Handrij Zejler jo pisał wjele serbskich basnjow.
How su někotare kenž su wjelgin wažne za drogu wuwiśa lyrikarja.
Gaśiš rěku wob źeń a tež w nocy,
zdźaržaś njamogu ju žedne mocy,
skoro brjogi pśemožo,
skoro swoj puś poběgnjo.
Dlej tam rěku źaržyš zagaśonu,
z wětšej' mocu pozdźej rozgorjonu
wiźiš, kak kraj spowrośi,
pśedrě wšo a powodni.
To cas-gaśarje daś błazne wuknu,
kak jich gaśenja se jěsno puknu,
kenž wše mocy duchowe
w pytach zdźaržaś mysle se.
Zlosći śamnikow a zagrimanja,
stśělby, spěranja a wobaranja
stajiś, wrośiś njamogu
žednu mysl postupnu.
Cas a duch se njedatej juž' gaśiś,
jeju słowa, kazni deje płaśiś:
Swětło, pšawda, lichotnosć-
dobydnu a budu rosć!
Proca śamnikow a pominanje
nigdy njemějaštej žognowanje:
Maz to maz pśec' wostanjo,
balzam nigdy njebuźo! [1]
Słyńco, woła słynica
w chłodkowatem rogu.
Kak mam rosć a rozkwisßc ja,
kaž to kwěty mogu?
Pšawje maš, ow kwětulka,
sy tež k tomu stworjona!
A ty, ducho cłowjeski,
na com lažy tebje?
Njejsy kwětam k rownosći?
Groń, so žycyš sebje?
Ja śi słyšym zašumiś
a mě z głosom wotgroniś:
Lichotu, mě lichotu
město słyńca dajśo!
Pyta, komot, robotu
zrazom rozłamajśo!
Což jo z boga roźone,
byś dej teke lichotne! [2]
Lubka lelujo,
rědnje zakwitła!
Źowćo brune, brune wocko, seń se ku mnjo!
Moja lubosć sy a duša we mnjo.
Gaž śi njewiźim,
ja se potužym.
Źowćo brune, brune wocko, seń se ku mnjo!
Moja lubosć sy a duša we mnjo.
Rědnym janźelam,
tebje pśirownam.
Źowćo brune, brune wocko, seń se ku mnjo!
Moja lubosć sy a duša we mnjo.
Tešnosć zajšpiwam,
gaž śi wopoškam.
Źowćo brune, brune wocko, seń se ku mnjo!
Moja lubosć sy a duša we mnjo.
Mojo bogatstwo
twoja lubosć jo.
Źowćo brune, brune wocko, seń se ku mnjo!
Moja lubosć sy a duša we mnjo.
Skerjej wumrěś kśěł,
gaž śi njeby měł.
Źowćo brune, brune wocko, seń se ku mnjo!
Moja lubosć sy a duša we mnjo. [3]
Rědna Łužyca,
spšawna, pśijazna,
mojich serbskich woścow kraj,
mojich glucnych myslow raj,
swěte su mě twoje strony!
Bitwu bijachu,
twardu, zeleznu,
něga wośce serbojske
wojnske spěwy spěwy spěwaj'cy.
Chto mě zbada toś te spěwy?
Tužny syłojik
ma něnt Gromadnik,
sowa suta z Orašice,
ma tam swoje šćerbiny.
Wjele pomnitej wej gorje?
Boga Carnego
stare kralejstwo
wron něnt kradu wobsejźi;
stary mech se zeleni
na skale, kenž wołtaŕ běšo.
Luda dobrośi
njejsu zgodali
tam te stare godaki.
Serbam pśichod wonaki
cas něnt njepšašany wěšći.
Cas, ty pśiducy,
zakwiś radosny,
aby z klina twojogo
wjele mužow stanuło,
godnych nimjer wobspomnjeśa! [4]
[1] Handrij Zejler: Spěwaś njejsom zabył, Ludowe nakładnistwo Domowina Budyšyn, 1974, S.51
[2] Handrij Zejler: Spěwaś njejsom zabył, Ludowe nakładnistwo Domowina Budyšyn, 1974, S.40
[3] Handrij Zejler: Spěwaś njejsom zabył, Ludowe nakładnistwo Domowina Budyšyn, 1974, S.13
[4] Handrij Zejler: Spěwaś njejsom zabył, Ludowe nakładnistwo Domowina Budyšyn, 1974, S.11/12
This article uses material from the Wikipedia Dolnoserbski article Basni Handrija Zejlera, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wopśimjeśe stoj pód CC BY-SA 4.0 k dispoziciji, jolic njejo se hynac pódało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Dolnoserbski (DUHOCTRUNGQUOC.VN) is an independent company and has no affiliation with Wiki Foundation.