محمد جودار

تولد جودار ف أبريل 1956 ف بن مسيك. باه محمد بن عبد الله جودار تولد ف 1930 ف شياضمة ؤ شارك ف لمقاومة لمسلحة ضد ستيعمار لفرانساوي، ؤ تشد ف 10 مارس 1955 ؤ تحبس ف لحبس د دارلبيضا، فين تقتل ف 21 مارس.^[مصدر؟] قبل مايدخل جودار ل سّياسة، خدم ؤستاد ديال لماط.

ف سياسة

ف 2007، دخل ل مجليس نّواب مورما ربح نتيخابات تشريعية ف دايرة د بن مسيك. مازال باقي برلاماني حتال دابا، مورما عاود ربح لمقعد ديالو ف تلاتة لولايات من بعد.

تنتاخب ب تصفيق أمين عام ديال حيزب تيحاد دوستوري ف 1 أكتوبر 2022 بلاصت محمد ساجد.

ف رياضة

جودار هو رايس د لفرقة د لفتح لبيضاوي د كورة لي كاتلعب ف لقيسم لّول هواة. ف 2011، تنتاخب رايس د لعصبة د دارلبيضا د كورة ؤ مازال باقي ف لپوصط ديالو مورما تجدد تلاتة د لمرات.

ف 2014، دخل معا فوزي لقجع ف ليستة لي ترشح بيها ل لجامعة لملكية لمغريبية د لكورة، ؤ ولا موراها رايس د لجنة تنضيم لمسابقات ف لمكتب لمديري.

ف لجمعيات

تنتاخب ف 2009 كاتب عام د جمعية ولاد شوهادا د ستيقلال ف دارلبيضا.

ف 2009، قبل من لفينال د دوري أبطال لعرب بين لوداد لبيضاوي ؤ ترجي تونسي، ضرب جودار رايس د لجنة تنضيم د لوداد عبد لحميد حسني طّاسيلي قدام نّاس لي حاضرين حيت ماخلاهش يڭلس ف لمنصة شرفية. بجوجهم من بعد دارو شيكاية عند لبوليس.

ف دجنبر 2019، خرجات ڤيديو د جودار بان فيها مابغاش يعطي ل لكونطرول لورقة ديال تران ؤ هدد باش يعيط ل لمودير ديالو. صّحافة عتابرو بلي لفعلة لي دار راها إهانة ل موضاف كيدير خدمتو. دار جودار موراها توضيح قال فيه بلي لڤيديو حرّف شنو وقع بصاح ؤ بلي راه عطا لورقة ل لكونطرول حيت موالف يديرها.