Bikul Ka Suarga Loka

Satua Bikul ka Suarga Loka (aksara Bali: bikulkasuwaŕgaloka) inggih punika silih tunggil satua Bali.

Duk ané malu dugas tasih yuga masa, ada kaceritayang Ida Sang Mahayogi sané maraga putus ané mapapasih utawi maparab Waikuntha. Ida Sang Waikuntha maraga mahamuni. Sadina dina, ida nguncar Weda mantra mamuja Ida Bhatara Wisnu.

Kaceritayang jani, ri kala peteng, Ida Sang Yogi Waikuntha ngidupang parapen utawi damar malengis nyuh di purané ento. Di subané keto, Ida Sang Yogi matilar budal ka pasraman idané. Lengis damaré ané kaanggon ngendihang api di pura linggih Ida Bhatara Wisnu totonan, misi malem. Malemé ento makada ngudang watek para bikul kema. Malemé totonan amaha tekén i bikul. Krana gageson ban layahné, lengis damaré mabriok muré tur kalalah ban apiné. Api damaré ngancan ngedénang. Di subané apiné gedé, sinar apiné ngranayang purané dadi galang. Dugasé ento, Ida Bhatara Wisnu lédang kayun idané sawiréh ulian i bikul linggih idané dadi galang, sing ja peteng dedet.

Gelisang cerita, sawiréh suba maadan patitah karmaphala, I Bikul tuah dadi amah-amahan i lelipi. Duk dina anu, i bikul sengkala, mati caplok lelipi. Malesat malayang atmaneiI bikul nuku Yama Loka. Di Yama Loka, para bala-bala Ida Bhatara Yama negul tur ngantung atmané i bikul sawiréh bikasné di mercapada. Ri sedek para cikrabala Ida Bhatara Yama ngeretang tali pangul atma i bikul, ditu lantas rauh utusan Bhatara Wisnu tur ngandika,

"Ih para cikrabalan Ida Bhatara Yama, bani-bani kita negul tur ngantung atman i bikul. Mirib kita ajak makejang tusing nawang, I Bikul nenenan parekan Bhatara Wisnu. Bikulé ené setata ngaé galang di pura linggih Bhatara Wisnu. Dugasé ento i manusa tan parungu tekén linggih Ida Bhatara Wisnu. Lus taliné tur lebang i bikul. Jani ia lakar ajak tiang ka Wisnu Loka tangkil majeng ring Ida Bhatara Wisnu."

Di subané keto lantas atman i bikul kaserahang ring utusan Bhatara Wisnu. I bikul ngiring utusan bhatara nuju kahyangan Ida Bhatara Wisnu. Atman i bikul nemuang bagia sujati di Wisnu Loka. Suen kasuen, suba lantas wates yusané, atman i bikul katitah mawali ka mercapada buin. Atman i bikul katitah numitis dadi putran ida sang prabu ané mahutama nyegjegang jagat. Ida sang prabu ané makardi karahayuan jagat.

Nah keto koné kacerita i bikul ané ngayah tur ngemit parahyangan linggih Ida Bhatara Wisnu. Sang sapasira ja jemet, anteng ngayah tur subhakti tekéning Ida Bhatara Wisnu, riwekas atmané lakar ngungsi Wisnu Loka utawi swargaloka. Buin besikné, yéning numitis ka mercapada lakar dadi manusa utama.