黄海: 大海
黄海（启海话 IPA: ），是太平洋西部个一个边缘海，勒勒中国大陆搭朝鲜半岛当中央。黄海平均深44米，海底平塌塌，是东亚大陆架个一部分。黄海因渠个咸潮水黄拉拉得名。历史浪黄河勒勒七、八百多年里流到黄海（入海口勒江苏滨海，便是能界个旧黄河口。公元1855年黄河改道，流到渤海），河水里向无数泥沙畀黄海岸边个咸潮水染起黄拉拉。
黄海勒山东半岛成山角到朝鲜个长山串里海面最狭，习惯浪用搿条连线帮黄海分成北黄海搭南黄海两部分，北黄海面积大约匝7.1万平方千米，南黄海面积大约匝30.9万平方千米。黄海西北部通过渤海海峡搭渤海相连，东部通过济州海峡搭朝鲜海峡相通，南部通过长江口北岸启东圆陀角到济州岛西南角连线搭东海分界。
流入黄海个主要河流有鸭绿江、大同江、汉江、淮河等，重要沿海城市有大连、丹东、汉城、连云港、青岛、烟台等。属于黄海个海湾有西朝鲜湾、江华湾、群山湾、海州湾搭胶州湾。黄海岛主要集中勒其北部辽东半岛边浪搭朝鲜半岛边浪。其中大点个有长山群岛、薪岛、椴岛、白翎岛、德积群岛、格列飞群岛、古群山群岛、大黑山群岛、罗州群岛、楸子群岛、济州岛等。
黄海边浪个行政区有中国辽宁、山东搭江苏三省，朝鲜个新义州特别行政区、平安北道、平安南道、黄海南道、开城工业地区，韩国个京畿道、仁川广域市、忠清南道、全罗北道、全罗南道、济州特别自治道。
因为沿岸地区个工业污染（特别是淮河流域个工业污染）朆得垃有效个控制，黄海生态环境面临严峻挑战。
注意：勒黄海沿岸个居民有辰光叫“黄海”为“东海”，居是因为黄海地理位置浪勒东面。
| 中国海洋 | |
| 小海湾：胶州湾 - 海州湾 - 象山湾 - 兴化湾 - 湄州湾 - 大亚湾 - 三门湾 - 獅子洋 | |
内部链接
- 中国地理
- 朝鲜地理
- 韩国地理
This article uses material from the Wikipedia 吴语 article 黄海, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 除非另外声明，内容用CC BY-SA 4.0授权。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 吴语 (DUHOCTRUNGQUOC.VN) is an independent company and has no affiliation with Wiki Foundation.