Myśli Ukryte

Wydany uostoł we 2010 roku uod Wydawńictwa Hologram. Szkryfńynty jes we Steuerowym szrajbůnku i zawjero 21 wjerszy, w tym nojbarzij znany utwůr uod autora "Hymn Norodu Ślůnskjygo". Na poczůtku kśůnżki, mjast wstympu, autor zamjeśćůł przełożůny poetycki fragmynt śpjywki uod Michaela Jacksona "Will You Be There".

Tůmik zebroł pozytywne recynzyje lokalnych medjůw. Portal "Twojakultura.pl" szkryfnůł: "Karol, mimo swojigo modego wjeku, przekozoł swojymu pokolyńowi (i dalszym pokolyńům), erbizna kultury ślůnskij, uoprawjůne we własne, szryfńynte wjerszym przemyślyńa". Karolina Włoczyk we cajtůngu "Goniec Górnośląski" szrajbła, iże "tůmik może być i inspiracyjům do przemyślyń co do żywotu, jak i do pogłymbjańo wjedzy uo ślůnskij godce". Zauważyła tyż, iże to tak naprowda "pjyrszy na rynku tůmik ślůnskij poezyje" i dodała: "jego wjersze już znodły mocka fanůw". W "Siemianowickim Roczniku Muzealnym" publikacyjo analizowano: "Teksty rajn sům wzruszajůnco spokopjůne i wjarygodne. (…) Kożdy ze 21 szkryfńyntych wjerszy to prawdźiwo „perełka”. Jejich autůr w kożdym kůncku pokazuje, co mo wjedza merytoryczno i warsztatowo". Podkreślała to tyż "Nowa Gazeta Śląska": "Karol Gwóźdź pewńy łůmje stereotypy i ku tymu udowadńo, co we ślůnskij godce idźe pjykńe uopowjedźeć mocka abstrakcyjnych pojynć. Co prowda szkryflańe we ślůnskij godce ńy zdo śe być czynnośćům blank naturalnům, choby we codźynnych kůntaktach, to lekość, z jakům poeta używo ślůnskich buchsztab, dowo nadźeja na drabki rozwůj tego dźału ślůnskij kultury".

1. * * * (Puste dźwjynki serca)
2. Smutek
3. Brif bezdůmnego
4. Einsam
5. Poćyrz
6. * * * (Blaskjym uod słůńca)
7. Do G.
8. Egzorta
9. Na klynczkach
10. Uodloz
11. Stwjerdzyńe
12. Ańůł
13. Uůna
14. Słowa ńy pedźane
15. Hymn Norodu Ślůnskjygo
16. * * * (Půnoć już zabrakło)
17. Źymjo z Auschwitz
18. * * * (Chnet uobrůca śe za śa)
19. Kůńyc gruby
20. * * * (A nałobkoło ćisza)
21. Cesta

Karol Gwóźdź: Myśli ukryte. Śymjanowice Ślůnskje: Wydawńictwo Hologram, 2010. ISBN 978-83-930871-0-5