Andrea Vitali (* Bellano, 5 favrer 1956) es ün scriptur e meidi taliaun.
Figl da Edvige ed Antonio Vitali, amenduos impiegos cumünels, es Andrea Vitali naschieu e creschieu a Bellano, vschinauncha sülla riva orientela dal Lej da Com, in provinza da Lecco, insembel cun oter tschinch frers. Zieva avair absolt il Liceo "Alessandro Manzoni" da Lecco, dal 1982 glivret el (tenor giavüsch da sieu bap) ils studis da medicina tar l’”Università Statale” da Milaun, eir sch’el vess vulieu dvanter schurnalist.
El es marido cun Manuela, ho ün figl - Domenico -, habitescha e lavura scu meidi in sieu lö da naschentscha.
Daspö 1990 publicha Vitali raquints e romans; sia prüma ouvra litterara füt il roman cuort Il Procuratore, inspiro dad istorgias quintedas da sieu bap; cun que guadagnet el il “Premio Montblanc” scu meglder giuven. Dal 1996 vaindschet el il “Premio letterario Piero Chiara” cun L’ombra di Marinetti, ma’l success da nom e da pom rivet dal 2003 grazcha al roman Una finestra vistalago, chi fet guadagner a Vitali il “Premio Grinzane Cavour” ed il “Premio Bruno Gioffrè” dal 2004.
Dal 2004 guadagnet Vitali il “Premio Dessì” cul roman La signorina Tecla Manzi scu megldra ouvra narrativa; dal 2006 surgnit el il “Premio Bancarella” cul roman La figlia del Podestà, cul quêl el pigliet part eir al finel dal “Premio Stresa”.
Dal 2008 obtgnet el il “Premio Boccaccio” per sia ouvra cumpletta, pustüt per La modista, cul quêl Vitali guadagnet eir il “Premio Hemingway”. Sieu roman Almeno il cappello vaindschet il “Premio Procida Isola di Arturo Elsa Morante”, il premi da la giuria dal “Premio Campiello” e pigliet part al finel dal “Premio Strega”.
Quasi tuot las istorgias da las ouvras da Vitali haun lö in “sia” Bellano e trattan da la vita quotidiauna d’üna pitschna vschinauncha e da sieus abitants: listess gener litterar d’oters scriptuors taliauns scu Mario Soldati e Piero Chiara.
Ils cudeschs da Vitali sun gnieus tradüts in Frauntscha, Germania, Serbia, Grecia, Rumenia, Portugal, Pajais Bass, Belgia, Spagna e Ungiaria.
This article uses material from the Wikipedia Rumantsch article Andrea Vitali, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il text è disponibel sut la licenza Creative Commons Attribution/Share-Alike; ulteriuras cundiziuns pon esser applitgablas. Detagls chattas ti en las cundiziuns d'utilisaziun. Vichipedia è ina marca registrada da la Wiki Du học, ina organisaziun senza finamira da profit. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Rumantsch (DUHOCTRUNGQUOC.VN) is an independent company and has no affiliation with Wiki Foundation.