Wisaketcakw minawatc ka aicikopanen, ki nanto nipahekopon niska.
E wapamatc e micta mitcetiritci, peikw ki nipahew. Ekoni ka ici nantowi kotowetc nte e wi tcipakosotc anihi opirema, oniskama.
Mictahi ki kotowekopan, ekoni e ki ici rikowakohatc anihi oniskama e tcipakosotc. Ki itew: -Ni wi nipan, kanawerim! ki itew otcickica aniheriw ki atotew kitci kanawerimaritci anihi opirema. -Witamaci iriniwok pe sakiweparitawe! Aci iti nipakopan Wisaketcakw. Aci itiko anihi otcickica - Oma! neki iriniwok ka pe sakiweparitcik! Onickapitakopan e itapitc. - Namaiew ki! Picte ni! Ekoni minawatc e ici nipakopanen. Kek minawatc itiko anihi otcickica, - Oma! neki iriniwok ka pe sakiweparitcik! Onickapitakopan kiapatc e itapitc. - Namaiew ni! akwatikw na! Ekoni e ici minawa nepakoponen.
Kek iriniwa pe sakiwepaririwa. Nama kitoriw, nama witamako anihi otcickica. Ekoni e ici pe kipatcik aniki iriniwok e wapamatcik e taci niparitci Wisaketcakwa ekoni e ici kimotimatcik anihi opiremiriw ka ki tcipakosoritci. Ekoni ka ici mowatcik niki iriniwok; tepirak ositiriw ki sakiwaskototawewok e ickwa kitanowetcik e ki mitcisotcik.
Ekoni e ici minawatc matcakoponen kiapatc tca e pimotetc. Kek meka nete wapatamokopan e micta mitcenik miniciriw. Moctenam kitci mitcik. Ekoni e ici mitciwokopanen kiapatc niheriw miniciriw. Tecikotc minawatc kitoriwa *pirecica e itikotc: - Wisaketcakw mitciw omiki! E itikotc anihi *pirecica. Ekoni e ici ponitakopanen e mitcik aniheriw miniciriw, e kiskeritak ka mitcik; - Nimiki ni ka mitcian! E iteritak, aci e ki itetc; "Minic" kata itwaniwon iti airiniskake e ki itetc, omiki e wapatak e aikoterik mictikocik.
This article uses material from the Wikipedia Atikamekw article Wisaketcakw, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Patoc karokitasonaniwon kata natcipatcikatek ohwe mawotosinihikanCC BY-SA 4.0 kekotc nama takatc e itasinatek. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Atikamekw (DUHOCTRUNGQUOC.VN) is an independent company and has no affiliation with Wiki Foundation.