Плод Олива

Е то оддавна култивована културна ростлина Середоморя и климатично подобных земель.

Мяздро плода обсягуе 30-40% потравинового олаю, сахариды, провитамин A (каротин), витамины B, C. Оливкы и оливовый олай суть такым давным потравиновым продуктом, як грозно и вино. Мають позитивный детоксикачный вплыв на организм, помагають загамовати старнутя, сердечны хвороты, злѣпшують травлѣня, и дяку ку ѣдлу. Суть закладом т. зв. середоморской диеты, котра ся поважуе за главну причину односно векшой добы живота обывательох Середоморя. Яко вонкашне средство оливовый олай помагать против кожных хворот.

Уроджай ся зберать восени, а темных оливок аж в децембру. Не е тото окрема файта, зелены оливкы суть лем недозрѣлыма, але набравшыма повну масу плодами.

Плод при повной дозрѣлости темнолиловый аж чорный, часто зоз восковым повоем, важить до 15 г.

Главныма продуцентами олив и оливового олаю суть Испания, Италия, Греция и краи Сѣверной Африкы.

Свѣжо зобраны оливы не суть споживателны через надмѣрну горькоту. Тота горькота ся одберать лугованьом, а пак ся оливкы закладують. Такы оливкы ся споживають як додаток при ѣдлѣ. Понеже темны оливкы ся поважують за якостнѣйшы, продуценты часто лугують зелены оливкы з приступом воздуха, од чого достають темне офарблѣня. О таком неприродном офарблѣню можеме ся дознати, кедь в зложѣню продукта суть зазначены конзерванты E579 або E585.

Найвеце цѣнным продуктом, добываным з олив е оливовый олай. Дозрѣлы плоды дакотрых файт обсягують аж 80% олаю. Найлѣпшый добывать ся простым студеным пресованьом оливок, такый олай мать означѣня Extra або Virgin oil (перве студене вытисканя). Горшой якости олай добывать ся горячым пресованьом зоз джамы, котра зостала по первом студеном пресованю, а означать ся Pomace oil (джамовый). Тот олай ся може хосновати в козметицѣ або мыдлярствѣ.

• Украинский советский энциклопедический словарь в трех томах. / Кудрицкий А.В. и др. (ред.). Главная редакция Украинской Советской Энциклопедии им. М.П. Бажана. К., 1988. Том 2. ISBN 5-88500-002-6 С. 350.
• Franta, Ondřej: Černé versus zelené olivy. Čím se liší? // Český rozhlas, 2015-08-19 чеш.
• Маслина. //Большая Советская Энциклопедия. русс.
• Маслина европейская. //Энциклопедия «Кругосвет». русс.

 

Вікісклад має мултімедіалны дата на тему:

Олива (плод)