Houptstrooss 28

Si goot us em Rhytaal über d Alpe bis zum Vinschgau.

Di alti Strooss vo Chur über d Luzisteig bi Fläsch, dur s Fürschtetum Liechteschtei und uf Fäldkirch het früener dr Name Düütschi Strooss gha. Ane 1786 isch si für Fahrzüüg usbout worde.

D Strooss durs Prättigau vo Landquart uf Davos het dr Kanton Graubünde i dr Middi vom 19. Joorhundert bout.

I de 1860er Joor isch d Fahrstrooss vo Davos übere Flüelapass verbesseret worde und bis 1872 au d Passstrooss übere Ofepass is Münschtertaal.

 

Dr Abschnidd vo Landquart durs Prättigau bis uf Chlooschtersch gilt als Nazionalstrooss und wird drum vo Bundesamt für Stroosse usboue. Die Strooss isch d Verbindig vo dr Autobahnusfahrt bi Landquart is Feriegebiet vo Chlooschtersch und Davos und zum Verladebaanhof vo Chlooschtersch-Selfranga, wome d Auto ufe Zug vo dr Rhätische Baan cha verlade zum dure Vereinadunnel is Engadin z goo. Dr Vrcheer durs Dunäll het ane 2000 agfange.

Bi Landquart und im Prättigau het d Strooss es baar grossi neui Bouwärch übercho:

• d Umfahrig vo Landquart
• s Dunäll i dr Chluus, under dr Burgruyne Fracschtei, vor Seewis-Pardisla
• d Brugg über d Landquart bi Schiers.
• zwöi Brugge bi Lunde
• s Chübliser Dunäll under em Tobel vom Schanielabach, wo ane 2016 uufggangen isch
• s Saaserdunäll, uuftoo ane 2011
• d Sunnibärgbrugg über d Landquart, wo dr Bouingeniöör Christian Menn planet het, ane 2005 uuftoo
• s Gotschnadunäll, wo 4,2 Kilometr läng isch
• dr Autoverlad Selfranga