Brexit

S Wort isch e Chofferwort us änglisch ‚Britain‘ fir „Großbritannie“ un ‚exit‘ fir „Uusgang, Uusdritt“. Zum erschte Mol brucht woren isch dr Uusdruck im Juni 2012 in eme Artikel vum Economist in dr Variante ‚Brixit‘ in Analogy zum Uusdruck „Grexit“, wu brucht woren isch fir e meglige Uusdritt vu Griecheland us dr Eurozone. Fir e Verblyb vum Verainigte Chenigrych in dr EU isch im Wahlkampf zum Referändum am 23. Juni 2016 au dr Uusdruck Bremain verwändet wore („remain“ stoht fir „verblybe“).

Rächtsgrundlag vun eme Uusdritt isch Art. 50 vum EU-Verdrag, wu noch em Verdrag vu Lissabon zum erschte Mol dr freiwillige EU-Uusdritt vu EU-Mitglidstaate reglet. Doderno isch s vorgsääne, ass no dr Absichtserklerig vun eme Staat iber sy EU-Uusdritt zerscht versuecht wird, dr Uusdritt dur e uusghandlet Abchuu zwische dr Union un däm Staat z konkretisieren un z ordne.

Dr Premierminischter David Cameron het anne 2013 e Referändum iber dr Verblyb vum Verainigte Chenigrych in der Europäische Union vorgschlaa (vor allem mit em innebolitische Kalkül, EU-Kritiker in dr aigene Raie rueigzstelle).

S Referändum het am 23. Juni 2016 stattgfunde. Bi re Wahlbedailigung vu 72,1 Brozänt hän 51,9 % vu dr Gsamtwehlerschaft (rund 16,8 Millione) fir e Brexit gstimmt un 48,2 % (rund 15,7 Millione) dergege. Doderby hän d Wehler z Nordirland un z Schottland in dr Meehait gege dr Uusdritt gstimmt un d Ängländer un d Walliser derfir. Ai Dag no dr Abstimmig het dr David Cameron sy Ruggdritt zum Spotjohr aagchindet.

Noch eme Bricht vu PricewaterhouseCoopers schetzt mer, ass bis zue 100.000 Stelle im Finanzsektor chönnte s Land wägem Brexit verloo.

Di britisch Premierminischteri Theresa May het dr Uusdrittsprozäss no Artikel 50 vum Vertrag iber di Europäisch Union am 29. Merz 2017 dur e schriftligi Mitdailig an dr Europäisch Rot in d Wäg glaitet. No Aagobe vu dr britische Regierig soll dr Uusdritt am 29. Merz 2019 um 23 Uhr britischer Zyt rächtschreftig wäre. In ere Ibergangszyt bis 2021 soll s Verainigt Chenigrych alli EU-Regle yyhalte un wyter Bydreg zahle, aber in EU-Gremie kai Mitsproch me haa.

Im Jänner 2017 het d May in ere Grundsatzred e Zwelf-Pinkt-Blan vorgstellt, wu ne „herte Brexit“ ohni EU-Dalmitglidschaft oder assoziierti Mitglidschaft vorsiht. S Verainigt Chenigrych soll us em europäisch Binnemärt, dr Zollunion un us dr Jurisdiktion vum Europäische Grichtshof uusschaide. Bi de Uusdrittsverhandlige isch e Vertraag zwische der EU un em Verainigte Chenigrych usecho, wu am 15. Jänner 2019 in dr Abstimmig vum britische Barlemänt mit groosser Meerhait abgläänt woren isch.

Di schwirige Verhandlige rund um de Brexit hän am 24. Mai 2019 dezue gfiert, ass d Theresa May uf de 7. Juni 2019 ire Ruggdritt as Fiereri vu dr Konservative Bartei un dodermit au as Premierminischteri verchindet het. Ire Noofologer isch dr Boris Johnsson wore, wu Neiewahle am 12. Dezämber 2019 duregsetzt het, wu sy Bartei d Meehait gwunne het. Am 9. Jänner 2020 het s britisch Unterhuus em Brexit-Gsetz zuegstimmt, s Oberhuus het am 20. Jänner Änderige gforderet. S Datum vum Uusadritt zum Ändig Jänner het me aber nit in Frog gstellt. Am 29. Jänner 2020 het au s EU-Parlemänt em Brexit-Abchuu zuegstimmt. Dodermit isch Großbritannien zum 31. Jänner 2020 am 23 Uhr MEZ us dr EU uusdrätte, blybt aber bis Ändi 2020 no im Binnemärt un in dr Zollunion.

• Financial Times: Brexit: Europe loses patience with London. – There have been many crises in the UK’s relationship with the EU, but this one feels different (18. Oktober 2012)
• capital.de 27. Juni 2014: Ein EU-Austritt würde dem britischen Außenhandel massiv schaden. Kommentar vum Richard Lambert un em John Springford
• Centre for European Reform (CER, 9. Juni 2014): The economic consequences of leaving the EU
• Fabian Zuleeg: Britain outside Europe? Fewer EU concessions to UK post-Brexit (European Policy Centre, 12. Mai 2014, Artikel im PDF)
• Egon Bahr: Für London waren die Vereinigten Staaten immer wichtiger als die Europäische Union – das führte zu vielen Konflikten. Nun ist die Zeit gekommen, England und Europa zu versöhnen. Vorteile hätte das für beide.
• (Wiener Zeitung) Interview mit dr britische Bolitologi Melanie Sully: Brexit ist kein Blitzbeschluss, 20. Oktober 2015
• Brexit uf em Informationsportal zur bolitische Bildig