Viêpe

Viêpe (fr: Vierves), c' est èn ancyin ptit ban del Walonreye, rebané avou ds ôtes viyaedjes po divni li novele intité di Virwinvå.

• Limeros del posse :
  • asteure : 5670
  • davance : 6383
• Limero diyalectolodjike : Ph 81 (mwaisse pont di l' ALW).
• Arondixhmint : Flipveye
• Sipotaedje des djins: les Deurès Crosses

Li signorreye di Viêpe esteut-st ene grande foite signorreye tot åddilong d' l' Ancyin Redjime.

Gn aveut shijh ôtes viyaedjes k' estént divins l' tere di Viêpe: Wegniye, Li Mwinni, Ôlwè, Tregne, et les deus Matagne.

Li payis d' Viêpe diveut esse, divins l' vî vî tins, dizo schoûtance al Conteye di Nameur. Mins, on n' sait nén trop cwand, Viêpe divna-st on djoû Payis d' Lidje, e cwårtî d' Eter-Sambe-et-Mouze.

On grand signeur, Hinri de Hamal, rifourit mwaisse so tot l' ban (k' aveut stî pårti so ls etrevéns, di cåze des eritances) e 1567, et les de Hamal dimanît signeurs disk' ås Revolucions, mins sins lodjî a Viêpe.

Å 17e sieke, leus privots vont ctchessî les macrales, foû waeraxhmint. Ces procès la avou bôreataedje ont stî rtchantés pa Mimile so on tecse da Philippe Antoine, fwaite a pårti des vîs papîs, Pôve macrale.

Li tchestea d' Viêpe esteut ene sitocasse foite-plaece, et les djins s' î alént catchî, et-z î trover såvristé, cwand gn aveut do disdut avår la, come ça arivéve tofer dins l' Eter-Sambe-et-Mouze (loukîz a: Doûpe, Wegniye).

Ancyins martchîs

Viêpe esteut-st ene pitite plaece avou bråmint do dalaedje, dispus, al boune, 1461, dåte k' on-z î cåze dedja d' on covrou martchî.

Dins ls anêyes 1800 et des, gn av minme, tos ls ans, ene fôre ås biesses.

Ôtes activités economikes

Cinses aclevreces, bwès, shabotreye disca 1935, ancyinnes menes di fier (16inme sieke), gåre di trins (1854).