ოჯალეში — ქორთული აბორიგენული ჭითაჸურძენამი საღვინო ბინეხიშ ჯიში სამარგალოშე.
სამარგალოს ოჯალეშის „შონურს“ უძახჷდეს, მარა შონური ჯიში ხოლო რე, ნამუსჷთ ოჯალეშიწკჷმა გვენაშ მოხ, გინორთეფი ხოლო ბრელი უღჷ. ათეშენ, თე ჟირ ჯიშიქ ართიანშა ოკო ვაშმოჩირთან. (ქოძირით შონური).
ოჯალეში სამარგალოშ ართ-ართი უჯვეაშაში ჯიშიე. ოჯალეშიშ ნარგეფი უმოსო მარტვილიშ დო ზუგდიდიშ მუნიციპალიტეტეფს რე გოფაჩილი.
ძინათებული ფურცელი ოშქაშე ზჷმაშიე, მოკვარკვალო ვარა განიშოვალური ფორმაშ, სუმნაკვათამი. ფურცელიშ გიმენი განი ფსქელას რე ფორილი მოტუტაშფერო ბონდღილიშობურა ბუძგურიათ. პეული ჟირსქესამიე. ტიანი ოშქაშეშე მორჩილი ზჷმაშიე, ცილინდრულ-კონუსური ფორმაშ, შხირას სუალამი. სუაშ სიგჷნძა მინშა ტიანიშ გვერდშახ ოჭირინუანს, ოშქაშე სიკუმეხაშიე. კაკალი ოშქაშე ვარა ოშქაშეშე მორჩილი ზჷმაშიე, ონდეთ ოვალური, რუმე ლენიშფერი, დახე უჩა. ფსქელკანამიე. რბილობი ხორცამიე, ჰამო ჯიშური არომატით დო დიდარი გემოთ.
ოჯალეში ოშქაშე ვარა ოშქაშეშე ნძალიერი რდუალაშ დო ოშქაშემუნაწიებამიე. სავეგეტაციო პერიოდი გვიგვილიშ გოფაჩუაშე ედომუშამ მონჭაფაშახ 175-215 დღა რე. სამარგალოს ჸურძენი გერგობათუთაშ შქა რიცხუეფს მოურს. ტიანიშ ოშქაშე წონა 112 გრამიე, საჰექტარო მუნაწიამობა რე 6.0-6.5 ტონა. ჸურძენიშ ედომუშამი მონჭაფაშ პერიოდის შანქარიანობა ოჭირინუანს 20-23%-ს, სიბჟე — 8-9 გ/ლ-ს.
ოჯალეში გჷმირინუაფჷ ინტენსიურო გოფერილი, ძალამი მაღალხარისხუანი სუფრაშ ჭითა ღვინიშ დადგჷმალო. თიში ღვინი გჷშეგორუ ალკოპოლიშ დო სიბჟეშ ნორმალური აკოფარდაფათ, ხავერდუანობათ, დიდი სხეულით, ედომუშამი ჰარმონიულობათ დო დიდარი ჯიშური არომატით. სიჯვეშას ღვინი ივითარენს ჰამო ბუკეტის. სამარგალოს ოჯალეშშე უმოსო დგჷნა ჭითა გვერდო ტკბილ ღვინს. თეკწჷმა ჯიშის დიდი პოტენციალი უღჷ სქჷრე ღვინეფიშ ოხაზჷრაფალო.
This article uses material from the Wikipedia მარგალური (Margaluri) article ოჯალეში, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). დინორე მიწორინაფილი რე გეჸვენჯი ლიცენზიათ (დო შხვა ვა რე მეწურაფილი-და): CC BY-SA 4.0. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki მარგალური (Margaluri) (DUHOCTRUNGQUOC.VN) is an independent company and has no affiliation with Wiki Foundation.