Vuelta A España 1993

Vuelta a España 1993
Detalles
Carrera	48. Vuelta a España
Dates	26 de abril – 15 de mayu de 1993
Distancia total	3605 km
País	España
Llugar d'entamu	A Coruña
Llugar de llegada	Santiago de Compostela
Clasificación final
Ganador	Tony Rominger (CLAS-Cajastur)
Segundu	Alex Zülle (ONCE)
Terceru	Laudelino Cubino (Amaya Seguros)
Puntos	Tony Rominger (CLAS-Cajastur)
Monte	Tony Rominger (CLAS-Cajastur)
Metes volantes	Hendrik Redant (Collstrop-Assur Carpets)
Combinada	Jesús Montoya Alarcón (Amaya Seguros)
Equipu	Amaya Seguros
◀1992	1994▶
Documentación

Tony Rominger, ganador de la última edición, partía como favoritu al trunfu final. Ente los candidatos a la so socesión taben, ente otros, los rivales del añu anterior, Jesús Montoya (sofitáu pol equipu Amaya Seguros, con compañeros como Melchor Mauri, Laudelino Cubino o Oliverio Rincón) y Pedro Delgado. L'equipu ONCE, con Erik Breukink como xefe de files y ciclistes como Laurent Jalabert o Johan Bruyneel, tamién yera un seriu candidatu. Otros corredores d'importancia yeren l'italianu Marco Giovannetti y l'escocés Robert Millar, anque nun cuntaben con un gran equipu de sofitu.

Un mozu suizu, Alex Zülle, que venía como gregariu de Breukink nel equipu ONCE, sorprendió nel prólogu, alzándose cola victoria con más de mediu minutu sobre'l restu de participantes. Zülle caltuvo'l maillot mariellu mientres la primer selmana.

Esperábase que na quinta xornada, una cronoescalada al Puertu de Navacerrada, el ciclista suizu perdiera'l lideralgu. Sicasí, Zülle non yá lu caltuvo, sinón que ganó la etapa. Namái Rominger paecía poder siguir el ritmu del so mozu compatriota. Gran parte de los favoritos, ente ellos Perico Delgado, perdieron más de dos minutos na contrarreló.

L'altu monte llegó na oncena etapa, con final en Caerler. Tony Rominger llanzó'l primer envite pol maillot mariellu, aventayó na meta a Zülle en casi un minutu y asitiábase a namái 18 segundos. El restu de corredores, empezaben a perdese na clasificación xeneral, a munchos minutos. Namái Cubino aguantaba, pero yá a dos minutos. Tres una disputada contrarreló en Zaragoza, la clasificación xeneral yera yá claramente cosa de dos, los suizos Zülle y Rominger. Rominger consiguiría na etapa siguiente, con final n'alto, recuperar el maillot mariellu. Nes primeres etapes disputaes nel cordal Cantábricu, Zülle y Rominger caltuviéronse xuntos en tou momentu, polo que nun hubo diferencies ente estos. Pero na postrera d'elles, con final nel Altu del Naranco, Rominger fízose cola victoria y con una importante ventaya de casi un minutu sobre Zülle.

La última etapa de la Vuelta yera una contrarreló individual de 44 quilómetros. Alex Zülle perdía pocu más d'un minutu y taba dispuestu a recuperalu. Ganó la etapa con casi un minutu de ventaya sobre Tony Rominger, pero foi insuficiente, y esti postreru consiguió asina la so segunda Vuelta a España consecutiva. Nel podiu, acompañó-yos el bexaranu Laudelino Cubino.

TVE cubrió esta prueba escoyendo como banda sonora'l cantar "Two-Pa-Ka", del grupu tecno Azul y Negro.

•   Wiki Commons tien conteníu multimedia tocante a Vuelta a España 1993.