新明斯克協議

到2015年頭，任何對於頓巴斯和解嘅談判都冇任何進展。雖然《明斯克協議》成功調低場仗嘅激烈度，但係一路其實都繼續有小型嘅鬥爭。到2015年1月尾，親俄嘅頓涅茨克人民共和國同盧甘斯克人民共和國又開始咗一次軍事攻擊，條協議等同冧哂。

喺1月期間，頓國同盧國喺頓巴斯戰爭入面都成功打贏咗唔少地，包括完全控制頓涅茨克市。喺2月7號，經過吸納咗烏克蘭總統波羅申科同俄羅斯總統普京嘅意見之後，奧朗德同默克爾一齊推出咗一份新嘅和解方案，係頓巴斯和解嘅“最後機會”。

美國曾經建議為烏克蘭提供軍事援助嚟打贏埋場仗，但係畀默克爾批評，係佢有份推出新方案嘅原因之一。

有關國家嘅領導人喺2月11-12號喺明斯克開咗峰會，嚟討論呢份新嘅方案。有到場嘅包括奧朗德、默克爾、波羅申科、普京、同埋頓國同盧國嘅代表。場峰會維持咗超過16個鐘，德國方面形容做“非常艱難”嘅談判。

經過談判之後，大家宣佈同意咗一份新嘅協議，通常叫《新明斯克協議》。啲條文同原本嘅《明斯克協議》好似，例如全面停火、撤走武器、放戰俘、同烏克蘭做政改等等。

份協議包含咗呢13點：

1. 喺2015年2月15號喺頓涅茨克州同盧甘斯克州開始實施全面停火
2. 所有重型嘅武器都要離條前線至少50公里（31英里），有某啲特定嘅武器需要離更加遠
3. OSCE會監督提供任何所需嘅物資，包括人造衛星、無人機、同無綫定位系統等等
4. 兩邊會喺停火之後30日之內，開始基於《明斯克協議》嘅備忘錄對頓巴斯嘅自治做談判，包括傾點樣舉行選舉
5. 用法律程序，嚟為喺頓巴斯嘅有關人物豁免懲罰
6. 兩邊都一定要喺武器退出嘅5日之內，放哂所有人質
7. 基於已有嘅國際程序，為任何有需要嘅人提供人道援助
8. 傾好恢復經濟關係嘅策略，而烏克蘭亦會控制返頓巴斯地區嘅銀行系統
9. 烏克蘭政府會恢復返對邊界嘅完全控制
10. 所有喺烏克蘭國土嘅準軍事組織或者僱傭兵都一定要撤退
11. 烏克蘭會設立憲法政改，主要係為咗提高頓巴斯嘅自治權，包括：
    1. 任何喺頓巴斯嘅有關人士都要有免受懲罰、騷擾、或者歧視嘅自由
    2. 喺語言上需要維持民族自決權，主要係需要保護俄文嘅地位
    3. 地區政府會有份任命地區嘅法官
    4. 頓巴斯嘅地區政府會能夠直接同烏克蘭中央政府簽協議
    5. 烏克蘭政府會為當地提供發展援助
    6. 地區政府會同烏克蘭中央政府同埋俄羅斯一齊，傾關於控制邊界嘅議題
    7. 當地政府有權控制地區性嘅民兵組織
    8. 烏克蘭中央政府唔能夠提早截斷地區官員嘅職權

1. 頓巴斯當地嘅地區選舉會根據OSCE嘅原則舉行，亦會由個組織監管
2. 繼續國家之間嘅關係，嚟設立任何所需嘅小組嚟討論有關嘅議題

• 明斯克協議
• 俄羅斯入侵烏克蘭