Jean-Bedel Bokassa (22 a viz C'hwevrer 1921 - 3 a viz Du 1996) a oa ur soudard hag ur politikour eus ar Republik Kreizafrikan, bet prezidant hag impalaer ar vro en anv Bokassa Iañ.
Goude bezañ bet soudard en arme c'hall e tistroas d'e vro ma voe lakaet e penn an arme gant David Dacko, prezidant ar Stad nevez. D'an 31 a viz Kerzu 1965 e tistroadas Dacko ha mont da brezidant ar Republik Kreizafrikan. Priziet-mat e oa gant ar C'hallaoued daoust ma kase e vro war-zu un diktatouriezh feuls. E miz Meurzh 1972 en em lakaas da brezidant buhez-pad.
Embann a reas ur Vonreizh nevez d'ar 4 a viz Kerzu 1976 ha disklêriañ e teue ar vro da vezañ un impalaeriezh. Bamet gant Napoléon Bonaparte e tivizas bezañ sakret impalaer e miz Kerzu 1977. Ne zeuas penn-Stad ebet d'e sakradur hag a voe ul lid koustus-mat, arc'hantaouet evit un darn anezhañ gant Mouammar Kadhafi.
E miz Genver 1979 e kemeras perzh e lazhadeg skolidi hag a oa bet harzet goude ur vanifestadeg e Bangui. D'an 20 a viz Gwengolo 1979 e voe aozet taol Barracuda gant ar servijoù kuzh gall pa oa Bokassa e Libia. D'an deiz war-lerc'h e oa lakaet David Dacko da brezidant en-dro ha disklêriet diskar an impalaeriezh Kreizafrikan ha distro ar republik. Bokassa a gavas repu en Aod an Olifant hag e Pariz a-raok distreiñ da Vangui e 1986. Eno e voe barnet ha kondaonet d'an toull-bac'h buhez-pad met dieubet e voe gant André Koulingba e 1993.
This article uses material from the Wikipedia Brezhoneg article Jean-Bedel Bokassa, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Danvez a c'haller implijout dindan CC BY-SA 4.0 nemet ha notet e vefe ar c'hontrol. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Brezhoneg (DUHOCTRUNGQUOC.VN) is an independent company and has no affiliation with Wiki Foundation.