Käärijä Pittá Cha Cha Cha: Käärijä pittá

Tain pittáin sun vuoitij ive 2023 Uđđâ muusik kišto já tain sun oovdâst Suomâ ive 2023 Euroviisuin Liverpoolist, Ovtâstum kunâgâskoddeest.

Cha cha cha lii suomâkielâg pittá, mon lávlu syemmilâš musikkár Käärijä. Pitá láá sannim Käärijä, Aleksi Nurmi já Johannes Naukkarinen. Nurmi já Naukkarinen lává meid nuottim pitá.

Käärijä muštâl, ete 2 min 55 sek pištee pittá lii aargâ vájáldittem rämidemlaavlâ. Ráp-pittá lii finnim vaikuttâsâid elektropopist já meetaalmuusikist já eromâšávt Käärijä mielâmuusikjuávhust, meetaaljuávhust Rammsteinist.

Pitá almostittii Warner Music Finland já Monsp Records uđđâivemáánu 17. peeivi 2023 njuolgist muusikpalvâlussáid neetist. Čuávuváá peeivi pittá almostui meid Uđđâ muusik kišto YouTube-kanavast já Yle Areenast viđâdin finalistij pittáin. Stivrejeijee Heikki Slåen YouTube-videost uáinojeh pitá suomâkielâg säänih já eŋgâlâskielâg jurgâlus.

Euroviisuh-lávlumkišto YouTube-kanavast pittá já ton muusikvideo almostuvvii vuossâmuu keerdi kuovâmáánu 26. peeivi 2023, ko tobbeen almostui video Käärijä lávdástâlmist ive 2023 Uđđâ muusik kišto finalist. Pitá virgálâš Euroviisuh 2023 -muusikvideo almostui maŋeláhháá.

Cha cha cha debytistij Suomâ virgálâš liiston nube saajeest. Oho Uđđâ muusik kišto maŋa pittá lâi Suomâ virgálâš listo njunošsaajeest já Suomâ radiosuáittulisto kuálmád saajeest. Vyesimáánu 6. peeivi räi pittá lii lamaš jo 15 okkod virgálâš listoost já 16 radiosuáittulistoost, Island Plötutíðindi-listoost jo 8 okkod já Ruotâ listoost 2 oho.

Jo almostittempeeivi pittá rikoi maaŋgâid ulâttâsâid, ko tom kuldâlii 147 000 kerdid nettimuusikpalvâlusâi peht sehe keččii já kuldâlii 225 000 kerdid YouTubest já 500 000 kerdid Yle Areenast. Tieđettemniävuin já Euroviisui fanij siijđoin pittá lâi jo ovdil fiinaal munejiellâh.

Helsingin Sanomat toimâtteijee Juuso Määttänen mielâst piitán láá ovtâstittum ráp-, pop-, rock- já elektromuusik hiäivulávt jolâs vuovvijn. Sun meid pahudij, ete puoh kištopittáin tot lii sehe vájálduumettummus já epitáválumos já ete tot luhostui pyeremusávt.

Válduartikkâl: Uđđâ muusik kišto 2023

Käärijä lávdástij kuálmádin UMK-finalist, mii uárnejui Tuurku Logomost kuovâmáánu 25. peeivi 2023. Láávdástmân kullii kyermilyeveh (nk. eurolyeveh) já čuovjisruopsis pihtâsáid kárvudâttâm cha-cha-tánssájeijeeh. Käärijä vuod lâi kárvudâttâm siämmáá neonruánáá boleron, mii sust lâi muusikvideost.

Cha cha cha -pittáin Käärijä vuoitij ive 2023 Uđđâ muusik kišto aaibâs čielgâsávt. Sun finnij ohtsis 539 čyegisid, mii lâi 387 čyegisid eenâb ko tot, maid Portion Boys finnij pittáin Samaa taivasta katsotaan. 387 čuággá iäruttâs lii táássáš ulâttâs; ovdebâš ulâttâs šoodâi ive 2021 Uđđâ muusik kišto, ko Blind Channel finnij pittáin Dark Side 371 čyegisid eenâb ko nube sajan olláám Teflon Brothers já Pandora. Blind Channelist lii vala-uv olesčyegisloho ulâttâs, ko muusikjuávkku finnij ive 2021 Uđđâ muusik kištoost 551 čyegisid.

Täin 539 čuággáin, mon Käärijä finnij finalist, 72 pottii aalmugijkoskâsijn raađijn já 467 kuldâleijein já keččein. Aalmugijkoskâsij raađij čiččâm enâmist Saksa, Espanja já Australia adelii tievâslijd čyegislovoid ađai 12 čyegisid já Ruotâ, Puola já Ukraina 10 čyegisid. Ovtâstum kunâgâskodde adelij tuše 6 čuággá. Kuldâleijein já keččein sun finnij 122 822 jiennâd ađai 53 % puoh jienâin.

• Käärijä – räppin, laavlâ, säänih
• Aleksi Nurmi – nuottâ já säänih, pyevtittem
• Johannes Naukkarinen – nuottâ já säänih
• Jukka Sorsa – kiitaar, heiviittâs
• Ki-RO – pyevtittem
• Kalle Keskikuru – miksem
• Svante Forsbäck – masteristem

• Cha cha cha -pittá YouTubest
• Lyyriikvideo YouTubest