Pepín De Pría

José García Peláez nació'l 14 d'avientu de 1864 en La Pesa, na parroquia de San Pedro de Pría (Llanes). Yera fíu d'un maestru, y a la selmana de nacer quedó güérfanu de madre .

A los seis años treslládose cola familia a Xixón, y bien ceo entamó a trabayar nuna teyera y na fábrica de loza. A los doce años dexó’l trabayu pa estudiar bachilleratu y, más tarde, maxisteriu na Escuela Normal.

Conoció una vida enllena de dificultaes económiques, cuanto si más que tuvo 14 fíos, dempués de casar con Florentina Argüelles en 1891. Ello llevólu a desempeñar abondos oficios como emplegáu de banca, asegurador o viaxante de comerciu.

En 1896 emigró a L'Habana, y dende ellí unvió cróniques a la prensa asturiana sobre la vida en Cuba.

A los pocos años volvió volvió a Asturies y punxo escuela en dellos pueblos de los conceyos de Xixón y Llanes. Nestos participó activamente nel ambiente cultural alredor del Atenéu Obreru, les agrupaciones musicales obreres y la prensa. Políticamente taba próximu al republicanismu federal, y apoyó’l procesu de reivindicación rexonalista.

Pin de Pría llegó ser nomáu académicu de la Real Academia Asturiana de les Artes y les Lletres.

Nos años caberos, volvió a Llanes, onde trabayó de llabrador. Morrió en Nueva, el 27 d'avientu de 1928.

José García Peláez empezó a firmar los sos testos col alcuñu de Pepín (o Pin) de Pría en 1901. Na so obra puen estremase tres estayes: los artículos de prensa ( en castellanu ), la producción teatral y la poesía lírica. Tamién se sabe que tuvo trabayando na ellaboración d'un diccionariu, del que nun se conserva nada.

Como periodista, tuvo una bayurosa producción en publicaciones como El Noroeste o El Comercio de Xixón, La Atalaya de Ribeseya y La Ley de Dios (que llegó a dirixir) en Llanes.

Como autor d'obres de teatru costumista en versu fue un autor enforma popular. Ente les sos obres destaquen ¡A L’Habana! (1895), ¡El diañu de los microbios! (1914) y otres inédites como El Curín, Venta quita renta, L’estudiante de Tueya, La hespiciana, La cruz del camín rial, Pepín l' afrancesáu o Xixón en 1808 y Alma virxn.

Sicasí, la crítica valora anguaño a Pepín de Pría como un de los principales poetes líricos n'asturianu . Les sos principales obres poétiques son Nel y flor (publicada en 1925 por soscripción popular) y La Fonte’l cai, obra póstuma, publicada en 1984, anque dellos fragmentos apaecieron en vida del autor, por entregues, na prensa de la época.

•   Wiki Commons acueye conteníu multimedia sobre Pepín de Pría.
• Rexistru d'autores asturianos de la Conseyería de Cultura del Principáu d'Asturies. Contién una bibliografía y una llista completa de los manuscritos de Pepín de Pría
• Biografía, bibliografía y fragmentos de so obra na Biblioteca d'autores asturianos
• Proyeutu Caveda y Nava, onde puen lleese 4 poemes de só