Lubuy kiya o/u bnari 1 babuy. Kska lubuy hiya o/u niqan kari djiyun maduk. Pawsa ta dangal seyda o/u rmngaw ta kari maduk mi kika empdhuq ta mangal samac. Nasi ta ini adas lubuy ni do/u aji ta empdhuq mangal samac uri. Lubuy kiya o/u niqan birac, muhing, ubal mi ngungu. Mangal ta bilaq ngungu mi birac samac psaun ta ska lubuy. Mtduwa ta bbriyun ka lubuy ni. Ni o/u kika lubuy maduk ksun ta. Nasi ta ini adas lubuy ni ka musa maduk o/u aji ta maangal samac uri. Lubuy kiya o/u bnari, duma na ka Sejiq/Sediq o/u pryuhun dha 1 babuy, dungal o/u kari maduk uri. Ni o/u kika lubuy maduk ksun rudan ta. Saw ka lubuy kiya o/u snalu qraqil, smluun dha bilaq balay lubuy. Dheyya o/u pqyaun dha ska rpun. Ini tduwa pqyaun sapah mi babaw tahuc. Ini tduwa tlngun laqi mi kana Sejiq/Sediq sapah. Lubuy kiya uri o/u, ini tduwa tlngun qrijil. Yasa waya balay ka saw ni. Dhuq mari lubuy ka sejiq/sediq o/u aji mslhan, asi ka niqan lala balay pila na. Asi ka pmahun na sinaw ka tnpusu sapah, dungal mi smalu uqun pkan na tnpusu sapah. Smbari seyda/cida o/u, ini tduwa pkla Sejiq/Sediq. Saw ni ka smbari lubuy maduk.