Clara Lim-Sylianco

Lim-Sylianco (18 Agosto 1925 – 23 Hulyo 2013) iyo sarong Filipinong kimiko na piggawadan nin titulong Nasyunal na Siyentista kan Filipinas kaidtong 1994. An mga pag-aadal ni Lim-Sylianco iyo nakapokus sa mutagens, antimutagens, asin mga biyo-organikong mekanismo. Nagpublikar siya nin mga artikulo, libro, asin monograpo sa organikong kimika, biyokimika, henetikong toksikolohiyo, asin molekular na nutrisyon. Bilang sarong paratukdo, si Lim-Sylianco iyo nakasurat na nin mga libro na ginagamit bilang toltolang teksto sa mga kurso nin pankolehiyong kimika sa Filipinas.

Clara Y. Lim-Sylianco
Kamundagan	(1925-08-18)Agosto 18, 1925 Syudad nin Guihulngan, Negros Oriental, Philippines
Kagadanan	23 Hulyo 2013(2013-07-23) (edad 87)
Nasyunalidad	Filipino
Alma mater	Silliman University (B.S., 1949) Unibersidad kan Pilipinas (M.S., 1953) University of Iowa (Ph.D., 1957)
Trabaho	Kimiko
Midbid bilang	Organikong kimika Biyokimika

Si Lim-Sylianco iyo nakaresibe nin asosasyong degri para sa pre-medisinang programa sa Siliman University kaidtong 1947. Alagad, nagbalyo siya hale sa dalang Medisina tulos para magpursigi nin batsilyer na degri sa Kimika, kun sain siya nakapagtapos bilang magna cum laude kan 1949. Si Lim-Sylianco dagos nagpursigi nin masteral sa Kimika sa Unibersidad kan Pilipinas kan 1949. Nagtrabaho siya bilang sarong research assistant hasta 1951 sagkod nagin paratukdo hasta siya makapagtapos kan 1953. Pagkatapos niyang maresibe an iskolarship sa Fulbright, nagpasiring siya sa Estados Unidos para magpursigi nin doktoral na pag-aadal sa biyokimika asin organikong kimika sa University of Iowa. Saro siyang research assistant sa Departamento nin Pedyatriko kan unibersidad poon 1953 hasta 1955 asin sarong research fellow sa Departmento nin Biyokimika poon 1955 hasta 1957.

Si Lim-Sylianco nagbalik liwat ngarig magtukdo sa mga departamento nin kimika asin biyokimika kan Unibersidad kan Pilipinas kan 1957. Poon 1970 hasta 1973, nagsirbe siya bilang sarong konsultant para sa Nasyunal na Instituto nin Siyensya asin Tekonolohiya. Si Lim-Sylianco iyo sarong prolipikong researcher, na nagtao nin ambag sa nagkapirang lado arug kan mga pankapalibotang mutaheno asin anti-mutaheno, biyokimikal na nutrisyon, biyo-organikong mekanismo, asin mutahenisidad kan mga bulong na tinanom sa Filipinas (oftrilaurin, trilinolein, asbp.). Kan 1989, nagin siyang miyembro kan International Advisory Committee on Anti-mutagens. Dedikado man siya sa edukasyong kimikal asin nagsurat nin mga libro sa organikong kimika asin molekular na biyokimika na ginamit sa bilog na nasyun. Kabali digdi an mga: Principle of Organic Chemistry, 5th ed., 1975; Modern Biochemistry, 1976; Monograph Series on Molecular Biochemistry: Nucleic Acids, Protein, Carbohydrates, Lipids, 1974; Laboratory Manual in Organic Chemistry, 1965; asin Laboratory Manual in Biochemistry, 1961.

Kan 1958, nagin siyang Fellow kan Royal Society.

Kan 1977, naresibe niya an Gregario Y. Zara na Gawad.

Poon 1974 hasta 1977, siya an "Endowment Professional Chair in Chemistry" kan Unibersidad kan Pilipinas

Pigbisto siya bilang sarong Nasyunal na Siyentista kan Filipinas kaidtong 1994.