عباس بن فرناس

عندو إسهامات ف بزاف د لمجالات بحال لفلك، لهندسة (لانجينيوري)، الطب، الشيمي، و تا لمزيكة و الشيعر ب لعربية. كيڭولو الروايات بلي دار تجارب ديال الطيران.

عباس بن فرناس
معلومات عامة
زيادة	810 رندة
لموت	887 (76/77 عام) قرطبة
لحرفة	مخترع، طبيب، كيميائي، فنان موسيقي، شاعير و فلكي
لّوغات لي كيعرف	عربية و تاريفيت
معلومات خرى
دين	إسلام

بن فرناس صاوب آلة لي كاتبيّن لحاراكة ديال النجوم و لكواكب. ختارع تا طريقة د لمصاوبة ديال الجاج بلا لون، زيادة على عدسات ديال التكبار على ود لقراية لي كانو كيتسماو لحجرات د لقراية، و لي كانو مخدّمين قبل مايتّختارعو النضاضر.

عباس بن فرناس تّولد ف رونضة، و كبر د قرطبة. جدودو كانو شاركو ف الجيش لإسلامي لي دخل ل إيبيريا. لمعلومات لبيوڭرافية عليه قليلة، ولاكين أغلب الروايات متافقين بلي كان كيتّعتابر مولى من عند لأمويين، و بلي لأصل ديالو كان أمازيغي من شمال إفريقيا. التوارخي لمصري صلاح الدين الصفدي ڭال بلي عباس بن فرناس كان تحديداً من أصل مغريبي.

عباس بن فرناس معروف ب مجموعة د لإكتشافات و لإختراعات بحال:

• لحجرات د لقراية: حجرات د الجاج كيكبّرو لكتابة و كيعاونو ف لقراية، لي نتاشر لإستعمال ديالهوم قبل مايبانو النضاضر ف لقرن 13.
• آلة لي كاتسيميلي لحاراكة د النجوم و لكواكب.
• پروصي ديال تقطاع لكوارتز لي خلا لأندالوس ماتبقاش محتاجة تصيفطو تال مصر باش يتم التقطيع ديالو.
• عرّف لأندالوسيين ب لكتاب لهندي ديال لفلك السندهند لي كان عندو تأتير كبير ف ؤروپا.
• دار الديزاين ديال ساعة د لما تسمات "الميقاتة".
• دار پروطوتيپ ديال ميطرونوم (جهاز كيضبط لإيقاع د الصوت).

التوارخي أحمد لمقري التلمساني كتب على بن فرناس، 7 قرون بعد لموت ديالو، بلي "غطا راسو ب الريش، و ركّب جوج جناوح، و نقز من بلاصة عالية باش يجرب يطير بحال الطيور". التجربة على حساب لمقري فشلات و تّضرب ف ضهرو حيت بن فرناس نسى بلي يركّب زنطيط. لمقري ڭال بلي عتامد ف لكتابات ديالو على "بزاف د لمصادر لقدام لي مابقاوش متوفرين"، ولاكين هاد الرواية ب التحديد ماعطا عليها تا شي مصدر، من غير مقطع ف قصيدة ديال شاعر أندالوسي سميتو مؤمن بن سعد. ماكاين تا شي مصدر أخور كيتبت بلي عباس بن فرناس دار هاد التجربة كيما وصفها لمقري.

ف 1973، تدار تمتال ل عباس بن فرناس من تصميم النحات لعراقي بدري السمرائي ف لمطار الدولي ديال بغداد. ف 1976، لإتحاد لعالمي د لفلك قرر باش يسمي حفرة ف لقامار على بن فرناس. ف 2011، واحد لقنطرة على واد لوادي لكبير (ب السپنيولية Guadalquivir) تسمات على عباس بن فرناس. و كاينة تا شركة "فرناس للطيران" Firnas Airways لبريطانية لي مسمية عليه.