2018年重慶萬州公交車逿江事故是著2018年10月28號早頭10點蜀字半發生其中國重慶市萬州區萬州長江二橋其蜀起交通事故。當時,一架萬州公交22路公交車(環湖線,起點共终點都是「港口站」)趁長江南岸其江南新區開遘北岸萬州城區,車開遘萬州長江二橋中段辰候,公交車含不時筅過墿臺中實线,鏨遘對面正常開車其紅色小車,逿落長江。之後,公開其車底裡其錄像顯示,許蜀芘辰候司機其乘客大拍起去,司机向左邊大轉方向盤,結果公交逿落長江。事故造成包括司機其15隻儂都死去。
2018年10月28號早頭10點蜀字半,司機冉涌開蜀架22路公交車(渝F27085號大型普通客車)趁江南新區向北濱路開。車開遘萬州長江二橋中段辰候,含不時筅過墿臺中實線,共鄺某某開其趁城區開遘江南新區其紅色小車對鏨,仱公交車鏨斷護欄逿落長江。事故公交車其公司是重慶市萬州汽車運輸(集團)有限責任公司萬州公交分公司。事故小車底裡㑚有司機,事故造成小車報廢,小車司機受傷。
事故發生地點萬州長江二橋著2004年9月通車,橋懸頂其墿變成雙向四線道,寬度20米,固加設有道路中心實線。有蜀隻工程師表示,萬州長江二橋敆2001年開始建,當時建其護欄達𣍐遘現在其標準。如果按現在其標準來加固,公交車𣍐逿江𡅏。
事故發生以後,重慶市萬州區公安局交巡警支隊將小車司機鄺某某控制,仱就共鄺某某送遘北山中西醫結合醫院治療。10月30號,鄺某某丈夫熊某共媒體講老嬤已經解除控制,平安轉厝。
重慶市公安消防總隊派出50名人員、5架消防車、2架衝鋒舟遘現場救援,水上支队共其他支隊也為增援現場作準備。通過聲吶已經確定逿江公交車其位置。中央方面,中華人民共和國應急管理部黨組書記黃明馬上使視頻連線來指揮調度,介協調各部門參加救援工作,同時應急管理部副部長孫華山帶隊去事發現場指導救援處置。此外,藍天救援也参加救援。
萬州長江二橋敆事故發生以後馬上全面封橋,包括22路其所有過橋線路都調整運行。
10月30號暝晡,潛水員敆公交車底裡討著行車數據記錄儀,拆出以後著31號過暝打撈出水。31號早頭7點9字,開始每蜀段吊下纜繩等裝備,由潛水員拴套共固定公交車;暝晡23點5字半,逿江公交車出水。
事故調查工作敆事發以後開展,參加部門包括交通運輸部共重慶市共萬州區各級公安機關。11月2日10點,重慶市人民政府舉行新聞通氣會,公布公交車逿江原因:結合救援工作臺中打撈出其行車記錄儀存儲卡其數據共事發先周邊其車共群眾其記錄共描述,確定茲芘事故原因是公交車底裡蜀隻乘客劉桂平(女,48歲,萬州區儂)因為𣍐八公交線路已經改道固加無察司機冉涌(男,42歲,萬州區儂)其報站提醒,坐車過站以後共冉涌冤家超過五分鐘,車開遘萬州長江二橋辰候趁冤家變成相拍,介過兩秒以後司機冉涌失去對公交車其控制,造成公交車筅過中線以後鏨著對面其正常開車其紅色小車共護欄以後逿遘長江底裡。警方通報固表示,司機冉涌無食酒,精神正常,路況共車況都真好。乘客劉某共公交司機冉涌都犯下危害公共安全罪,但是因為兩隻儂都死了故此無追究。
This article uses material from the Wikipedia Mìng-dĕ̤ng-ngṳ̄ article 2018年重慶萬州公交車逿江事故, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Nā bô lēng-gōa kóng, chiàu CC BY-SA 4.0 thang īng. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Mìng-dĕ̤ng-ngṳ̄ (DUHOCTRUNGQUOC.VN) is an independent company and has no affiliation with Wiki Foundation.