Erle Stanley Gardner: Escritor d'Estaos Xuníos

Autor de noveles policiaques, que publicó sol so propiu nome, y tamién usando los seudónimos A.A. Fair, Kyle Corning, Charles M. Green, Carleton Kendrake, Charles J. Kenny, Les Tillray y Robert Parr.

Erle Stanley Gardner
Vida
Nacimientu	Malden (es) , 17 de xunetu de 1889
Nacionalidá	Estaos Xuníos
Llingua materna	inglés
Muerte	Temecula, 11 de marzu de 1970 (80 años)
Familia
Padre	Charles Walter Gardner
Madre	Grace Adelma Waugh
Estudios
Estudios	Palo Alto High School (es)
Llingües falaes	inglés
Oficiu	escritor, abogáu, novelista, escritor de ciencia ficción, xurista
Premios	ver The Grand Master  (1962)
IMDb	nm0306916

Gardner exercía'l so oficiu d'abogáu, pero'l so calter tarrecía la rutina de la práutica llegal. La única parte que realmente esfrutaba yeren los xuicios penales y el desenvolvimientu de la estratexa a siguir nun xuiciu. Nel so tiempu llibre, Gardner empezó a escribir pa les revistes policiaques que tamién allugaben a autores como Dashiell Hammett y Raymond Chandler. Gardner creó munchos personaxes pa estes revistes, ente otros l'atélite Lester Leith (parodia d'otru personaxe, Lord Peter Wimsey, de Dorothy Sayers) y Ken Corning, abogáu criminalista, que foi l'arquetipu pal personaxe más famosu de Gardner, Perry Mason, abogáu con dotes detectivescas, protagonista de más de cincuenta noveles de Gardner. La carauterística que fizo a Gardner bultable nel mediu ye que, a pesar de pertenecer al xéneru policiacu, l'héroe de les sos noveles nun yera un policía nin un detective, sinón un abogáu penal.

Gardner dedicóse amás al proyeutu llamáu «la Corte del últimu recursu», al cual dedicó-y miles d'hores xunto colos sos amigos y colegues del mediu forense y criminalístico. Nesti llabor buscábase revisar ya investigar los posibles errores del sistema xudicial qu'afectaren a xente que, a pesar de ser inocente, fuera condergada por cuenta de mala representación llegal, vicios y males práutiques per parte de fiscales y cuerpos policiales y, más direutamente, a errores aniciaos en dictames erraos (o mal interpretaos) de medicina forense.

El personaxe trescendió al mediu del cine nes décades de 1930 y 1940, y convirtióse a lo postrero na serie de televisión Perry Mason, onde l'actor Raymond Burr caracterizaba a Mason. El mesmu Gardner apaeció nel últimu episodiu de la serie, nel papel d'un xuez. A finales de la década de 1980, la serie foi alicada nun puñáu de películes pa televisión, nes cualos apaecíen miembros del repartu orixinal, incluyendo a Burr.

Sol seudónimu A. A. Fair, Gardner escribió delles noveles colos detectives Bertha Cool y Donald Lam,^:13 amás d'escribir una serie de noveles sobre'l fiscal Doug Selby y el so enemigu Alphonse Baker Carr. Nesta última serie, rescamplaba'l contrapuntu a la serie de Perry Mason, pos los papeles del investigador infalible y el so eternu rival yeren invertíos ente'l fiscal y l'abogáu de les noveles.

Gardner finó'l 11 de marzu de 1970, nel so ranchu de Temecula. Yera l'escritor d'Estaos Xuníos más vendíu del sieglu XX, nel momentu de la so muerte. Foi encenráu, y les sos cenices espardíes sobre la so amada península de Baxa California.^:305 El so ranchu, el Ranchu del Paisanu nel so tiempu, foi vendíu tres el so decesu. Foi depués revendíu en 2001 a Pechanga Indians, renombráu Great Oak Ranch, y finalmente absorbíu na reserva de Pechanga.

•   Wiki Commons acueye conteníu multimedia sobre Erle Stanley Gardner  .
• Bibliografía completa de Erle Stanley Gardner (n'inglés)
• Bibliografía relacionada con Erle Stanley Gardner nel catálogu de la Biblioteca Nacional d'Alemaña.
• Bibliografía y biografía del autor
• Erle Stanley Gardner en krimi-couch.de
• Erle Stanley Gardner na Internet Movie Database (n'inglés)