི། །ཆོས་རྗེ་རིན་པོ་༴ ། སྐལ་དམན་སེམས་ཅན་འདུལ་བའི་དོན་གྱི་ཕྱིར། དུས་གསུམ་རྒྱལ་བའི་འཕྲིན་ལས་གཅིག་བསྡུས་ནས།ཐ་མལ་ཚུལ་གྱིས་འགྲོ་བ་འདུལ་མཛད་པའི། །ཆོས་རྗེ༴།བདེ་གཤེགས་མང་པོས་བསྒྲལ་བར་མ་ནུས་པའི། །དམུ་རྒོད་གདུལ་དཀའི་སེམས་ཅན་མང་པོ་རྣམས། །བརྒལ་དཀའ་འཁོར་བའི་མཚོ་ལས་སྒྲོལ་མཛད་པའི། །ཆོས་རྗེ༴། གང་ཞིག་གུས་པ་ཆེན་པོས་ཉེར་བསྟེན་ན།། གནས་སྐབས་མཐར་ཐུག་དགོས་འདོད་མ་ལུས་པ། །འབད་རྩོལ་མེད་པ་མྱུར་དུ་སྩོལ་མཛད་པའི། །ཆོས་རྗེ༴ །དོན་མེད་ཚེ་འདིའི་བྱ་བ་སྒྲུབ་སྒྲུབ་ནས། །དོན་ཆེན་ཡལ་བར་ཤོར་བའི་སྙིང་མེད་པོ། །དལ་འབྱོར་མི་ལུས་སྟོང་ལོག་བྱེད་ཉེན་གདའོ། །ཚེ་འདི་བློ་ཡིས་ཐོངས་པར་བྱིན་གྱིས་རློབས། །དེ་རིང་ཙམ་ཡང་མི་འཆིའི་གདེངས་མེད་ཀྱང་། །གཏན་དུ་སྡོད་གྲབས་བྱེད་པའི་ངང་རིང་པོ། །འཆི་ཁར་བྲང་ལག་འཐབ་མོ་འཆོར་ཉེན་གདའོ། །འཆི་བ་རྗེས་སུ་དྲན་པར་བྱིན་གྱིས་རློབས།།ད་ལྟའི་སྡུག་བསྔལ་ཕྲ་མོ་མི་བཟོད་ཀྱང་། ལས་འབྲས་ཁྱད་དུ་གསོད་པའི་སྙིང་ཁམས་ཅན། །འཇིགས་རུང་ངན་འགྲོའི་གཡང་སར་འཆོར་ཉེན་གདའོ། །ཉིན་མཚན་ཆོས་ཀྱིས་འདའ་བར་བྱིན་གྱིས་རློབས། །འགྲོ་བའི་སྡུག་བསྔལ་མཐོང་ཐོས་དྲན་གྱུར་ཀྱང་། །བ་སྤུ་གཡོ་འགུལ་མེད་པའི་སྙིང་རིང་པོ། །རང་གཞན་དོན་གཉིས་རེ་ཐག་ཆད་ཉེན་འདའོ། །བྱམས་དང་སྙིང་རྗེ་འབྱོངས་པར་བྱིན་གྱིས་རློབས། །གཞན་གནོད་གཞི་བཅས་སྤོང་བར་ཁས་བླངས་ནས། །དགྲ་ལ་སྡུག་ལས་ཐོང་བའི་ཕོ་རྒོད་པོ། །རང་གི་སྡོམ་གསུམ་ཡུལ་ནས་འདོན་ཉེན་གདའོ། །གནོད་སེམས་རྩད་ནས་ཐོན་པར་བྱིན་གྱིས་རློབས། །དགེ་སྦྱོར་ཆོས་བཞི་སྒྲུབ་པར་དམ་བཅས་ནས། །ཁ་དྲག་དབང་ཆེ་འདོད་པའི་ང་རྒྱལ་ཅན། །ཁས་བླངས་ཐོག་ཏུ་འཁེལ་བར་མི་གདའོ། །རྟག་ཏུ་དམན་ཆ་འཛིན་པར་བྱིན་གྱིས་རློབས། འགྲོ་ཀུན་ཕན་བདེ་སྒྲུབ་པར་ཁས་བླངས་ནས། །གཞན་གྱི་འབྱོར་ལ་ཁྲོ་བའི་ཕྲག་དོག་ཅན། །ཁས་ལེན་ཆེ་ལ་ཉམས་ལེན་ཆུང་བར་གདའོ། །གཞན་བདེ་དགའ་བ་སྐྱེ་བར་བྱིན་གྱིས་རློབས། །བདག་བས་གཞན་གཅེས་སྒོམ་པར་ཁས་བླངས་ནས། །གནོད་ལེན་གནོད་པས་འཇལ་བའི་ཞེ་བཞག་ཅན། །རང་གཞན་གཉིས་ཕུང་ལས་ལ་འཇུག་ཉེན་གདའོ། གནོད་ལེན་ཕན་པ་སྒྲུབ་པར་བྱིན་གྱིས་རློབས། །ཅིར་སྣང་བདེན་པ་མེད་ཅེས་ཚིག་སྨྲ་ཡང་། །བསྟོད་སྨད་ཙམ་ལ་དགའ་དང་མི་དགའ་སྐྱེ། །ཉམས་ལེན་ཕྱོགས་ཙམ་འགྲུབ་པར་མི་གདའོ། །བདག་འཛིན་རྩད་ནས་ཐོན་པར་བྱིན་གྱིས་རློབས། །ཐོག་མེད་དུས་ཀྱི་དྲིན་ཅན་ཕ་མ་རྣམས། །བཟོད་དཀའི་སྡུག་བསྔལ་དྲག་པོས་གདུངས་གྱུར་ཀྱང་། །བདག་ལ་སྐྱོབ་པའི་ནུས་པ་མི་གདའོ། །མཁྱེན་བརྩེ་ནུས་ལྡན་ཁྱེད་ཀྱིས་ཐུགས་རྗེསཟུངས། །ཚ་བས་གདུངས་ཚེ་བསིལ་བྱེད་དྲིན་ཅན་རྣམས།། དམྱལ་མེ་བཟོད་དཀས་ཡུན་རིང་བསྲེགས་གྱུར་ཀྱང་། །བླུན་པོ་བདག་གིས་ཅུང་ཟད་སྐྱོབ་མ་ནུས། །དེ་དག་མྱུར་དུ་སྐྱོབས་ཤིག་ཐུགས་རྗེ་ཅན། །ལུས་ཀྱི་དྲོད་ཀྱིས་བདག་ལུས་བསྐྱངས་པའི་མ། །གྲང་བས་ཉེན་ནས་ཤ་རུས་གས་གྱུར་ཀྱང་། །བདག་གིས་ཅུང་ཟད་བསྐྱབ་པར་མ་ནུས་པས། །དེ་དག་མྱུར་དུ་སྐྱོབས་ཤིག་ཐུགས་རྗེ་ཅན། །ཡང་ཡང་ནུ་ཞོས་སྐྱོང་བྱེད་མ་རྣམས་ཀྱིས། །ལོ་བརྒྱར་ཟས་སྐོམ་རྙེད་པར་མ་གྱུར་ཀྱང་། །ཆུ་ཐིགས་ཙམ་ཡང་སྦྱིན་པར་མ་ནུས་སོ། །དེ་དག་མྱུར་དུ་སྐྱོབས་ཤིག་ཐུགས་རྗེ་ཅན། །གཅིག་ལ་གཅིག་ཟ་མི་སྡུག་ཕྲད་པ་དང་། །སྡུག་དང་བྲལ་དང་སྐྱེ་རྒ་ན་འཆི་སོགས། །སྡུག་བསྔལ་མང་པོས་ཉམ་ཐག་འགྲོ་བ་རྣམས། །མྱུར་དུ་སྐྱོབས་ཤིག་ཚད་མེད་ཐུགས་རྗེ་ཅན། །སྲིད་པའི་བཙོན་རར་སྡུག་བསྔལ་མང་པོས་གཟིར། །ལས་དང་ཉོན་མོངས་འཆིང་བ་དམ་པོས་བཅིངས། །མགོན་སྐྱབས་མེད་པའི་འགྲོ་བ་འདི་རྣམས་ཀྱི། །མགོན་སྐྱབས་མཛོད་ཅིག་ཚད་མེད་ཐུགས་རྗེ་ཅན། _{།ཞེས་གདུང་བ་དྲག་པོས་གསོལ་བ་བཏབ་བོ། །དེ་ནས་དབང་བཞི་ལེན་པའི་དམིགས་པ་དང་བསྟུན།} མཚན་རྣམས་ཡོངས་རྫོགས་བླ་མའི་སྐུ། །སྤྱི་བོར་ལུས་ཀྱི་ཐིག་ལེ་ལ། །ཞུགས་ནས་བུམ་དབང་དགའ་བའི་ཆུས། །སད་པའི་དྲི་མ་སྦྱང་དུ་གསོལ། །ལོངས་སྤྱོད་རྫོགས་པ་ཀུན་གྱི་སྐད། །མགྲིན་པར་ངག་གི་ཐིག་ལེ་ལ། །ཞུགས་ནས་གསང་དབང་མཆོག་དགའི་མེས། །རྨི་ལམ་བག་ཆགས་སྲེག་ཏུ་གསོལ། །དཔལ་ལྡན་བླ་མ་ཆོས་ཀྱི་སྐུ། །སྙིང་ཁར་སེམས་ཀྱི་ཐིག་ལེ་ལ། །ཞུགས་ནས་ཤེས་རབ་ཡེ་ཤེས་ཉིས། །གཉིད་འཐུག་མུན་པ་སེལ་དུ་གསོལ། །མགོན་པོ་ལྷན་ཅིག་སྐྱེས་པའི་སྐུ། །ལྟེ་བར་ཡེ་ཤེས་ཐིག་ལེ་ལ། །ཞུགས་ནས་བཞི་པའི་དབང་བསྐུར་བས། །འཕོ་མེད་ཐོབ་པར་བྱིན་གྱིས་རློབས། །དེ་ལྟར་བདག་དང་འགྲོ་རྣམས་ཀྱི། །ལུས་ངག་ཡིད་དང་ཡེ་ཤེས་ཚོགས། །རྡོ་རྗེ་བཞི་དང་མཉམ་སྦྱོར་བས། །སྐུ་བཞིའི་དབང་ཕྱུག་ཐོབ་པར་ཤོག །མཐར་བླ་མ་གདན་ཁྲི་དང་བཅས་པ་འོད་དུ་ཞུ་ནས་རང་ལ་ཐིམ་པར་གྱུར། _{།ཞེས་བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་ཆོས་ཀྱི་དབྱིངས་ཀྱི་རང་བཞིན་དབྱེར་མེད་པའི་ངང་ལ་ལྷོད་ཀྱིས་གློད་ལ་གཞག་གོ །མཐར་དགེ་བ་བསྔོ། སྨོན་ལམ་རྒྱ་ཆེར་གདབ་པར་བྱའོ།། །།} ༈ རྟེན་འབྲེལ་རབ་བདུན་མའི་ཁྲིད་ཀྱི་ཐུན་བཏང་ལུགས་ནི། _{ཐོག་མར་ཚོགས་ཞིང་བསྐྱེད་དེ་} ཕྱོགས་བཅུར་བཞུགས་པའི་བླ་མ་དང་། _{།སོགས་ལན་གསུམ་གྱིས་སྐྱབས་འགྲོ་དང་།} ཇི་ལྟར་དུས་གསུམ་མགོན་པོ་རྣམས། _{།སོགས་ཀྱིས་སེམས་བསྐྱེད་བྱ། དེ་ནས།} མ་ནམ་མཁའ་དང་མཉམ་པའི་སེམས་ཅན་ཐམས་ཅད་ _{སོགས་བཞི་སྐོར་ཚར་བདུན།} སེམས་ཅན་ཐམས་ཅད་ཀྱི་ཆེད་དུ་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་དམ་པའི་ཆོས་ཐམས་ཅད་ཀྱི་སྙིང་པོ་རྟེན་ཅིང་འབྲེལ་བར་འབྱུང་བའི་དོན་ཟབ་མོ་བསྒོམ་པ་ལ་འཇུག་པར་བྱའོ། །དགེ་བའི་རྩ་བ་འདི་ལ་རྟེན་ནས་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག། །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་བྲལ་བར་གྱུར་ཅིག། །བདེ་སྡུག་གི་རྒྱུ་ཆགས་སྡང་ཉེ་རིང་དང་བྲལ་བའི་བཏང་སྙོམས་ཚད་མེད་པ་ལ་ཡུན་རིང་དུ་གནས་པར་གྱུར་ཅིག། _{།ལན་བདུན་བརྗོད། དེ་ནས་རྡོར་སེམས་སྒོམ་བཟླས་ཡིག་བརྒྱ་ཅི་རིགས་བཟླས།} །ཇི་སྙེད་སུ་དག་ཕྱོགས་བཅུའི་འཇིག་རྟེན། _{།སོགས་ནས།} བདེ་བར་གཤེགས་པ་ཐམས་ཅད་བདག་གིས་བསྟོད། _{།ཞེས་པའི་བར་འདོན་བཞིན་པར་ཕྱག་བདུན་བཙལ། བསྐོར་བ་བདུན་བསྐོར་ས་ཡོད་ན་དངོས་དང་མེད་ན་ཡིད་ཀྱིས་བྱ། མཎྜལ་ཚར་བདུན་འབུལ།} མེ་ཏོག་དམ་པ་ཕྲེང་བ་དམ་པ་དང་། _{།སོགས་ནས།} ཐམས་ཅད་བདག་གིས་བྱང་ཆུབ་ཕྱིར་བསྔོ། _{།ཞེས་པའི་བར་བྱ། དེ་རྗེས།} རྒྱལ་བ་ཀུན་དངོས་བླ་མ་ལ། _{།ཞེས་སོགས་ཡན་ལག་བདུན་པ་དྲུག་བཅས་ཡན་ལག་བདུན་པ་ཚར་བདུན། དེ་ནས་ཚོགས་ཞིང་བསྡུ། རང་ལ་བསྟིམ། རངཉིད་གཞུང་བཞིན་སྟོན་པའི་སྐུར་གསལ།} སྤྱི་བོའི་ཐད་ཀྱི་ནམ་མཁར་གྱད་དང་སེངྒེས་བཏེག་པའི་རིན་པོ་ཆེའི་ཁྲི་དར་གྱིས་ཀླུབས་པ། པདྨ་ཉི་ཟླ་བརྩེགས་པའི་གདན་ལ་རྩ་བའི་བླ་མ་སྟོན་པ་སངས་རྒྱས་ཀྱི་སྐུར་གསལ་བའི་དབུ་ཐོག་ནས་ཡར། བརྒྱུད་པའི་བླ་མ་སངས་རྒྱས་རྣམ་པར་གཟིགས་ཀྱི་བར་ཐོ་བརྩེགས་སུ་བཞུགས་པ་སོགས་ཕྱག་ཆེན་བླ་མའི་རྣལ་འབྱོར་གྱི་སྐབས་དང་འདྲ་བར། སངས་རྒྱས་ཉག་གཅིག་ཏུ་བཞུགས་པར་གྱུར། _{།ཅེས་པའི་བར་བརྗོད། དེ་ནས་རྟེན་འབྲེལ་བརྒྱུད་པའི་གསོལ་འདེབས་བྱས་རྗེས།} བླ་མ་འོག་མ་འོག་མའི་གདུང་ཤུགས _{་སོགས་ནས།} རྩ་བའི་བླ་མ་ལ་ཐིམ་པར་གྱུར། _{ཅེས་པའི་བར་དང་། དེ་རྗེས་བླ་མ་ངོ་བོ་ཉིད་སྐུའི་གསོལ་འདེབས་ཚར་བདུན།} སྐྱེ་མེད་ལ་བརྟན་པ་ཐོབ་པར་བྱིན་གྱིས་རློབས། །འགག་མེད་ལ་རྩལ་འབྱོངས་པར་བྱིན་གྱིས་རློབས། །ཇི་ལྟ་བའི་གནས་ལུགས་རྟོགས་པར་བྱིན་གྱིས་རློབས། །ཇི་སྙེད་པའི་རྟེན་འབྲེལ་འཆར་བར་བྱིན་གྱིས་རློབས། །སྣང་བ་རྟེན་འབྲེལ་དུ་འཆར་བར་བྱིན་གྱིས་རློབས། _{།མཆོག་གི་དངོས་གྲུབ་ཐོབ་པར་བྱིན་གྱིས་རློབས། །ཞེས་ལན་བདུན། དེ་ནས་དབང་བཞི་བླངས་ཏེ། བླ་མ་རང་ལ་བསྟིམ། རང་ཉིད་སྟོན་པའི་སྐུར་སྒོམ་ཞིང་ཟླ་བའི་དཀྱིལ་འཁོར་གསལ་གདབ་པ་སོགས་མཉམ་གཞག་ལ་འཇུག་པརབྱའོ། །ཅེས་རྗེ་བཙུན་གོང་མ་རྣམས་ཀྱི་ཞལ་ནས་སྙན་དུ་བརྒྱུད་པའི་ཐུན་གྱི་ཆོག་ཁྲིགས་རང་བཟོའི་རྙོག་པ་མེད་པར་ཤཱཀྱའི་དགེ་སློང་དཔལ་ཤཱཀྱ་རིན་ཆེན་དྲི་མེད་ལེགས་པའི་བློ་གྲོས་ཀྱིས་བསྡེབས་པ་འདིས་ཀྱང་སྙིང་པོའི་བསྟན་པ་སྒྲུབ་བརྒྱུད་རིན་པོ་ཆེ་གོང་ནས་གོང་དུ་འཕེལ་ཞིང་རྒྱས་པའི་རྒྱུར་གྱུར་ཅིག། །།} Reference

དཔལ་ལྡན་འབྲུག་པའི་གསུང་རབ། ༢༠༠༩ དཔལ་ལྡན་འབྲུག་པའི་ལུགས་ཀྱི་ཞལ་འདོན་ཕྱོགས་བསྡེབས་བྱང་ཆུབ་མགྲོད་པའི་ལམ་བཟང་ཞེས་བྱ་བ་བཞུགས་སོ། ཏཱའི་པེ། ཏཱའི་ཝཱན།