Украинска Народна Рада Пряшовщины

Уже з конця року 1944 в ослободженых селах и мѣстах Словакии з русинскым обывательством зачали створьовати рады. Представителѣ тых рад зобрали ся в Пряшовѣ 1. марца 1945 на зъѣзд и створили Украинску народну раду Прящовщины на оборону интересох русинского обывательства. Зъѣзд легализовав Карпаторусский Автономный Совет Национального Освобождения (КРАСНО) як нелегалного предходника УНРП.

Органы УНРП
• пленум — по 2 представителѣ од окреса («округу»);
• президия, 7-членна;
• секретариат з оддѣлами про бѣжну роботу меджи пленумами.

Ведучы особы
Василь Караман — предсѣдник президии, Петро Жидовскый — подпредсѣдник президии, Иван Рогаль-Илькив — генералный секретарь.
Урядный язык
В пленумѣ и президии переважно были люде русской и русинской ориентации, але в политичной ориентации членства переважали комунисты и их симпатизанты, и зато в духу рѣшѣня комунистичной партии Украины з року 1925, же мѣстны Русины суть частьов украинского народа, независимо од того, як они самы себе называють, организация была названа украинсков. Наперек властной назвѣ, организация мала урядным языком русскый. Печатный орган УНРП — новинка Пряшевщина — давала тыж материалы по украинскы и выходила майже регуларно од 18. марца 1945 до 18. августа 1951.
Резултаты
УНРП прислужила ся ку основаню Украинского народного театру (днесь Театер Александра Духновича), Реферату украинскых школ (270 школ з учебным языком переважно русскым) и Союзу молодежи Карпат.

По переворотѣ в фебруарѣ 1948 нова комунистична чехословацка влада створила централизовану систему, яка не потребовала таку организацию як УНРП, што мала жаданя и на административу региона. Подля рекомендаций централной влады, в року 1951 прокомунистичный генералный секретарь Иван Рогаль-Илькив выголосив самороспуск УНРП. Формално УНРП екзистовала до 11. децембра 1952. По занику УНРП быв створеный Приготовный комитет про основаня КСУТ.

• Павло Роберт Маґочій: Українська народна рада Пряшівщини //Енциклопедія історії та культури карпатських русинів. Укладачі Маґочій П. Р., Поп І. — Ужгород: Вид-во В. Падяка, 2010. — 856 c.+ХХХІІ с. ISBN 978-966-387-044-1 укр. Сс. 757–758.
• Андрій Ковач: Українська народна рада Пряшівщини (УНРП) //Краєзнавчий словник русинів-українців. Пряшівщина. Упорядник Федір Ковач. — Пряшів: СРУСР, 1999. ISBN 80-85137-15-1 укр. С. 350.