江戶

作爲江戶時代日本箇政治中心，儘管形式丄箇首都是京都，實際丄向行政首都是江戶。外加江戶城是德川氏箇居城，江戶自身也是支配天領箇德川氏箇城下町，蓋咾也有儂謳渠武陽（ぶよう）。到著幕末，政治中心移到著京都，第15代將軍德川慶喜從來弗曾在江戶住過。

據1868年（明治元年）頒佈箇稱江戶爲東京詔書，江戶改稱「東京」，後首天皇箇東京行幸貤讓江戶城成爲著東京箇皇居。翌年，明治新政府也從京都遷到著東京，渠也成爲著日本實際丄箇首都。外加，因得改稱東京咾，管轄町奉行支配地內箇東京府廳也開廳哉（1871年，隨著廢藩置縣改爲著新東京府）。

江戶箇城鎮大約摸好分成功兩爿場許，即江戶城西南面至北面箇城鎮（山之手），搭之東面朝牢著以隅田川爲代表箇河浜咾護城河箇城鎮（下町）。江戶時期前期，一般性認爲山之手是武家邸宅、下町是町人箇町；但弗過到著中期後頭因得人口增加咾，山之手有得町人町（千代田區箇一部分）、下町有得弗少武家邸宅，實際丄箇面貌也邪氣複雜哉。

德川氏前頭箇江戶

從史料角度話起來，「江戶」隻地名頭一趟出現是在鎌倉幕府箇歷史書《吾妻鏡》丄向，蓋咾好認爲渠是平安時代後期再有箇地名。

隻名字箇來歷有得各式各樣箇話法，弗過頂有力箇是講江是河浜咾海灣，戶是入口，合在一淘便是「河浜箇入口」。還有儂話「戶」用作港城名字箇蠻多，蓋咾作興是「河浜箇港口」。當時辰光箇江戶在在武藏國搭下總國國境隅田川河浜口箇西許，日比谷海灣則伸入著後首箇江戶城裏勢。

 

江戶箇開發是由秩父黨一族開始箇。秩父黨來自平安時代後期武藏國秩父地區，經河越沿牢著入間川（瑲朞箇荒川）進入平原地區，外加自稱桓武平氏。12世紀，出身於秩父氏箇江戶重繼在江戶櫻田箇高臺丄造著城館（後首箇江戶城），外加還替自家兒子起名叫江戶太郎，形成功著江戶氏。渠場兒子江戶重長1180年攻打源賴朝箇辰光，以當初平家箇身份搭賴朝箇三浦氏相打；卻情，後首貤和解著，成爲著鎌倉幕府裏箇御家人。弘長元年10月3日（1261年），因得江戶氏一族一人箇地頭江戶長重受正嘉饑饉打擊，江戶鄉前島村（瑲朞箇東京驛附近）經營弗落去哉咾，捐畀北條氏德宗家並成爲其被官，1315年前貤畀德宗家捐畀圓覺寺。昰歇辰光鎌倉到奧州箇街道，經橫跨平川箇高橋，通望鳥越（瑲朞箇鳥越神社附近）、淺草。平川是流入日比谷海灣箇，沿牢渠老裏老早便有得海會村莊。老早底認爲平川本生便是流經日本橋串箇，乃朝再曉得渠是經江戶城三之丸護城河、阿末再望日比谷海灣流得去箇。

鎌倉幕府倒慝後頭，江戶氏一族在南北朝騷亂裏勢跟牢新田義貞，隑著南朝箇牌頭，弗過室町時代便慢慢然衰敗起來，到著戰國末期則跑到多摩郡喜多見去哉。另外，照應永27年（1420年）紀州熊野神社箇御師寫箇「江戶人名目錄」來望，江戶氏一族箇勢力貤加是到著多摩川下游箇大田區蒲田·六鄉·原·鵜之木·丸子咾隅田川下游箇金杉·石濱·牛島，江戶鄉箇國府方、柴崎、古川沿岸箇飯倉、小石川沿岸箇小日向、澀谷川沿岸箇澀谷、善福寺串沿岸箇中野，以及阿佐谷多個戶蕩。

同時，在在江戶昰爿地方，關東管領上杉氏一族扇谷上杉家箇有力武將咾家老太田資長（後首箇太田道灌）進入，在江戶氏箇居館遺址丄造起著江戶城；照《鎌倉大冊》箇話法，江戶城長祿2年（1456年）始建，翌年完工。文明10年（1478年），太田資長剃著髮，號爲道灌，在以江戶城爲中心箇南關東大顯身手，直到文明18年（1486年）畀人家謀殺咾故慝哉。道灌時期平川也是流入日比谷海灣箇，當中夾著隻江戶前島，西半爿是日比谷入江，東許是江戶湊，替之淺草湊咾品川湊一淘，並爲中世武藏國箇代表港口。江戶咾品川靠近利根川（瑲朞箇古利根川·中川）咾荒川箇河口，是從北關東內陸到鎌倉·小田原·西國方向去箇水上交通中轉場許。

太田道灌時代，京都因應仁之亂咾荒廢哉，蓋咾有得行情學者咾僧侶離開京都、投奔有權箇道灌，乃便以平川箇村爲中心形成爻城下町。吉祥寺在當時箇鄉下頭、瑲朞箇大手町附近，在受令搬場前，旁邊頭全是墓地（瑲朞箇「東京驛八重洲遺蹟」）。法恩寺咾淨土寺相傳也是原本便在北許平川沿岸箇城下町箇。另外，戰國時代還形成著叫「大橋宿」箇宿場町，外加，江戶城伉河越城組成川越街道咾、伉小田原組成矢倉澤往還也是昰隻時期完成箇事體，萬里集九·宗祗·宗牧咾排文人箇東國旅途裏也常莊要去江戶。

道灌死慝之後，扇谷上杉氏箇頭頭上杉朝良因長享之亂衹好隱居江戶城。卻情，後頭朝良貤重握實權、在江戶執政；外加，後繼箇朝興擔江戶城替河越城一淘作爲扇谷上杉氏在武藏國支配箇據點。但弗過，渠在高輪原之戰裏敗畀著後北條氏，江戶畀後北條氏支配。後北條本生支配著相模國、伊豆國在哉，再一掌握江戶，乃等於支配著東京灣（江戶灣）箇西半爿。蓋咾東半爿箇房總半島各勢力（小弓公方、里見氏）決心要替後北條氏對決。後北條氏末期，北條氏政直接支配咾統率著太田氏搭之千葉氏，渠管箇場許包括著東京23區箇隅田川西面、南面，搭之墨田區、川崎市、多摩地區各一部分。

老早子一徑認爲德川家康入城辰光箇江戶窮來像隻寒村然介箇。但近瑲幾年，有儂提出講，照太田道灌搭之渠後首箇扇谷上杉氏咾後北條氏箇記錄替古文書來望，在德川氏進去前頭，江戶便作爲交通要衝發展起來在哉，種傳統箇相法弗過是爲著要講德川家康咾江戶幕府箇好言話。外加，因得太田道灌時代箇記錄裏也有得讚賞道灌箇要素，有儂疑心家康前頭箇記錄可好作爲史實。卻情，乃朝一般性認爲，在德川家康後首，江戶在中世達成箇一定成果上頭貤有所發展。我伲好期待貤加多箇中世期文書研究加入歷史攷古學，進行對家康前頭江戶箇歷史箇進一步研究。

德川時代箇江戶

 

實現擔江戶隻城下町變成功巨大城市箇，便是德川家康。

1590年，後北條氏在小田原征伐裏勢畀豐臣秀吉滅慝，渠箇舊領封畀著德川家康。家康受開拓之命，擔居城定在關東地區中心江戶。同年舊曆8月1日（八朔），渠從駿府移居哉，話是因得當時辰光江戶城忒破舊。家康對江戶城本城箇建設弗多，著重建設城下町，削慝著神田山來填日比谷海灣，擴大城鎮範圍，替家臣咾鎮民配置房子。工程一瑲頭趕光，蓋咾恰恰填好箇辰光地面還弗曾完全固定，乾燥後畀風一吹，埲塵邪氣結棍。昰箇時期，江戶城除慝原經便有箇本丸咾二之丸，還有著西丸、三之丸、吹上、北之丸。外加開鑿道三堀咾、擔平川移到江戶前島中央部，乃朝箇西丸下頭有得一半以上埋在許（昰箇時期箇本城話箇是裏向本丸、二之丸搭之爲著家康隱居造箇西丸）。

1600年，在關原之戰裏家康獲勝，掌控天下；1603年任征夷大將軍，幕府所在地江戶箇重要性一朞頭提高，替服侍德川家箇各箇大名造著交關邸宅。弗單單是原來箇大名住在江戶，渠場箇家臣咾家族，搭之德川氏箇旗本咾御家人昰點武士也搬到著江戶來住，還帶得來交關同鄉人，蓋咾城鎮擴大來邪快。

 

另外，江戶城搭護城河借著幕府從各大名許頭課得來箇手傳普請得到著修繕，江戶城搭之武家邸宅修成功巨大箇堅城，外加造著擔渠場圍在許箇大城郭。都市開發箇歷史在後頭都市昰章再話。

1657年明曆大火後，因得再建，整個市箇範圍超過隅田川、繼續望東擴大。蓋咾人口也弗斷增加，18世紀初便超過一百萬，大江戶八百八町成爲爻當時世界出名（也有儂話是世界第一）箇大都市。人口箇增大，讓江戶成爲爻東日本頂大箇消費地，外加也成爲爻搭經濟先進、替日本各農村連結箇大市場上方（近畿地方）相連形成功箇中間市場，有得邪氣重要箇經濟地位。當時辰光箇江戶，畀葛飾北齋兩國（瑲朞箇墨田區）箇《東都歲時記》咾《富嶽三十六景》點作品描述成功是「東都」然箇國際大都市。18世紀末19世紀初，江戶成爲著代替上方箇文化中心，經濟活動咾參勤交替也交關便當，行行情情箇儂在江戶替之地方往來，昰也帶來爻一種文化箇傳播。卻情，龐大箇人口從農村流入江戶，也造成功蠻多都市問題。

江戶箇識字率

幕末，江戶男性成年人箇識字率超過70%，傍同期箇倫盾（20%）、拜利（10%弗到）好好較要高，達到世界丄頂高箇水平。羅刹革命家梅掣尼科夫、道國攷古學家世利孟全覺著然介箇識字情況邪氣驚人。外加因得寺子屋箇普及、《御觸書》箇公開發表搭之《瓦版》咾《貸本屋》箇繁盛咾，弗單武士，連得農民也會得吟和歌，多數町人全識字。弗過武士階級人口本生便高咾使得識字率貤加高，實際丄當時日本全國平均識字率大概在20%到50%橫裏。明治時代後，根據徵兵制實施辰光箇調査，好讀寫實用文章箇人有得望20%。

從江戶到東京

 

慶應四年/明治元年舊曆1月3日（1868年1月27日）箇戊辰戰爭裏勢，鳥羽伏見之戰裏幕府軍大敗，薩長軍逼近江戶咾，渠陷入著面臨戰火箇危險。昰歇，幕臣勝海舟搭率領薩長軍、提議早期停戰箇西鄉隆盛去交涉。同年舊曆4月11日（5月3日），在末箇將軍德川慶喜無血開城降伏，儘管交戰派替之官軍原舊進行著上野戰爭，卻情江戶是逃過著戰火（江戶無血開城）。

同年舊曆7月1日（5月12日），以町地爲中心建立爻「江戶府」。舊曆7月17日（9月6日）「江戶」改成著「東京」、「江戶府」改成著「東京府」（稱江戶爲東京詔書）。舊曆10月13日（11月26日）明治天皇東京行幸，擔「江戶城」改爲著「東京城」。翌年舊曆2月19日（1869年3月31日），劃定著新箇朱引範圍，舊曆3月16日（4月27日）町地設五十番組制（五十區制）。舊曆3月28日（5月9日），明治天皇第二𡉑行幸，稱「東京城」爲「皇城」，老早底將軍住箇江戶成爲爻天皇行在箇東京（東京奠都）。舊曆11月2日（12月4日），包括武家地箇一眼場許也歸著東京府管。明治4年舊曆6月9日（1871年7月26日）貤改定著朱引，導入著建立在大區小區制丄箇六大區制。

在同年舊曆7月14日（8月29日）箇廢藩置縣後頭，旁邊頭交關戶蕩併到著東京裏向；明治4年舊曆12月27日（1872年2月5日），武家地、町地咾排名字全廢慝哉。明治7年（1874年）3月4日，重新編成功著東京十一大區制，明治11年（1878年）11月2日東京十五區成形哉。後首，東京各城鎮慢慢然變成功東京市、東京都，並逐眼擴大到著東京都市圈。原本江戶裏除慝隅田川東許箇本所·深川箇場許全變成著都心，起到著核心作用在許。

 

江戶箇範圍

江戶昰爿場許也叫江戶御府內，弗過渠箇範圍隨時期各樣。

江戶時代初期，江戶大概包括乃朝東京都千代田區替之渠周圍，渠箇外護城河也正是照昰箇範圍造箇。明曆大火後頭，市區範圍擴大，通稱「八百八町」。1818年，據朱引箇制定，江戶市區範圍正式確定。瑲朞話箇「大江戶」，基本丄便是昰隻範圍。

神社

• 神田明神
• 山王權現（日枝神社）
• 根津權現（根津神社）
• 富岡八幡宮
• 築土神社
• 鳥越神社
• 湯島天神

寺

• 淺草寺
• 寬永寺
• 增上寺
• 感應寺
• 傳通院
• 護國寺
• 泉嶽寺

廟

• 湯島聖堂
• 德川家靈廟

江戶近郊

• 目黑不動（瀧泉寺）
• 池上本門寺
• 柴又帝釋天
• 東海寺
• 豪德寺 - 彦根井伊家箇菩提寺
• 深大寺
• 國分寺

 

薄相

• 行樂（參詣、賞花、賞月、觀楓、賞雪）
  • 江戶近郊 - 飛鳥山、武藏野、深大寺詣上箇小金井櫻、富士塚
  • 江戶至關東各處 - 大山詣上箇富士講
• 歌舞伎 - 市川團十郎 - 十八番、淨瑠璃（人偶淨瑠璃、常磐津咾啥）
• 落語、講談
• 錦繪
• 浮世繪 - 葛飾北齋、歌川廣重、東洲齋寫樂
• 黃表紙本 - 戲作、灑落本
• 俳諧 - 松尾芭蕉、小林一茶

•  

  煙火 - 玉屋、鍵屋
• 淨浴

著

• 衣裳
  • 振袖
  • 浴衣
• 鞋襪
  • 下馱 足馱 草履 雪馱

喫

• 江戶前壽司（手握壽司・海苔卷）
• 蕎麥麪
• 天麩羅
• 百珍物（豆腐百珍、蛋百珍、蘿蔔百珍、甘藷百珍、蒟蒻百珍）
• 初（鰹魚、落蘇、酒、蕎麥麪）
• 澤庵漬（一種腌蘿蔔）
• 棒手振・振賣・行商人（鹽・味噌・納豆汁・豆腐・蜆）
• 泥鰍（柳川火鍋、泥鰍火鍋、油氽）
• 鰻魚（江戶前）
• 銅鑼燒、今川燒
• 佃煮
• 納豆
• 茶泡飯
• 新香
• 目刺（鹹沙定魚乾串）
• 蜆汁
• 鹿・野豬玀
• 壺燒鹽（上流階級）
• 白米
• 豬排

小說

• 岡本綺堂《半七捕物帳》光文社文庫
• 池波正太郎《鬼平犯科帳》文春文庫
• 宮部美雪《本所深川異奇日記》新人物往來社
• 司馬遼太郎《油菜花海》攏六卷 文春文庫
• 半村良《小說 淺草嚮導》新潮文庫
• 宇江佐真理《幻聲 結髮伊三次捕物餘話》文春文庫
• 那須正幹《江戶箇百太郎》岩崎書店
• 畠中惠《娑婆氣》系列新潮文庫

隨筆

• Edward George Seidensticker 《東京 下町 山之手》
• 宮部美雪 《平成徒步日記》新潮社
• 山本博文《鳶魚讀江戶 江戶學搭近世史研究》中公文庫
• 山本博文《享樂江戶 三田村鳶魚箇世界》中公文庫

影戲 電視劇

• 《寫樂》 導演：篠田正浩
• 忠臣藏相關作品
• 鬼平犯科帳系列
• 錢形平次系列
• 半七捕物帳系列
• 水戶黄門系列
• 大江戶搜査網系列
• 長七郎江戶日記系列
• 暴徒將軍系列
• 《紅鬍鬚》 導演：黑澤明

• 沼間守一 - 政治家、新聞從業員。牛込
• 大田南畝 - 戲作家。牛込
• 夏目漱石 - 作家。早稻田
• 津田梅子 - 教育家。南御徒町
• 青木昆陽 - 儒學家、蘭學家。日本橋
• 中沢彦吉 - 政治家、實業家。京橋
• 星亨 - 政治家。築地小田原町
• 榎本武揚 - 幕臣・政治家、蝦夷島政府總裁、第7代外務大臣。下谷御徒町
• 成島柳北 - 新聞從業員、戲作家。淺草御廐河岸
• 幸田露伴 - 小說家。下谷三枚橋横町
• 高村光雲 - 雕刻家。下谷
• 河合浩蔵 - 建築家。本所
• 佐々木東洋 - 西醫、內科醫生。本所

江戶箇一大特徵是渠箇城箇城河浜搭之倉庫全多來邪邪氣氣，蓋咾替渠相似箇栃木市、埼玉縣川越市、千葉縣香取市箇旧佐原市市區咾排關東地區箇河港都市也畀人家謳作「小江戶」。

另外一個，也有得相對後期擴大著箇江戶城下町即「大江戶」，叫前期箇江戶城下町「小江戶」箇。